“Sa Ingon ang Akong Simbahan Pagatawgon”
Ni Presidente Henry B. Eyring
Ikaduhang Magtatambag sa Unang Kapangulohan
Kon atong gamiton ang tibuok ngalan sa Simbahan, kita mapanalanginan ug kita nagpanalangin sa uban.
Sa Africa, ang mga indibidwal nga nangita og simbahan nga kaapilan mireport nga nagdamgo. Diha sa ilang mga damgo, gitudloan sila sa pagpangita alang sa usa ka simbahan nga gitawag pinaagi sa ngalan ni Jesukristo. Sa ilang pagpangita, sila nakakita og usa lamang ka simbahan diin ang ngalan sa Manluluwas mao ang labing mahinungdanon—Ang Simbahan ni Jesukristo sa mga Santos sa Ulahing mga Adlaw.
Sa Latin America, pipila ka Santos sa Ulahing mga Adlaw mireport nga ang ilang mga pagdapit sa mga higala sa pagtambong sa “Simbahan sa Mormon” wala nagmalamposon. Kana nausab sa dihang sila mihatag og pagdapit ngadto sa Ang Simbahan ni Jesukristo sa mga Santos sa Ulahing mga Adlaw. “Kon ang inyong simbahan gitawag og ang Simbahan ni Jesukristo,” mitubag ang ilang mga higala, “gusto namo nga moadto ug motan-aw.”
Sa Estados Unidos, usa ka Primary nga batang lalaki midapit sa iyang mga silingan sa iyang bunyag. Usa ka ministro sa laing tinuohan miingon nga siya dili gayod unta moadto sa usa ka bunyag diha sa “Simbahan sa Mormon”. Apan tungod kay nakaila siya nga ang simbahan sa batang lalaki nagpunting diha ni Jesukristo, ang ministro mitambong uban sa iyang asawa.
Sa dihang usa ka ahente sa pagreserba og ticket sa airline nangayo sa usa ka miyembro sa Simbahan alang sa email address, ang miyembro mitubag, “ldschurch.org.”
“Unsa kana nga simbahan?” nangutana ang ahente.
“Ang Simbahan ni Jesukristo sa mga Santos sa Ulahing mga Adlaw,” ang miyembro mitubag.
“Nagtrabaho ako sulod sa daghang mga adlaw sa usa ka higayon nga wala sukad makahimo sa pagsulti mahitungod sa Ginoo,” miingon ang ahente. “Ang pagkasayod nga ako nakigsulti ngadto sa laing Kristiyano naghimo lamang sa akong adlaw nga malipayon.”
Ang miyembro sa Simbahan dali nga mibag-o sa iyang airline profile uban sa bag-o nga email address sa Simbahan: ChurchofJesusChrist.org.1
Usa ka Saad Natuman
Kining talagsaong mga istorya nagrepresentar sa katumanan sa usa ka saad nga gihimo ni Presidente Russell M. Nelson ngadto sa mga Santos sa Ulahing mga Adlaw niadtong Oktubre 2018 ug pag-usab niadtong Abril 2020.
“Mosaad ko kaninyo nga kon kita mobuhat sa atong labing maayo sa pagpahiuli sa hustong ngalan sa Simbahan sa Ginoo, Siya kansang Simbahan mao kini mobu-bu sa Iyang gah[o]m ug mga panalangin diha sa mga ulo sa mga Santos sa Ulahing mga Adlaw, sa mga paagi nga wala nato makita sukad,” miingon si Presidente Nelson. “Makabaton kita sa kahibalo ug gah[o]m sa Dios aron matabangan kita sa pagdala sa mga panalangin sa gipahiuli nga ebanghelyo ni Jesukristo ngadto sa matag nasud, kaliwatan, pinulongan, ug katawhan ug sa pag-andam sa kalib[o]tan alang sa Ikaduhang Pag-anhi sa Ginoo.”2
Bag-ohay lamang, pinaagi sa akong account sa social media, akong gidapit ang mga miyembro sa Simbahan sa pagsulti kanako mahitungod sa mga panalangin nga ilang nadawat gikan sa paggamit sa hustong ngalan sa Simbahan. Natandog ako sa pagdawat og labaw pa kay sa 2,600 nga mga tubag.
Gusto nakong ipakigbahin ang pipila niini nganha kaninyo. Kini ingon og pamilyar tungod kay inyong nadawat ang susama nga mga panalangin samtang kamo nagsunod sa tambag ni Presidente Nelson.
