Mahisakop Ba Gayod Kaha Ako?
Samtang ako mikanta og lahi nga mga pulong gikan sa tanan, ako mibati nga daw taga-gawas.
Gilitratohan ni Nikki Reiner
Kaniadtong Enero 2009, ang akong bana ug ako milupad ngadto sa Germany. Gidawat niya ang usa ka trabaho didto, ug migahin kami og usa ka semana sa Berlin sa pagpangandam sa pagbalhin sa among pamilya.
Diha-diha dayon, gibati nako nga nasanapan sa mga kalainan tali sa Germany ug sa Estados Unidos. Nianang gabii, ako wala makaako sa pagbiya sa among hotel.
Apan sa pagkasunod buntag, Dominggo, ako nagmaisogon sa pagtambong sa miting sa sakramento. Sa dihang misulod kami sa chapel, usa ka mabinationg tawo nakaila kanamo isip mga Amerikano ug mihatag kanamo og usa ka English nga basahon sa himno. Samtang ako naglingkod sa luyo nga laray ug mikanta og lahi nga mga pulong gikan sa tanan, ako mibati nga daw taga-gawas.
Mitanyag og Iningles nga hubad ang ward ug mihatag kanamo og mga headphone. Sa tunga-tunga sa miting, gusto kong tangtangon ang akong headphone ug mobalik ngadto sa akong American nga ward. Apan sa dihang ako mikanta sa ikaduhang bersikulo sa “Unsa Kalig-on ang Tukuranan”, natandog og kusog ang akong kasingkasing sa Espiritu Santo.
Sa panimalay, yuta’g kadagatan—
Mangayog panabang, … sa gikinahanglan.1
Ang himno ingon og usa ka mensahe gikan sa Ginoo. Mga luha miagas sa akong mga aping samtang ako nagdali ngadto sa lobby, diin ang usa ka maloloy-ong tan-awon nga tawo mihatag kanako og masulod sa bulsa nga pakete sa tissue. (Walay tawo diha sa ward nga wala niini.)
Lakturon ang tulo ug tunga ka tuig human niana. Diha sa samang chapel usa ka Dominggo sa buntag sa Hunyo, ang organista misugod sa pagtugtog og himno. Akong giablihan ang akong German nga basahon sa himno ug misugod sa pagkanta.
Kana mao kanus-a gibati na usab nako og kusog ang Espiritu Santo. Ako mikanta na usab sa “Unsa Kalig-on sa Tukuranan”, apan ang tanan lahi.
Mitan-aw ako sa palibot. Imbis nga nagtan-aw sa mga langyaw, ako nakakita og mga higala. Sa luyo kanako milingkod ang among kanhi nga presidente sa stake, kinsa dali nga nakakat-on sa among mga ngalan. Sa atubangan nga laray ang akong deacon nga anak nga lalaki suod sa batan-ong mga lalaki kinsa mibisita kaniya sa ospital sa dihang siya nahiling nga may diabetes. Duol kanila milingkod ang lider sa Young Women sa ward, kinsa mitudlo sa akong anak nga babaye sa paghimo og lami nga mga pancake nga patatas.
Sa tibuok chapel milingkod ang batan-ong mga tawo nga akong gitudloan ug gihigugma diha sa Iningles og sinultihan nga klase sa institute, ang akong matinud-anong mga visiting teacher, ug uban kinsa malipayong miapil sa ward nga mga klase sa ballroom nga sayaw nga gihangyo sa bishop kanako nga tudloan.
Mga luha mihanap sa akong panan-aw, apan niini nga higayon wala ako modagan gawas sa chapel. Hinoon, akong gikuot sa akong pitaka ang akong kaugalingong masulod sa bulsa nga pakete sa tissue.
Walay tawo diha sa ward nga wala niini.