Dali, Sunod Kanako

Nganong Nagpakita si Moises, Elias, ug Elijah didto sa Templo sa Kirtland?

Doktrina ug mga Pakigsaad 110

“Sa atong pagpangandam sa pagsugat sa Dios, mahibaloan nato unsa ang atong balaang gitudlo nga mga responsibilidad pinaagi sa pagriby[o] sa sagrado nga mga yawe nga gipahiuli didto sa Templo sa Kirtland.”¹

––Elder Quentin L. Cook sa Korum sa Napulog Duha ka Apostoles

Unsa ang mga Yawe sa Pagkapari?

Ang mga yawe sa pagkapari mao ang awtoridad nga gihatag sa Dios sa mga lider sa pagkapari sa paggiya ug pagdumala sa paggamit sa Iyang pagkapari dinhi sa yuta.²

Si Presidente Dallin H. Oaks, Unang Magtatambag sa Unang Kapangulohan, mitudlo: “Ang tanang yawe sa priesthood gihuptan ni Ginoong Jesukristo, kansang priesthood iya. Siya ang motino kon unsa nga mga yawe ang ihatag ngadto sa mga mortal ug kon unsaon kana paggamit.”³ Ang Presidente sa Simbahan adunay awtoridad gikan sa Ginoo sa paggamit sa tanang mga yawe sa pagkapari nga gikinahanglan alang sa Simbahan sa paglihok (tan-awa sa Doktrina ug mga Pakigsaad 132:7).

Mga Yawe ug Awtoridad sa Pagkapari

Kaniadtong Abril 3, 1836, ang Ginoo mipadala sa Daang Tugon nga mga tighupot sa pagkapari nga si Moises, Elias, ug Elijah ngadto ni Joseph Smith ug Oliver Cowdery sa pagpabuhat kanila sa mosunod:

Moises

• Nangulo sa mga Israelihanon pagawas sa pagkaulipon sa Ehipto

• Ang mga yawe sa pagpundok sa Israel

• “Ang pagpundok sa Israel gikan sa upat ka bahin sa yuta” (Doktrina ug mga Pakigsaad 110:11)

• “Kon maghisgot kita kalab[o]t sa pagpundok, nagsulti lamang kita niining sukaranang kamatuoran: ang matag usa sa mga anak sa atong Langitnong Amahan, sa duha ka bahin sa tabil, angayng makadungog sa mensahe sa gipahiuli nga ebanghelyo ni Jesukristo.”⁴ ––Presidente Russell M. Nelson

Elias

• “Dayag nga nagpuyo sa mga panahon ni Abraham”⁵

• Ang dispensasyon sa ebanghelyo ni Abraham

• “Diha kanamo ug sa among binhi sa tanan nga mga kaliwatan nga mosunod kanamo pagapanalanginan” (Doktrina ug mga Pakigsaad 110:12)

• Uban niini nga pagbag-o [sa pakigsaad ni Abraham], atong nadawat, sama kanila sa karaan, ang balaang pagkapari ug ang mahangturong ebanghelyo. Kita adunay katungod sa pagdawat sa kahingpitan sa ebanghelyo, pagpahimulos sa mga panalangin sa pagkapari, ug pagpakasarang sa labing dako nga panalangin sa Dios—kana mao ang kinabuhing walay katap[o]san.”⁶ —President Russell M. Nelson

Elijah

• Usa ka propeta sa Amihanang Gingharian sa Israel, mga 900 BC

• Ang mga yawe sa gahom sa pagselyo

• “Pagpabalik sa mga kasingkasing sa mga amahan ngadto sa mga anak, ug ang mga anak ngadto sa mga amahan” (Doktrina ug mga Pakigsaad 110: 15)

• “Ang mga yawe sa pagselyo nga gipahiuli sa Daang Tugon nga propeta nga si Elijah, nakapahimo sa mga ordinansa nga mapahigayon sa balaan nga mga templo. Ang mga ordinansa nga gipahigayon niini nga mga templo maghimo sa mga indibidwal ug mga pamilya nga makabalik ngadto sa presensya sa atong langitnong mga ginikanan.”⁷ —Elder Gary E. Stevenson sa Korum sa Napulog Duha ka Apostoles

Panaghisgotan

Unsa nga mga panalangin ang imong nadawat tungod sa pagkapari? Unsa ang imong mahimo aron makaapil niining “balaang gitudlo” nga buhat?

Mubo nga mga sulat

1. Quentin L. Cook, “Pagpangandam sa Pagsugat sa Dios,” Liahona, Mayo 2018, 114.

2. Tan-awa sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 3.4.1, ChurchofJesusChrist.org.

3. Dallin H. Oaks, Ang mga Yawe ug Awtoridad sa Priesthood,” Liahona, Mayo 2014, 51.

4. Russell M. Nelson, “Paglaum sa Israel” (tibuok kalibotan nga debosyonal sa kabatan-onan, Hunyo 3, 2018), HopeofIsrael.ChurchofJesusChrist.org.

5. Giya ngadto sa mga Kasulatan, “Elias,” scriptures.ChurchofJesusChrist.org.

6. Russell M. Nelson, “Mga Pakigsaad,” Liahona, Nob. 2011, 87–88.

7. Gary E. Stevenson, “Asa ang mga Yawe ug Awtoridad sa Priesthood?” Liahona, Mayo 2016, 31.