Digital Lamang: Mga Hulagway sa Hugot nga Pagtuo
Ako Adunay Hugot nga Pagtuo nga ang Dios Mogiya sa Iyang Propeta
Ako kining naamgohan nga tungod kay kita kanunayng moingon og “Mga Mormon” ug “LDS”, nga ang mga tawo wala makaila sa husto nga ngalan sa Simbahan.
Litrato sa maayong kabubut-on sa tagsulat
Samtang ang akong kompanyon ug ako mibisita sa bag-ohay lang nga nabunyagan nga miyembro, ang usa niya ka higala nga pastor miagi. “Oy, mga misyonaryo sa LDS!” miingon siya. Nalipay kami nga nakaila siya kanamo, ug among makita nga siya interesado. Samtang kami miabi-abi kaniya, akong gibati ang panginahanglan sa pagpaila sa among kaugalingon sa tukmang paagi.
“Kami ang mga misyonaryo sa Ang Simbahan ni Jesukristo sa mga Santos sa Ulahing mga Adlaw,” kami misulti kaniya.
“Oo,” mitubag siya. “Mga Mormon, o LDS.”
Kana dili maayong paminawon ngari kanako. Ako misulti kaniya nga ang mga tawo motawag kanamo nga Mga Mormon tungod sa Basahon ni Mormon.
“Dili,” miingon siya. “Bisan gani ang inyong mga miyembro motawag sa ilang kaugalingon pinaagi niana nga ngalan.”
Naningkamot kami sa among pinakamaayo sa pagtabang kaniya nga makasabot sa tinuod nga ngalan sa Simbahan, ug mipamatuod sa katinuod sa Simbahan. Midapit usab kami sa among bag-ong nabunyagan sa paghatag sa iyang pagpamatuod.
Kini nga panghitabo mipahinumdom kanako sa kaimportante sa paggamit sa tinuod nga ngalan sa Simbahan. Akoa diayng ignoranting gitangtang ang ngalan sa Manluluwas sa higayon nga akong pamub-an ang ngalan sa Iyang Simbahan. Karon nagsugod nga akong mas nasabtan ang ubang mga kasulatan nga akong gibasa sa makadaghang higayon. Mga bersikulo diha sa 3 Nephi nakatabang nako nga makasabot sa grabeng panginahanglan sa dili pag-usab sa ngalan sa Simbahan sa Ginoo kon tinud-anay ko gayod nga gitinguha ang pagdala sa Iyang ngalan ngari kanako:
“Wala ba [kamo] magbasa sa mga kasulatan, diin nag-ingon nga kamo kinahanglan modala nganha kaninyo sa ngalan ni Kristo, diin mao ang akong ngalan? Kay pinaagi niini nga ngalan kamo pagatawgon sa katap[o]san nga adlaw. …
“Busa, bisan unsa ang inyong buhaton, kamo mobuhat niini pinaagi sa akong ngalan; busa kamo motawag sa simbahan sa akong ngalan; ug motawag kamo sa akong Amahan diha sa akong ngalan aron siya manalangin sa simbahan alang kanako” (3 Nephi 27:5, 7).
Sa wala madugay, samtang naningkamot nga makasakay ngadto sa chapel, akong gigamit ang kompleto nga ngalan sa Simbahan sa paggiya sa drayber sa kon asa kami paingon. Nag-amping ako nga dili makatangtang sa ngalan ni “Jesukristo.”
Nasurprisa ako sa dihang ang drayber misulti kanamo nga siya wala makahibalo sa dapit. Dihang ang akong kompanyon nangutana sa tawo kon nakadungog ba siya sa LDS nga simbahan, miingon siya, “Oo.”
Tungod kay kita kanunayng moingon og “Mga Mormon” ug “LDS”, ang mga tawo wala makaila sa tibuok ngalan sa Simbahan. Mihukom ako sa pag-ampo nga kitang mga miyembro sa Simbahan makaamgo sa atong sayop. Samtang naghunahuna mahitungod niini, akong nahinumdoman ang propeta. Akong nasabtan nga ang propeta lamang ang makasulti alang sa Ginoo ngadto sa tibuok kalibotan, mao nga kon usa ka kausaban mahitabo, kini kinahanglan nga moabot gikan kaniya.
Apan naghunahuna ko sa akong kaugalingon, “Sa unsa kaha nga paagi nga mahimo kini? Bisan ang website sa Simbahan giminubo ‘LDS.org.’ Unsaon kana nga mausab?”
Sa atong mga pag-ampo, kita kinasingkasing nga mangamuyo sa Langitnong Amahan aron sa pagdasig sa Iyang sulugoon, ang propeta, sa paggiya kanato niining importante nga butang. Ako adunay hugot nga pagtuo nga ang Dios tinuod gayod nga mopadayag sa Iyang kabubut-on ngadto sa Iyang propeta.
Ako nakaeskedyul na nga i-release gikan sa Nigeria Benin City Mission sa Septyembre 2018. Apan ang akong petsa sa pag-release nausab ngadto sa Oktubre—sa samang Oktubre nga si Presidente Russell M. Nelson mihatag og importante nga mensahe ngadto sa tibuok kalibotan nga Simbahan:
“Alang sa kalib[o]tan, ang Simbahan sa Ginoo sa karon nagtakuban nga ‘Simbahan sa Mormon.’ Apan kita nga mga miyembro sa Simbahan sa Ginoo nasayod kinsa ang nagbarog niini nga pangulo: si Jesukristo Mismo. …
“… Ang uban sa kalib[o]tan mahimong mosunod o dili sa atong pagsulti nga tawagon kita sa sakto nga ngalan. Apan nagpakaaron-ingnon kita nga nahigawad kon ang kadaghanan sa kalib[o]tan motawag sa Simbahan ug sa mga miyembro niini sa sayop nga mga ngalan kon mao usab ang atong gibuhat.”1
Dili ninyo mahunahuna unsa ka dako ang akong kasurprisa ug kalipay! Ang mensahe ni Presidente Nelson klaro, ug akong gibati nga ang atong mga pag-ampo natubag. Mapasalamaton ako lapas pa sa mga pulong.
Kini nga kasinatian nakadugang sa akong pagpamatuod nga ang mga pag-ampo tubagon ug nga ang Langitnong Amahan nagdasig sa Iyang mga propeta. Nga kini mao ang Simbahan sa Ginoo, ug Siya nasayod unsay angay nga buhaton diha sa Iyang Simbahan. Bisan ang website sa Simbahan, nga naghunahuna ko nga dili posible nga mausab, gi-update ngadto sa ChurchofJesusChrist.org.
Nasayod ko nga si Presidente Nelson gitawag sa Dios. Ako usab nasayod nga si Propeta Joseph Smith wala maghingalan sa Simbahan nga gipahiuli pinaagi kaniya. Wala usab gibuhat ni Mormon. Ang Manluluwas Mismo ang nag-ingon, “Kay sa ingon ang akong simbahan pagatawgon sa katap[o]san nga mga adlaw, gani Ang Simbahan ni Jesukristo sa mga Santos sa Ulahing mga Adlaw” (Doktrina ug mga Pakigsaad 115:4).