Unsay Kahulugan sa Templo ngari Kanako
Ang tagsulat nagpuyo sa Tasmania, Australia.
Ang pagbaton og magamit [current] nga rekomend sa templo nagtabang sa pagsiguro nga ang akong kadasig sa pagpuyo sa ebanghelyo ni Jesukristo nagpabilin nga bag-o.
Templo sa Melbourne Australia
Wala: gilitratohan ni Karen Larsen
Ang akong bana ug ako nagpuyo sa Tasmania, ang isla nga estado habagatan sa kinadak-ang yuta sa Australia. Ang among “lokal” nga templo mao ang Templo sa Melbourne Australia, mga 480 ka kilometro ang gilay-on.
Kami swerte nga nakatambong sa Templo sa Melbourne sa Nobyembre 2019 sulod sa pipila ka mga adlaw. Kami wala makaamgo nga kini ang among kataposang biyahe sulod sa usa ka mahinungdanong gidugayon. Sa wala pa ang pandemya ang akong bana ug ako motambong sa templo bisan asa tali sa usa ug sa upat ka higayon sa usa ka tuig. Aron makaabot didto kami mahimong mag-eroplano o maglantsa. Sa pipila ka tuig nga malisod ang panalapi, mao nga minos na kaayo kami nga mibiyahe. Ang pipila niadto nga mga biyahe makapauli dayon og balik; ang uban milungtad og pipila ka mga adlaw.
Ako usa ka ordinance worker sa templo, busa kadtong pipila ka adlaw nga mitambong ako sa templo usa ka bililhong oportunidad sa pakigtakdo sa akong calling, sa pagkat-on og dugang pa mahitungod sa plano sa Langitnong Amahan, ug sa pagserbisyo sa uban ug pagtabang kanila sa pagsinati og hingpit nga kalipay diha sa templo.
Sa dihang ang templo ug ang among mga utlanan sa estado gisirad-an atol sa COVID-19 nga pandemya, naghunahuna ako kon unsaon nako pagpabilin sa templo isip usa ka makahuluganong bahin sa akong kinabuhi. Akong gibati nga nalig-on pinaagi sa mga pagbati sa Espiritu Santo nga bisan og ang templo gisirhan, ang mga panalangin sa akong mga pakigsaad sa templo dili sinirhan ngari kanako. Mibati ako og dugang nga kaduol ngadto sa Ginoo, ilabi na kon ako mopunting sa pagserbisyo sa uban, bisan sa akong pamilya o kadtong akong gipangalagaran.
Migahin ako og oras sa pagribyo diha sa akong hunahuna sa mga pakigsaad nga akong gihimo, sa mga pagbati nga akong nasinati didto sa templo, ug sa kahibalo nga akong naangkon. Akong giribyo sa akong hunahuna ang mga pulong sa mga ordinansa. Mipadayon ako sa pagsiksik sa akong family history, pagsulod sa mga ngalan ug mga kapanguhaan ngadto sa FamilySearch, ug sa pagpakigbahin niadtong mga ngalan ngadto sa templo. Nagpaabot ako sa pagtan-aw sa lista sa gipakigbahin nga mga ngalan nga magsugod sa pagka-kompleto kon moabli pag-usab ang mga templo.
Sa milabay nga mga tuig usa ka minahal nga sister sa among ward mipakigbahin kanako nga tungod kay ang usa ka sesyon sa pagtuga mikabat og mga tingali duha ka oras ug tungod kay siya nagpuyo layo kaayo gikan sa templo, siya nakahukom sa pagpasalig og labing minos sa duha ka oras sa usa ka semana ngadto sa buhat sa family history. Gusto niya nga ipakita sa Ginoo nga siya mipasalig sa buhat sa templo, bisan tuod kini malisod alang kaniya sa pag-adto sa templo. Ang iyang tumong sa tinuod mitandog kanako, busa naghimo ako og samang tumong alang sa akong kaugalingon.
Ang Oktubre 2020 nga kinatibuk-ang komperensiya nga pakigpulong ni Elder Ronald A. Rasband sa Korum sa Napulog Duha ka Apostoles mipahinumdom kanako nianang dugay nang gihuptan nga katuyoan. Siya miingon: “Naghimo kita og buhat sa templo kon mosiksik kita sa atong mga katigulangan ug mosumiter sa ilang mga ngalan alang sa mga ordinansa. Samtang ang atong mga templo gisirad-an, makahimo pa gihapon kita sa pagsiksik sa atong mga pamilya. Uban sa Espiritu sa Dios diha sa atong mga kasingkasing, kita, pinaagi sa pagpuli [proxy], nagbarog alang kanila nga mahimong ‘girekomendar ngadto sa Ginoo.’”1
Ang ika-20 nga anibersaryo sa pagpahinungod sa Templo sa Melbourne nahitabo sa 2020, nagdala uban niini og daghan kaayong mga malumong handumanan sa mga panalangin nga nadawat sa among pamilya sa pagtambong niini ug sa ubang mga templo sukad nianang pagpahinungod sa 2000. Ang templo nahimong pundasyon sa kalig-on ug pagpamatuod sa among pamilya. Uban sa among upat ka mga anak, kami nakatambong og pipila ka mga templo sa tibuok kinadak-ang yuta sa Australia sa pagtan-aw sa among mga anak nga nagpahigayon og mga bunyag, nagdawat sa ilang mga pagtuga ug, mabugkos ngadto sa ilang mga kapikas.
Si Brother ug Sister Prebble uban sa ilang mga anak ug sa ilang mga kapikas diha sa Templo sa Sydney Australia alang sa pagselyo sa ilang kamanghurang anak nga babaye.
Ibabaw: gilitratohan ni Sally Crosbie
Ang pagbaton og magamit [current] nga rekomend sa templo nagtabang sa pagsiguro nga ang akong kadasig sa pagpuyo sa ebanghelyo ni Jesukristo nagpabilin nga bag-o. Ang akong mga interbyu sa pagbag-o sa rekomend mga higayon sa pagpamalandong. Sila naghatag kanako og oportunidad sa pagpahayag sa akong pagpamatuod. Sila nagtugot kanako sa paglig-on sa akong konbiksyon nga magpabilin nga tinuod ug matinud-anon ngadto sa “pinilo-pilo nga mga panalangin” (Doktrina ug mga Pakigsaad 104:2) nga gisaad sa Ginoo nga ako ug ang akong pamilya nakadawat ug nalig-on.
Ang pagbaton og magamit nga rekomend sa templo mao ang mahitungod sa akong hugot nga pagtuo, sa akong pasalig ngadto sa ebanghelyo ni Jesukristo, sa akong hingpit nga kalipay, sa akong paglaom, sa akong pasalamat, sa akong pagkamasulundon, ug sa akong gugma alang sa akong Manluluwas nga si Jesukristo ug sa akong Langitnong Amahan.