Sa Unsang Paagi Ako Nahimo nga usa ka Mahigugmaon sa Templo nga Tawo
Mipasalig ako sa pagtambong sa templo matag Biyernes, apan pipila ka mga pulgada sa yelo usa ka buntag misulay niana nga pasalig.
Litrato gikan sa Getty Images
Ako nag-eskwela sa Brigham Young University niadtong 1994 sa dihang si Presidente Howard W. Hunter (1907–95) mitambag sa mga miyembro sa Ang Simbahan ni Jesukristo sa mga Santos sa Ulahing mga Adlaw nga mahimong “usa ka tigtambong sa templo ug usa ka mahigugmaon sa templo nga mga tawo.” Miingon siya, “Magdali kita ngadto sa templo ingon sa kanunay kutob sa itugot sa panahon ug sa kwarta ug personal nga mga kahimtang.”1
Niana nga panahon, nagpuyo ako sa usa ka apartment nga 15 minutos lamang nga lakton gikan sa Templo sa Provo Utah. Ako walay sakyanan, apan nasayod ako nga ako walay ikabalibad sa dili pagtambong sa templo kanunay. Mihukom ako sa paghimo niini nga usa ka prayoridad.
Akong gihan-ay ang akong iskedyol sa klase aron nga akong himoon ang Biyernes nga bakante. Dayon mipasalig ako sa paghimo niana nga akong adlaw sa templo. Matag Biyernes niana nga semestre, ulan o init, milakaw ako padulong sa templo sa alas 7:30 sa buntag aron magpabunyag alang sa mga patay. Kon usa ka dako nga report o proyekto kinahanglan na nga isumiter, miadto ako og una sa templo ug dayon gipahinungod ang nahibilin sa akong adlaw ngadto sa buluhaton sa eskwelahan.
Usa ka tingtugnaw nga buntag namat-an nako ang pipila ka mga pulgada sa yelo. Usa ka lumad sa sentral California, wala ako maanad sa yelo ug nahadlok sa tungason nga laktunon ngadto sa templo. Apan imbis mangatarungan ug magpabilin sa panimalay, ako nagsul-ob og init nga mga botas, gibitbit ang akong pangsimba nga mga sapatos, ug gisugdan ang akong paglakaw ngadto sa templo.
Sa dihang ako miabot, gitimbaya ako og usa ka pamilyar nga temple worker kinsa nahimuot nga nakakita nga ako mihimo sa paglakaw bisan pa sa mangitngit nga panahon. Sa diha na sa sulod, akong gibati ang kadaugan gisagulan og pasalamat. Akong naamgohan, sama lamang sa gihangyo sa propeta, nga ako nahimong “usa ka tigtambong sa templo ug usa ka mahigugmaon sa templo” nga tawo.
Sa mga katuigan sukad niana, ang akong panahon, panalapi, ug mga kahimtang, ingon man usab ang akong gilay-on sa templo, nausab sa pipila ka mga higayon. Apan uban sa matag kausaban, akong nahan-ay ang akong iskedyul aron ako makapadayon sa pagtambong sa templo nga usa ka prayoridad sa akong kinabuhi.
Samtang ako nagbuhat niini, ang mga panalangin sa templo miabot sa akong kinabuhi, sama sa gisaad ni Presidente Hunter.