Nahaunang Kababayen-an sa Pagpahiuli
Usa ka Mahimayaong Doktrina
Hinaut tanan kita mobati sa kahinam nga gibati ni Vilate Kimball sa dihang iyang nahibaloan nga siya mabunyagan alang sa iyang mga katigulangan.
Paghulagway ni Toni Oka
Kaniadtong Oktubre 1840, ang 34 anyos nga si Vilate Kimball misulat sa iyang bana, si Elder Heber C. Kimball sa Korum sa Napulog Duha ka Apostoles. “Si Presidente [Joseph] Smith mihisgot og bag-o ug mahimayaon nga hilisgotan … diin nakahimo sa pagpukaw sa simbahan,” misulat si Vilate ngadto ni Heber, kinsa nagserbisyo sa iyang ikaduhang misyon sa Great Britain. Ang hilisgotan sa pagtudlo ni Joseph Smith niini nga higayon mao ang bunyag alang niadtong kinsa wala makabaton sa oportunidad diha sa ilang mga panahon sa kinabuhi.
“Si Joseph nakadawat og mas hingpit nga pagpasabot kabahin niini pinaagi sa Pagpadayag,” siya mireport. “Kini pribilehiyo niini nga simbahan nga mobunyag alang sa tanan nilang mga paryente nga namatay sa wala pa moab[o]t kini nga Ebanghelyo.” Si Vilate nalipay sa pagpadayag nga sa pagbuhat niining puli [proxy] nga mga bunyag alang sa namatay nga mga sakop sa pamilya, “kita nagbarog isip mga tinugyanan alang kanila; ug naghatag kanila sa pribilehiyo nga mobangon sa unang pagkabanhaw.”
Ang mga Kimball mibalhin gikan sa New York aron magkauban sa mga Santos sa Kirtland, Ohio, ug dayon mibalhin ngadto sa Far West, Missouri. Usa ka tuig lamang ang milabay, kaniadtong 1839, sila kinahanglang mokagiw sa Missouri uban sa liboan ka mga Santos sa Ulahing mga Adlaw sa pag-ikyas sa pagpanggukod gikan sa mga kamot sa mabangis nga manggugubot nga mga panon. Sila mihimo sa ilang panimalay sa Nauvoo, gatusan ka kilometro gikan diin misugod ang ilang panaw.
Bisan tuod ang ilang pag-abot sa Nauvoo nahimong ubos sa pagsulay nga mga kahimtang, ang Oktubre 1840 nga sulat ni Vilate ngadto sa iyang bana napuno uban sa kahinam. “Gusto ko nga mabunyagan alang sa akong Inahan,”siya misinggit. “Akong gibana-bana nga mohulat hangtod ikaw mauli, apan sa ulahing pamulong ni Joseph bahin sa hilisgotan, mitambag siya sa tanan nga mag-andam ug molihok, ug ipalingkawas ang ilang mga higala gikan sa pagkabilanggo sa labing madali kutob sa mahimo. … Busa imong makita adunay higayon alang kanatong tanan. Dili ba kini mahimayaong doktrina?”
Si Vilate mao ang usa sa unang mga babaye nga nabunyagan alang sa mga patay didto sa Nauvoo.