Buhat sa Templo Nagpanalangin sa Tanan, Buhi ug Patay
Ang tagsulat nagpuyo sa Gauteng, South Africa.
Sa 2018, mihimo ako og tumong nga makadawat og rekomend sa templo. Usa ka tuig ang milabay, ang akong nobya ug ako naselyo didto sa templo alang sa tanang kahangtoran.
Templo sa Johannesburg South Africa
Wala: gilitratohan ni Fernando Bragança
Sa dihang gipahibalo ang mga pagbisita sa templo alang sa akong branch, mitambong ako. Bisan og dili pa ako makasulod sa templo, kanunay ako nga naglakaw-lakaw sa mga nataran sa templo. Nag-ampo ako sa Langitnong Amahan nga nagpahayag sa akong labing dakong mga tinguha nga usa ka adlaw makasulod sa templo. Ang pipila niining mga pagbisita 10 minutos lamang , apan kini adunay lawom nga epekto sa akong espiritu.
Usa ka ilabing kabugnaw ug ulanon nga gabii, naulahi ako sa pag-abot sa templo. Bisan tuod ang mga nataran sirado, ang mga bantay sa templo mitugot kanako og pipila ka mga gutlo diha sa nataran. Diha kanako ang usa ka kopya sa pag-ampo sa pagpahinungod sa templo. Nakadayeg ako sa pagbasa niini.
Napuno ako sa pagbati samtang nagbasa ako sa mga pulong: “Dili ba Ikaw mohunghong og kalinaw sa Imong mga katawhan pinaagi sa gahom sa Imong Espiritu kon sila moanhi dinhi uban sa magul-anong mga kasingkasing sa pagtinguha og direksyon sa ilang mga suliran. Dili ba Ikaw mohupay ug mosangga kanila kon sila moanhi sa mga panahon sa kasubo. Dili ba Ikaw mohatag kanila og kaisog, direksyon, ug hugot nga pagtuo, kon sila magpundok, sama sa usa ka dangpanan, gikan sa kagubot sa kalibotan. Dili ba Ikaw mopasalig pag-usab kanila sa Imong katinuod ug kabalaan, ug sa katinuod og kabalaan sa Imong nabanhaw nga Anak.”1
Nasayod dayon ako nga ang akong mga pagbisita sa nataran sa templo nagkahulugan og usa ka butang ngadto sa Ginoo, bisan tuod wala ako sa sulod sa templo.
Akong Tumong sa Pagtambong
Ang akong tinguha sa pagtambong sa templo misugod sa usa ka buntag sa Disyembre 2018. Naglingkod ako sa katre nagbasa sa Abril 1999 nga kinatibuk-ang komperensiya nga pakigpulong ni Elder Richard G. Scott (1928–2015) sa Korum sa Napulog Duha ka Apostoles. Namulong siya mahitungod sa importansya sa pagkahimong takos sa pagsulod sa templo. Miingon siya ang templo “usa ka dapit sa kalinaw, pag-inusara, ug pagdasig. Ang kanunay nga pagtambong makapalambo sa imong kinabuhi uban sa dakong katuyoan.” Mipadayon siya sa pagdugang niining makapadani kaayo nga pahayag: “Adto sa templo. Kamo nasayod nga kini mao ang matarung nga butang nga buhaton. Buhata kini karon.”2
Akong gihatagan og gibug-aton kini nga tudling, gitan-aw ang akong 2019 nga kalendaryo sa kalihokan sa stake, ug nakita nga ang akong branch naka-eskedyul sa pagbisita sa Johannesburg South Africa Temple matag ikaduha nga Biyernes sa bulan. Mihimo ako og tumong nga moadto sa mga nataran sa templo sa dili mominos og kausa matag bulan uban sa akong branch o sa akong kaugalingon, bisan tuod ako wala pay rekomend sa templo.
Takos sa Pagsulod
Sayo sa Enero, nakig-istorya ako sa akong presidente sa branch mahitungod sa pagdawat og rekomend ug sa kataposan pagsulod sa templo. Naghinam-hinam ako sa pagkab-ot niini nga tumong.
Sa Agosto, ako nakaangkon og rekomend nga adunay limitasyon ang paggamit ug nakabisita sa bunyaganan uban sa mga kabatan-onan sa akong branch. Nabunyagan ako alang sa akong duha ka mga uyoan ug apohang lalaki nga amahan sa akong inahan. Misugod usab ako sa pagtambong og klase sa pagpangandam sa templo agi og pagpaabot sa pagdawat sa akong pagtuga. Hangtod niana ako mipadayon sa pagbisita sa templo ug pag-apil sa mga bunyag.
Sa kataposan, niadtong Nobyembre 2, 2019, ako misulod sa templo uban sa akong nobya, ug nanggawas kami isip bana ug asawa, naghiusa nga giselyo alang sa karon ug sa kahangtoran. Ang mga pulong dili makapahayag sa espiritu nga gibati niining talagsaong okasyon. Ang akong asawa ug ako mipadayon sa pagtambong sa templo. Kami adunay daghang bililhon ug sagrado nga mga kasinatian kutob sa tibuok kalibotan nga pagsira sa templo sa 2020 tungod sa COVID-19.
Sister ug Brother Mncwabe (tunga) sa adlaw sa ilang pagselyo, uban sa mga sakop sa pamilya.
Ibabaw: Litrato pinaagi sa maayong kabubut-on sa pamilyang Mncwabe
Ang Templo alang sa Tanan
Ang igsoong babaye sa akong inahan dili miyembro sa Simbahan, apan siya mianha sa templo alang sa among pagselyo. Pagkahuman, siya mipakigbahin og kasinatian nga siya aduna human sa pagbisita sa mga nataran sa templo. Siya nagdamgo nga siya didto na usab sa templo alang sa among pagselyo, apan niini nga panahon ang tanang sakop sa akong pamilya (lakip niadtong akong gipahigayon ang mga bunyag alang kanila) uban kanamo. “Ang imong inahan didto usab,” miingon siya, “apan siya kanunay nga nag-ingon, ‘wala ako makakita sa akong anak nga lalaki. Nganong dili ako makakita sa akong anak nga lalaki?’”
Mibakho ako human sa pagkadungog niini, ug nahibalo ako nganong ang akong inahan dili makakita kanako. Siya namatay niadtong 2002, ug ako naglangay-langay sa iyang mga ordinansa nga ipabuhat alang kaniya didto sa templo. Mihukom ako sa pagbuhat niini sa labing dali nga mahimo. Sa wala madugay ako may pribilehiyo sa pagpahigayon sa iyang bunyag ug sa pagsulti sa iyang tibuok nga ngalan samtang ako nagbunyag sa batan-ong babaye kinsa nagbarog isip puli [proxy] alang sa akong inahan.
Ako adunay lig-on nga pagpamatuod nga ang templo mao ang balay sa Dios. Atong magamit ang Iyang gahom kon kita anaa didto. Ako usab nasayod nga ang templo nagtanyag og mga panalangin ngadto sa tanang mga anak sa Dios, buhi o patay.