Mga Anghel diha sa Templo
Nabalaka ako nga ang akong nerbyoso nga kahimtang makatugaw sa uban diha sa templo—hangtod nadungog ko ang makahupay nga mga pulong sa usa ka magtiayon.
Litrato sa Templo sa Washington D.C.ni Candace Read
Ang templo mao ang labing malinawon ug hilom nga dapit dinhi sa yuta, husto? Hinoon, tingali dili alang sa usa ka tawo sama kanako nga may Tourette nga syndrome. Kining neurological nga kahimtang nakapahimo kanako og walay puas nga mga paglihok ug paglangas nga kontra sa akong kabubut-on. Ang akong Tourette makahimo sa mga tawo nga dili komportable kon ako anaa duol kanila sa usa ka hilom nga dapit.
Usa ka adlaw atol sa sesyon sa pagtuga didto sa Washington D.C. Temple, nabalaka ako nga tingali og ako makasamok o makapalinga sa uban. Kini nagkinahanglan sa akong tanan nga pagtutok sa pagkontrolar sa akong pangurog, nga nagpugong kanako sa paghunahuna og maayo sa bisan unsa pa. Busa, samtang ako naningkamot sa pagtutok diha sa endowment, imposible kaayo alang kanako sa pagkontrolar og hingpit sa akong pangurog, bisan og naningkamot ako pag-ayo. Nanlimbasog ako labaw kay sa kasagaran atol sa sesyon.
Pagkahuman, sa dihang mibiya na ako sa celestial nga lawak, nakadungog ako og makahupay nga tingog sa akong luyo nga nag-ingon, “Palihog balik. Palihog padayon sa kanunay nga pag-anhi sa templo.”
Ang tingog miabot gikan sa usa ka magtiayon nga nakakita kanako nga nanlimbasog. Sila gusto nga mopasalig kanako nga ako kanunay nga abi-abihon sa templo walay pagsapayan kon unsa nga mga kalangas o mga paglihok akong mabuhat. Ang ilang mga pulong nagpabati kanako nga ako abi-abihon ug gikinahanglan didto sama ni bisan kinsa.
Samtang sila migakos kanako, ang Espiritu Santo mipanalangin kanako og kalinaw ug hingpit nga kalipay. Ang Dios mipadala kanako ug malumong kalooy pinaagi niadtong duha ka mga anghel, kinsa mihupay kanako ug mipakita kanako nga Siya nagpakabana. Tungod kanila, gibati nako ang malinawon, ligdong, hilom nga pagbati nga ako naglaom nga bation diha sa templo nianang adlawa.
“Dili tanan nga mga anghel gikan sa pikas nga bahin sa tabil,” miingon si Elder Jeffrey R. Holland sa Korum sa Napulog Duha ka Apostoles. “Ang uban kanila nakauban ug nakaistorya nato—dinhi, karon, matag adlaw.”1
Kitang tanan mahimong mga anghel ngadto niadtong naglibot kanato samtang atong ipaabot ang “gugma ug pagpakabana alang sa mga anak sa [Dios].”2