Pagpangalagad pinaagi sa Pagmugna og Pagkanahisakop

Imahe

woman giving a hug to another woman

Gisukip sa ibabaw: gilitratohan ni Catherine Frost; ubos sa tuo: gilitratohan ni Scott Law

Sagad alang kanato nga mauban sa usa ka grupo apan mobati nga wala kita nahisakop niini. Kon mahitabo kini diha sa simbahan, mahimo kining ilabi kalisod alang sa usa ka tawo kinsa tingali nanlimbasog.

Si Presidente Gordon B. Hinckley (1910–2008) mitudlo nga ang tanan kinsa nagpasakop sa Simbahan nagkinahanglan og higala.¹ Ang tigpangalagad nga mga kaigsoonan adunay oportunidad sa pagsiguro nga ang matag miyembro nahibalo nga sila adunay higala diha sa ward o branch.

Kini ilabi ka importante alang ni bisan kinsa nga mobati nga siya wala mohaom sa “hulmaan.” Kadto kinsa mobati nga wala sila mohaom mahimong maglakip niadtong bag-ong mga miyembro, bag-ong mga mibalhin og puyo, dili minyo, walay anak, batan-on, tigulang, dili kaayo aktibo, hilumon o nanlimbasog sa pipila ka paagi. Naglakip kini niadtong kinsa makita, madungog, maghunahuna, magsinina, o maglihok nga lahi kay sa uban diha sa grupo. Sa laing pagkasulti, bisan kinsa kanato mobati usahay ingon og kita wala nahisakop.

Si Alissia, usa ka hamtong nga babaye kinsa nakigbisog nga mohaom tungod sa iyang kaliwat, nag-ingon, “Ang pagkalahi mahimong lisod, ug lisod kini ihulagway kon unsa kini sama ngadto sa usa ka tawo kinsa wala nakasinati niini.” Hinoon, siya nag-ingon, “Ako mibati nga namatikdan ug giapil pinaagi sa yanong mga buhat sa pagkamabination ug pagtabang. Ako mobati nga naapil kon ang mga tawo maghimo og paningkamot nga magbaton og tinuod nga pakigsinultihanay uban kanako, maggahin og oras alang kanako, o magdapit kanako sa paggahin og oras uban kanila. Nindot kaayo nga bation kon ang mga tawo nagpakita nga sila gusto nga magpaduol kanimo.”²

Mga ideya sa Pagmugna og Pagkanahisakop

Unsa ang mahimo sa mga tigpangalagad nga mga kaigsoonan aron sa pagmugna og usa ka dapit nga mahisakop alang sa uban?

Paminaw kanila. Bation nato ang pagbati nga nahisakop kon kita nasayod nga kita gipaminaw ug gitan-aw ingon nga kita mao, bisan sa atong pagkadili hingpit. Dili kita kinahanglan nga mosulbad sa mga problema sa usa ka tawo—sa tinuod, kita dili kanunay makahimo. Apan kita makapaminaw uban sa kalooy ug pagkamausisahon, naghinumdom kon unsay atong nadungog sa pagsiguro nga kita nakasabot, ug mangutana kon unsa pa ang anaa sa ilang hunahuna. Kini mga kahanas sa pakiglabot nga kita makabansay sa personal nga paagi ug mahimong modelo alang sa uban.
Pag-ampo alang kanila. Mahimong maaghat kita sa pag-ampo alang kanila. Kita usab mahimong maaghat sa pagpangutana kon mahimo kitang mag-ampo uban kanila o sa pagpangutana kon unsay mahimo natong iampo alang kanila.
Imahe
group of hikers

Taas: litrato gikan sa Getty Images

Dapita, ipaila-ila, ug ilakip. Dapita sila sa mga kalihokan sa ward, sa mga proyekto sa pagserbisyo, sa mga sosyal nga mga hitabo, o impormal nga mga kalihokan sa grupo. Dad-a sila uban kanimo kon mahimo, ipaila-ila sila ngadto sa uban, ug iapil sila sa pag-istoryahanay pinaagi sa pagpangutana nga ilang matubag nga mopabati kanila nga kabahin sila sa grupo. Tabangi kadtong bag-ong mibalhin og puyo nga mailhan kon kinsa ang bag-ong mga tawo, kay sila mahimong nangita usab og mga higala.
Pagtimbang-timbang. Diretsoha sila sa pagpangutana kon unsa ka konektado sila diha sa ward. Kinsa ang ilang mga higala? Kinsay mahimo nila nga mga higala? Pangutana mahitungod sa ilang mga interes, mga lingaw-lingaw, mga anak, ug mga kabalaka aron ikaw abtik sa mga oportunidad sa pakighiusa kanila ngadto sa uban nga adunay pagkaparehas sa daghang mga butang, o kinsa mahimong nagkinahanglan sa ilang mga kahanas.
Pag-ila sa mga kalig-on. Kita mobati nga nahisakop kon kita masayod nga kita adunay usa ka butang nga mahatag. Isulti ang mga butang nga imong namatikdan nga sila maayong mobuhat. Pangutan-a ang usa ka tawo kinsa nakaila kaayo kanila kon unsa ang ilang mga kalig-on. Kon sila wala mahibalo, dapita sila sa pagpangutana. Pangita og paagi nga ang ilang mga kalig-on makapalig-on sa uban.
Pakitambag sa mga lider. Kon angay, himoa nga ang mga lider sa ward masayud kon unsa ang mga kalig-on ug mga panginahanglan niining uban aron ang mga lider makabaton sa impormasyon nga ilang gikinahanglan samtang sila nangayo og inspirasyon alang sa makahuluganon nga mga buluhaton ug mga calling.
Hatagi sila og gahom. Tabangi sila sa pagdayeg sa mga kahanas nga anaa kanila pinaagi sa pagpangutana og sama niini: Sa dihang nagkinahanglan kamo og bag-ong mga higala kaniadto, unsa inyong gihimo? Kon kamo gusto nga malig-on ang pakighigala sa usa ka tawo, unsay inyong buhaton? Unsay inyong nasulayan na nga mga paagi sa pagkighiusa ngadto sa uban? Unsa pa ang inyong masulayan?