Mga Templo, ang Ngalan sa Simbahan, ug Paglakip sa Uban

Minahal nga mga Ginikanan,

Niini nga isyu kamo makakat-on mahitungod sa paggamit sa husto nga ngalan sa Simbahan, sa kaimportante sa mga templo, ug lakip sa uban. Kamo makagamit niini nga mga artikulo ug sa mga ideya sa ubos sa pagsugod og mga panag-istoryahanay uban sa inyong pamilya mahitungod sa mga butang nga atong mabuhat aron mouswag subay sa dalan sa pakigsaad.

Mga Panaghisgotan sa Ebanghelyo

Sa Ingon Ang Akong Simbahan Pagatawgon

Si Presidente Henry B. Eyring nagsulti mahitungod kon nganong kita mogamit sa tibuok nga ngalan sa Simbahan ug unsa nga mga panalangin ang atong madawat pinaagi sa pagbuhat sa mao (tan-awa sa pahina 6). Makabasa kamo niini nga artikulo isip usa ka pamilya ug makahisgot kon sa unsang paagi ang paggamit sa tibuok nga ngalan sa Simbahan usa ka paagi sa pagpakigbahin sa atong pagpamatuod.

Ang Templo

Gamita ang mga artikulo sa mga pahina 10–17 ug ang mga istorya diha sa Higala nga magasin sa pagtabang sa imong pamilya sa pagkat-on mahitungod sa templo. Hunahunaa ang pagpangutana sa inyong mga anak kon unsay kahulugan sa templo ngadto kanila. Gamita ang mga kapanguhaan sa Simbahan sa pagtabang kaninyo pagtubag sa bisan unsa nga mga pangutana nga sila aduna mahitungod sa templo.

Paglakip

Kon kamo adunay mas magulang nga mga anak kinsa nakasinati og pagkaibog sa sama og sekso o adunay mga higala kinsa nakasinati sa ingon, pagdungan og basa sa artikulo sa pahina 20. Dayon paghisgot kon sa unsang paagi kamo makatabang sa inyong mga anak o sa ilang mga higala sa pagbati nga mas nalakip ug unsaon ninyo sa pagpakigbahin sa gugma sa Dios alang kanila.

Dali, Sunod Kanako Mga Panabot

Tan-awa sa mga pahina 26–29.

Dali, Sunod Kanako Kalingawan sa Pamilya

Ang Gibug-aton sa Kalisdanan

Doktrina ug mga Pakigsaad 122:5–9

Pagpundok og bug-at nga mga butang, sama sa dagkong mga bato o dagkong mga libro.
Palingkora ang tanan nga mag-alirong.
Pagpakita og hulagway ni Joseph Smith sa Bilanggoan sa Liberty.
Basaha ang Doktrina ug mga Pakigsaad 122:5–7.
Alang sa matag kalisdanan nga gihisgotan niini nga mga bersikulo, pagbutang og bato diha taliwala sa nag-alirong.
Padugangi sa matag sakop sa pamilya og usa pa ka dakong bato ngadto sa pundok sa pagrepresentar og usa ka pagsulay nga ilang nasinati.
Basaha ang Doktrina ug mga Pakigsaad 122:8–9.
Kinsa ang mibati sa kasakit sa tanan niini nga mga pagsulay? Hunahunaa kon unsa ang bation sa pagpas-an niining tanan.

Panaghisgotan: Sa unsang paagi ang Ginoo nagsabot kanato, nagtabang kanato, ug naghimo sa atong mga pagsulay ngadto sa mga kasinatian nga “alang sa [atong] kaayohan”? (Doktrina ug mga Pakigsaad 122:7).

Kapasilongan Gikan sa Unos

Doktrina ug mga Pakigsaad 115

Sulayi kini nga kalihokan sa pagtudlo kon sa unsang paagi ang panagpundok isip mga Santos sa Ulahing mga Adlaw naghatag kanato og kalig-on ug proteksyon.