Mas napaduol ngadto ni Jesukristo
Natandog ako sa pagpamatuod ni Jacob kon sa unsang paagi ang tibuok ngalan sa Simbahan nagtabang kaniya nga makatutok diha sa Manluluwas: “Akong namatikdan nga ang akong paghatag og importansya ni Jesukristo mituhop ngadto sa matag aspeto sa akong kinabuhi,” mipakigbahin siya kanako. “Kon ako nag-ambit sa sakramento, naghunahuna ako Kaniya ug sa Iyang maulaong sakripisyo. Kon nagbasa ako sa mga kasulatan, naghatag ako og dugang nga pagtagad sa Iyang mga pulong ug sa ubang mga pakisayran ngadto Kaniya. Kini mas nagpaduol kanako ngadto Kaniya ug nagtabang kanako nga mas masabtan ang Iyang tahas isip akong Manluluwas ug Manunubos.”
Ako mibati nga napanalanginan sa pagkahibalo kon unsa ang kahulogan sa ngalan sa Manluluwas ngadto ni Beth ug Bryce: “Ako mibati og mas duol nga koneksyon ngadto sa akong Manluluwas,” miingon si Beth. “Kon ako pangutan-on unsa nga simbahan ako moadto, ug motubag nga ako sakop sa Ang Simbahan ni Jesukristo sa mga Santos sa Ulahing mga Adlaw, akong bation ang usa ka tinuod nga pagbati sa pagkanahisakop. Ako Nasakop sa Iyang mga katawhan. Ako nasakop sa Iyang pamilya. “Ako nasakop Kaniya.”
Si Bryce misulti kanako nga ang husto nga ngalan sa Simbahan nagtabang kaniya sa “paghinumdom kinsa ang akong gialagaran ug kang kinsa ako maninguha nga mahimong mas mahisama. Nagpahinumdom kini kanako nga ang Manluluwas mao ang usa kinsa naghatag niini nga mga pagtulun-an ug nga kini dili gikan sa mga tawo.”
“Ang Ngalan sa Manluluwas Adunay Gahom”
Si Haley, usa ka full-time nga misyonaryo, miingon: “Ang paggamit sa hustong ngalan sa Simbahan sa Ginoo nagdala og dugang gahom ug awtoridad kon kami magtudlo sa uban sa Iyang gipahiuli nga ebanghelyo. Sa dihang ako nag-ingon ‘Ang Simbahan ni Jesukristo sa mga Santos sa Ulahing mga Adlaw,’ ang Espiritu sa Ginoo nagpamatuod ug nagsaksi nga kini mao ang Simbahan sa Ginoo nga gipahiuli dinhi sa yuta karon. Ako gusto nga mogamit sa husto nga ngalan tungod kay ako nagdugang usab sa akong buhi nga saksi ngadto niana nga kamatuoran!”
Ug si Nicola misulti kanako: “Sa kaniadto, kon ako moingon nga ‘Mormon,’ kasagaran may anaa nianang kidlap sa kawalay kasiguroan niadtong dili sa atong tinuohan. Hapit nimo madunggan ang sunod-sunod nga paghandom sa tanan nga ilang nadungog sukad kabahin sa ‘mga Mormon.’ Apan karon adunay usa ka kalinaw, labing kasagaran ang pagdawat. Ang ngalan sa Manluluwas adunay gahom. Nagdala Siya og kalinaw. Ang akong pagpamatuod sa katinuod sa ebanghelyo nagtubo pinaagi lamang sa pagsulti sa hustong ngalan sa Simbahan. Akong bation ang Espiritu sa matag higayon nga ako nagsulti niini. Usahay kini lang ang akong masulti mahitungod sa unsay atong gituohan, apan kini igo ra.”
Paghatag og katin-awan sa Sayop nga mga Paghunahuna
Si Harold, usa ka propesor sa unibersidad sa Estados Unidos, miingon nga ang paggamit sa kompleto nga ngalan sa Simbahan nagtabang kaniya sa paghatag og katin-awan sa sayop nga mga paghunahuna. Siya misulti kanako nga usa ka estudyante, nagsulay sa pag-summarize og usa ka panaghisgot kabahin sa relihiyon, mipahayag, “Sa akong hunahuna ang tanang mga relihiyon mga Kristiyano, gawas sa mga Mormon.”
Nakakita og maayo kaayo nga higayon sa paghatag og katin-awan nianang sayop nga paghunahuna, si Harold miingon, “Akong gisultihan ang mga estudyante nga ang ‘Mormon’ angga nga gihatag ngadto sa mga miyembro sa Simbahan tungod sa atong pagtuo sa Biblia ug sa Basahon ni Mormon isip duha ka karaang kasulatan nga mga saksi kabahin ni Jesukristo.”
