O Uluai Tamaitai o le Toefuataiga
O Se Aoaoga Faavae Mamalu
Tau ina ia tatou lagonaina uma le fiafia lea na lagonaina e Vilate Kimball ina ua ia iloa e mafai ona papatiso o ia mo ona tuaa.
Ata na tusia e Toni Oka
Ia Oketopa 1840, na tusia ai e Vilate Kimball e 34 tausaga le matua se tusi i lona toalua, o Elder Heber C. Kimball o le Korama a Aposetolo e Toasefululua. “Ua tatalaina e Peresitene [Iosefa] Samita se mataupu fou ma le mamalu … lea na mafua ai se toeolaola i le ekalesia,” na tusi atu ai Vilate ia Heber, o le sa auauna atu i lana misiona lona lua i Peretania Tele. O le mataupu o le aoaoga a Iosefa Samita i lenei taimi o le papatisoga mo i latou o e sa lei maua le avanoa i o latou olaga atoa.
“Ua mauaina e Iosefa se faamalamalamaga sili atu ona atoatoa e ala i se Faaaliga,” sa ia lipoti atu ai. “O se faamanuiaga lea mo lenei Ekalesia le papatisoina mo tagata o o latou aiga o e na maliliu a o lei oo mai lenei Talalelei.” Sa faamanatuina e Vilate le faaaliga faapea i le faia o nei papatisoga sui mo tagata o aiga ua maliliu, “matou te galulue ai o ni sui mo i latou; ma tuu atu ai ia i latou le avanoa e tutula’i mai ai i le uluai toetutu.”
Sa siitia atu le au Kimballs mai Niu Ioka e faatasi ma le Au Paia i Katelani, Ohaio, ona siitia atu ai lea i Fa Uesi, Misuri. I le na o le tausaga mulimuli ane, i le 1839, sa tatau ai ona latou sosola ese mai Misuri ma le faitau afe o isi tagata o le Au Paia o aso e gata ai e sosola ese ma sauaga i lima o tagata faatupu vevesi. Sa latou faia lo latou fale i Navu, i le faitau selau o maila mai le mea na amata ai la latou malaga.
E ui ina sa latou taunuu i Navu i tulaga faigata, ae o le tusi a Vilate ia Oketopa 1840 i lona toalua sa tumu i le fiafia. “Ou te fia papatiso mo lo’u Tina,” sa ia fai atu ai. “Sa ou fuafua e faatali seia e foi mai i le fale, ae o le taimi mulimuli na saunoa ai Iosefa e uiga i lea mataupu, sa ia fautuaina ai tagata uma ina ia tutu i luga ma faia loa, ma faasaoloto mai a latou uo mai le nofo pologa i se vave e mafai ai. O lea la ua e vaai ai, e i ai se avanoa mo tagata uma. Pe le o se aoaoga faavae ofoofogia ea lenei?”
O Vilate o se tasi o uluai tamaitai na papatiso mo e ua maliliu i Navu.