Ang Gamhanang Tigduyog
Sa tunga-tunga sa akong pagbagulbol, usa ka yano apan gamhanan nga hunahuna misulod sa akong ulo ug nadugangan ang akong pasalamat.
Litrato sa tagsulat ni Annika Burkhardt
Adunay usa ka butang nga kulbahinam mahitungod sa paglingkod sa bangko, mga kamot anaa ibabaw sa krema og kolor nga mga tekla sa piano, naghulat sa imong senyas gikan sa konduktor. Ang pagduyog usa sa akong paborito nga kalingawan, apan kini dili mao ang usa nga namatikdan. Usahay ang akong garbo mobabag, ug gusto ko nga usa ka tawo moila sa akong mga paningkamot.
Kaming mga tigduyog nagpaluyo sa mga tigpasundayag, nagsuporta sa tempo [katulin], ug nagmugna og panag-uyon ug pagbati sa musika. Usahay, kami gani ang nagtabon sa mga sayop sa mga tigpasundayag. Naggahin kami og taas nga oras sa wala pa ug sa human na ang mga ensayo. Usahay kami ang kataposan nga hatagan sa musika apan ang unang gipaabot sa pagkat-on niini.
Sa panahon sa kalisod, nanlimbasog ako niini nga mga pagbati. Gibati nako nga walay usa nga midayeg sa akong buhat. Usa ka gabii miluhod ako sa kilid sa akong katre sa pagsulti sa Langitnong Amahan.
Gisugdan ko ang akong pag-ampo pinaagi sa paglista sa tanan nga akong gibuhat ug wala makadawat og pasalamat alang niini. Wala ako magkinahanglan og daghan, apan nagkinahanglan ako og usa ka butang. Ako misulti Kaniya nga ako mibati nga gikalimtan.
Atol sa akong pagbagulbol, ang Espiritu mihunghong og hunahuna nga nakapausab sa akong tibuok nga panglantaw.
Mihunong ako sa pag-ampo sa dihang kalit nakita ko ang akong sitwasyon sa laing paagi. Gisugdan nako ang pagtan-aw sa akong lista sa mga reklamo, naghunahuna niini kalabot sa Langitnong Amahan isip ang tigduyog. Ako natingala ug napaubos samtang ako naghunahuna mahitungod sa kapila kita wala makaamgo sa gidaghanon sa Iyang pagtabang kanato, nagpanalangin sa atong kinabuhi, nagtabon sa atong mga sayop, ug “dili mahatagpilaw ni mahikatulog” (Salmo 121:4) alang kanato. Kita nagdapit ba Kaniya nga ulahi apan nagpaabot Kaniya nga mauna?
Human niana nga kasinatian, misugod ako sa pagpasalamat Kaniya alang sa Iyang dili katupngan sa kanindot nga pagduyog sa akong kinabuhi. Ang tanan nga ako mao tungod Kaniya ug sa Iyang Anak. Unsa ka lahi nga panglantaw! Siya wala mopanton kanako sa akong mga pagbati o sa akong pagbagubol. Hinoon, mipili Siya sa pagtudlo kanako. Siya mitudlo kanako og laing paagi sa pagtan-aw Kaniya ug sa uban.
Karon kon ako mahulog ngadto sa lit-ag sa kalooy sa kaugalingon, akong hinumdoman ang akong Gamhanang Tigduyog—ang Usa nga ako nakigbansay ug ang Usa nga ako kinahanglang mopasalamat. Ang Langitnong Amahan mitudlo kanako sa pagpasalamat Kaniya sa laing paagi kay sa sukad akong nahimo, sa pagtan-aw niadtong naglibot kanako uban sa dugang pa nga pasalamat, sa pagbaton pa og usa ka mapasalamatong kasingkasing, ug sa paghinumdom sa mga pulong sa Iyang Anak: “Ako mianhi aron sila makabaton og kinabuhi, ug sa pagpakabaton niini sa madagayaon gay[o]d” (Juan 10:10).