Pagdungan og basa sa Doktrina ug mga Pakigsaad 115:6: “Ang panagpundok sa yuta sa Zion, ug diha sa iyang mga istaka [stake], alang sa usa ka panalipod, ug alang sa usa ka dangpanan gikan sa unos, ug gikan sa kaligutg[o]t sa diha nga kini ibu-bu nga walay pagkuto diha sa tibuok yuta.”
Pagpaligid og hugpong sa dice o pahunahunaa ang usa ka sakop sa pamilya og numero tali sa 1 ug 10.
Kon ang numero puwaki, paghingalan og butang nga makapanalipod kaninyo gikan sa pisikal nga unos (sama pananglit: payong, kupo, balay).
Kon ang numero pares, paghingalan og butang nga mopanalipod kaninyo gikan sa usa ka espirituhanon nga unos (sama pananglit: mga kasulatan, pag-ampo, pagkamasulundon, atong mga pamilya).
Pagpuli-puli sa paghunahuna og mga tubag.
Kon ikaw adunay mas magulang nga mga anak, mahimo ka nga makahisgot sa kahulogan sa Zion gikan sa Giya ngadto sa mga Kasulatan: “Putli og kasingkasing” (Doktrina ug mga Pakigsaad 97:21). Sa unsang paagi ang pakigpundok uban sa mga putli og kasingkasing nagpanalipod kanato?

Panaghisgotan: Unsa ang pipila ka pisikal ug espirituhanong mga unos nga atong gisinati? Unsaon nato nga magkapundok diha ni Kristo? Unsaon nato “[pag]tindog ug [mag]pakita [sa] kahayag”? (Doktrina ug mga Pakigsaad 115:5).

Gikan sa Alang sa Kalig-on sa mga Kabatan-onan Magasin

Naggamit sa Himan sa Misyonaryo alang sa Referral

Basaha kini nga artikulo isip pamilya ug paghisgot kon unsaon sa matag tawo nga makagamit niini nga himan sa paghimo sa misyonaryo nga buhat nga mas sayon. Susiha kon unsa nga impormasyon ang ilang gikinahanglan sa pagpaila-ila sa usa ka tawo ngadto sa mga misyonaryo. Kamo makatabang kanila sa pagbuhat niana, o kon sila adunay ilang kaugalingong mga kagamitan, ipakita kanila unsaon paggamit sa himan alang sa ilang mga kaugalingon.

Pagpangandam alang sa Inyong Pagtuga

Kon kamo adunay mga anak kinsa nag-andam sa pagdawat sa ilang pagtuga, basaha kini nga artikulo uban kanila. Paghisgot sa bisan unsa nga mga pangutana nga sila aduna.

Mga Panalangin sa Paggamit sa Husto nga Ngalan sa Simbahan

Paghisgot uban sa inyong mga anak kon unsa ang husto nga ngalan sa Simbahan ug nganong ato kining gamiton. Basaha kini nga artikulo ni Elder Ulisses Soares ug gamita ang mga ideya sa paggiya sa inyong panaghisgotanay ug sa pagtabang sa inyong mga anak sa pag-ila sa mga panalangin sa paggamit sa husto nga ngalan sa Simbahan.

Lig-ong Nagtubo sa Ireland

Ikaw nagpuyo ba diin walay daghan kaayo nga mga miyembro? Basaha ang istorya ni Evan isip usa ka pamilya mahitungod kon sa unsang paagi gibarogan niya ang iyang mga gituohan isip usa sa bugtong nga mga miyembro sa Simbahan diha sa iyang eskwelahan. Pangutan-a ang imong mga anak kon unsaon nila sa paghimo og maayong mga pagpili ug sa pagbarog alang sa kamatuoran bisan kon sila nagbarog nga nag-inusara.

Gikan sa Higala Magasin

Tanan mahitungod sa mga Templo

Pagkat-on mahitungod sa unang biyahe ni Elena ngadto sa templo, ang kahinam ni Ajan nga makakuha og rekomend sa templo, ug ang sakripisyo ni Margaret sa pagtambong sa templo sa New Zealand.

Gamita ang “Akong Istorya” nga pahina sa journal sa pagtabang sa inyong mga anak nga maghunahuna kon pila ka mga tuig, mga bulan, ug mga adlaw sila aduna hangtod sila makakuha sa ilang rekomend sa templo.

Paghigugma ug Pagdawat sa Uban

Si Angie dili gusto sa bag-ong batang lalaki sa iyang klase hangtod siya nakahibalo og dugang mahitungod kaniya. Gamita kini nga istorya sa pagtudlo sa inyong mga anak mahitungod sa paghigugma sa uban kay sa maghukom kanila.

Dali, Sunod Kanako alang sa Gagmay nga mga Bata

Pangita og sinemana nga gibase sa kasulatan nga mga kalihokan ug ubang makatabang nga mga kapanguhaan alang sa pagtudlo sa mas gagmay nga mga bata diha sa seksyon sa Alang sa Gagmay nga mga Higala.

Apostoles sa tibuok Kalibotan

Pagkat-on mahitungod sa pagbisita ni Elder Dale G. Renlund ngadto sa mga miyembro sa Simbahan sa Caribbean.