Pagpaila sa Templo ngadto sa Atong mga Higala

Ni Myriam Vega

Ang tagsulat nagpuyo sa Quebec, Canada.

Akong gibati ang hilabihan nga kalipay sa dihang duha sa akong mga higala mitambong sa open house sa templo uban kanako.

Sa dihang ang sa Montreal Quebec Temple gipahinungod pag-usab human sa dako kaayo nga mga pagpabag-o kaniadtong 2015, ang open house gi-organisar sa among lokal nga mga lider. Kini mao ang tukma nga panahon sa pagdapit sa mga higala sa pag-anha ug pagtan-aw sa templo.

Naghunahuna dayon ako sa duha ka mga higala sa kolehiyo kinsa nangutana na kanako mahitungod sa Simbahan ug sa akong mga pagtuo. Kaniadto, silang duha miuyon sa pagtambong sa miting sa sakramento sa panahon sa Pasko. Ako usab silang gidapit sa akong kasal duha ka tuig ang milabay. Kadto unta usa ka oportunidad sa pagpasabot kanila kon nganong sila makahimo sa pagtambong sa salo-salo apan dili sa seremonya sa pagselyo diha sa templo.¹

Sa gihapon, bisan tuod ako nakigsulti na kanila mahitungod sa Simbahan sa kaniadto, nagpanuko ako sa pagdapit kanila. Nahadlok ako nga maanaa sa usa ka dili komportable nga sitwasyon kon sila mobalibad. Sa kataposan, ako nakabaton og kaisog ug mihangyo kanila sa telepono: “Gusto ba ninyong motan-aw sa dapit diin ako gikasal? Ang templo abli ngadto sa publiko alang sa giniyahan nga mga pagtan-aw. Kon kana makapa-interes kaninyo, mahimo kitang magkuyog.”

Ang tubag sa duha ka mga sitwasyon mao ang usa ka dali nga “Oo! Gusto ko niana.”

Usa sa akong mga higala mianha kuyog sa iyang duha ka anak, ug ang lain mianha uban sa iyang kapikas. Kini usa ka dili makalimtan nga kasinatian alang kanako. Akong gibati ang hilabihan nga kalipay nga nakahimo sa pagpakigbahin sa akong gugma alang sa templo ngadto kanila.

Sa iyang Oktubre 2020 nga pakigpulong sa kinatibuk-ang komperensiya nga , “Girekomendar ngadto sa Ginoo,” si Elder Ronald A. Rasband sa Korum sa Napulog Duha ka Apostoles mipahinumdom kanato: “Sa gawas sa matag templo sa Simbahan mao ang ha[o]m nga mga pulong ‘Kabalaan ngadto sa Ginoo.’ Ang templo mao ang balay sa Ginoo ug dangpanan gikan sa kalibotan. Ang Iyang Espiritu molukop niadtong kinsa mosimba sa sulod nianang sagrado nga mga bongbong. Gitakda Niya ang mga sumbanan diin kita mosulod isip Iyang mga bisita.”²

Ang templo nagsilbe isip usa ka dangpanan gikan sa mga daotan sa kalibotan. Kon ako mahinumdom niana, akong masabtan kon ngano nga kadtong kinsa mosulod niini kinahanglan gayod magpuyo og kinabuhi nga nahiuyon sa mga pagtulun-an sa Ginoo ingon nga makaplagan diha sa Ang Simbahan ni Jesukristo sa mga Santos sa Ulahing mga Adlaw. Sa pagkatinuod, ang tanan gidapit sa pagsinati sa hingpit nga kalipay sa paghimo og sagradong mga pakigsaad uban sa Dios. Apan aron sa paghimo sa mao, kita kinahanglan gayod nga makakab-ot sa sumbanan nga Iyang gipahimutang aron makasarang alang sa usa ka rekomend. Kini anaa na sa matag usa kanato sa paghukom kon mosunod ba sa Iyang mga balaod.

Kon magpasabot kita ngadto sa atong mga higala sa kalainan tali sa usa ka templo ug sa meetinghouse, kita makasulti lamang kanila nga:

Ang templo mao ang balay sa Dios. Kini usa ka malinawon nga dapit diin ang matinud-anong mga miyembro sa Ang Simbahan ni Jesukristo sa mga Santos sa Ulahing mga Adlaw makahimo og sagrado nga mga saad ngadto sa Dios nga sila magpuyo sa ilang mga kinabuhi nga mahiuyon sa Iyang mga sugo. Usa kini ka dapit diin kita nagkat-on og dugang pa mahitungod sa atong katuyoan sa kinabuhi ug diin ang mga pamilya mahiusa sa pagkaselyo sa kahangtoran. Diha sa templo makapahigayon kita og mga ordinansa sa ebanghelyo, sama sa bunyag, alang sa atong mga katigulangan kinsa wala makabaton og kahigayonan sa pagdawat niini sa dihang sila buhi pa.
Ang mga meetinghouse mga dapit sa pag-abi-abi diin ang mga miyembro magtigom matag Dominggo aron sa pagkat-on mahitungod sa Langitnong Amahan ug ni Jesukristo ug sa pag-ambit sa sakramento. Sa mga adlaw sa semana kami naggamit sa mga meetinghouse alang sa sosyal o sports nga mga kalihokan. Ang mga bisita kanunay nga abi-abihon diha sa atong mga meetinghouse, ma-Dominggo ug sulod sa semana.

Ang yano nga pagpakigbahin sa atong mga pagpamatuod ngadto sa atong mga higala kon unsa ang kahulogan sa templo ngari kanato makatabang kanila nga mobati sa Espiritu. Kini mosaksi ngadto kanila kabahin sa pagkabalaan niini nga dapit.

Ako nagtan-aw sa templo uban sa dakong pagtahod ug pagpasalamat. Kon ako moadto didto, bation nako ang mas maayong panglantaw sa akong kinabuhi. Mawala sa makadiyot kanako ang mga hagit nga akong gisagubang ug adunay tataw nga ideya kabahin sa unsay kinahanglan nga tutokan sa akong pagtagad sa matag adlaw. Bation nako nga mas duol ngadto sa Dios ug sa akong Manluluwas nga si Jesukristo apan usab ngadto sa mga miyembro sa akong pamilya, sa karon ug sa nangagi.

Sister and Brother Glowa in front of the temple — Si Sister ug Brother Vega atubangan sa templo sa adlaw sa ilang pagselyo.

Ang akong paborito nga mga pagbisita sa templo mao kadtong kauban ang akong bana. Ang among gugma nalig-on samtang kami naghinumdom sa mga pakigsaad nga among gihimo uban sa atong Amahan sa Langit ug sa usag usa samtang kami naselyo alang sa karon ug sa kahangtoran.