Si Mary mipadayag sa iyang gibati ngari kanako, nagpakigbahin kon sa unsang paagi ang tibuok ngalan sa Simbahan nagpanalangin kaniya sa pagtudlo sa iyang mga anak: “Ang akong mga anak minos na og kalibog karon sa dihang ako nagtudlo kanila nga kita mga Santos sa Simbahan ni Jesukristo niining ulahing mga adlaw batok sa pagtawag sa atong mga kaugalingon isip mga ‘Mormon.’ Kaniadto sila maglibog ug mangutana, ‘Nganong Mormon? Kana ba nagpasabot nga kita dili mga Kristiyano?’ Gibati nako nga kini nga kausaban nagtabang kanila kon makig-istorya ngadto sa ubang mga bata sa eskwelahan kinsa dili mga tumutuo.”
“Usa Ako ka Misyonaryo alang ni Jesukristo”
Si Presidente Nelson misaad nga samtang kita naggamit sa husto nga ngalan sa Simbahan, “kita makabaton sa kahibalo ug gah[o]m sa Dios” sa pagsangyaw sa ebanghelyo. Nadasig ako sa istorya ni Teresa mahitungod sa unsay nahitabo sa dihang usa ka higala sa trabahoan nangutana kaniya mahitungod sa Simbahan. Nagsunod sa tambag ni Presidente Nelson, si Teresa misugod pinaagi sa pagpakigbahin sa tibuok ngalan sa Simbahan.
“Siya interesado sa Simbahan,” miingon siya kanako. “Nagsukit-sukit siya niini sulod sa pipila ka mga bulan ug dayon, sa milagrosong paagi, siya gibunyagan sa akong anak nga lalaki, ang bishop. Akong gibati ang hilabihang kalipay nianang adlawa, ug akong pamilya usab. Ang mga saad tinuod.”
Miingon si Jordan nga daghan gihapon nga mga tawo ang wala masinati sa ngalan sa Simbahan. “Ang paggamit sa tibuok ngalan sa Simbahan,” miingon siya, “naghatag kanako og higayon sa pagpasab[o]t kon sa unsang paagi ang Simbahan nagpunting diha ni Jesukristo ug nganong kita nagtawag sa atong mga kaugalingon isip mga Santos sa Ulahing mga Adlaw.”
Sa dihang ang usa ka lalaki nangutana ni Chloe kon siya usa ba ka “Mormon nga misyonaryo,” gamhanan siyang mipamatuod, “Dili, ako usa ka misyonaryo alang ni Jesukristo.” Gisultihan ko ni Chloe nga ang lalaki mipahayag og mga tinguha sa pagsunod sa Manluluwas, busa siya [si Chloe] mitudlo kaniya nga Ang Simbahan ni Jesukristo sa mga Santos sa Ulahing mga Adlaw gipangulohan sa Manluluwas. Dayon siya [si Chloe] mihatag kaniya og impormasyon mahitungod sa Iyang Simbahan.
“Motawag sa Simbahan sa Akong Ngalan”
Sa pagpadayag sa ngalan sa Iyang Simbahan ngadto ni Propeta Joseph Smith, ang Manluluwas mipadayag, “Kay sa ingon ang akong simbahan pagatawgon sa katap[o]san nga mga adlaw, gani Ang Simbahan ni Jesukristo sa mga Santos sa Ulahing mga Adlaw” (Doktrina ug mga Pakigsaad 115:4). Ug ngadto sa mga Nephite, siya miingon, “Kamo motawag sa simbahan sa akong ngalan,” kay “unsaon kining akong simbahan kon kini dili pagatawgon sa akong ngalan?” (3 Nephi 27:7, 8).
Ako mopamatuod kauban sa usa ka Santos sa Ulahing mga Adlaw nga ginganlan og Tommie nga kon kita mogamit sa tibuok ngalan sa Simbahan, kita mapanalanginan ug kita nagpanalangin sa uban. Si Tommie misulti kanako, “Samtang ako nagpakigbahin ngadto sa uban sa mga panalangin sa pagkamiyembro sa Ang Simbahan ni Jesukristo sa mga Santos sa Ulahing mga Adlaw sa panahon nga ang panagbangi ug kahadlok nagpatigbabaw, nakaamgo ako nga nagtabang ako sa uban nga mahibalo nga adunay dangpanan gikan sa unos uban sa mga disipulo ni Jesukristo, kinsa nag-amuma kanila ug kinsa nagsunod Kaniya.”