E Na’o le Faatekinolosi: Talavou Matutua
E Mafai e le Tama Faalelagi ma Iesu Keriso ona Fesoasoani ia i Tatou e Malaga i le Malumalu
Sa ou feagai ma le tele o mea faafeagai ae ou te lei mauaina ou faaeega paia, ae o le faalagolago ia Keriso na fesoasoani ou te saunia ai e osia na feagaiga.
A o ou laitiiti, sa malaga lo‘u aiga i le Malumalu o Tokyo Iapani. O le malaga e 12 itula le umi i le taavale, ae sa matou faafetai mo le taimi na matou faatasitasi ai, ma sa matou faaaluina le malaga e talanoaina ai lo matou fiafia e uiga i le o atu i le malumalu.
I le taimi lea e lei atoa lo‘u 12 tausaga, o lea sa na o le potu faatalitali o le malumalu na mafai ona ou ulu atu i ai. Ae o le natura paia o lena nofoaga na faatumulia ai lo‘u loto i le mafanafana o le Agaga.
Semanu ou te nofo ai pea i lena potu faatalitali. O lea ina ua oo i le taimi e toe foi ai i le fale, sa amata ona tafe ifo loimata i o‘u foliga. Sa vave ona faasolo ina laitiiti ma laitiiti le malumalu i le mamao a o matou tietie ese atu, ma na ou matuai misia le malosi o le Agaga sa ou lagonaina i totonu.
Sa ou naunau e toe foi i se tasi aso. Afai o le malosi lena o le Agaga i le potu faatalitali, sa le mafai ona ou faatali e oo i le lagona o le alu moni lava i totonu ma faatino ia sauniga. Sa ou manao e fai soo se mea ou te mafaia e saunia ai e alu i totonu i se aso.
Feagai ma Mea Faafeagai
E ui lava ou te taumafai i taimi uma e tausi poloaiga ma ola agavaa, ae sa amata moni lava ona ou saunia e maua ou lava faaeega paia ae ou te lei alu i lau misiona.
Sa ou aveina se vasega sauniuni mo le malumalu lea sa fesoasoani tele ia te au. Sa ofo mai ni uso se toalua o auaunaga e tali fesili ma fesoasoani ia te au ia iloa le mea o loo faamoemoeina. Ma a o ou faalogo i o la’ua aafiaga ma a la molimau, sa faateleina lo’u naunau e ulu atu i le malumalu.
Ae o le mea na faateia ai a‘u, ina ua uma ona ou aveina la’u vasega faasauniuni o le malumalu ma a o latalata mai le aso o lo‘u faaeega paia, sa amata ona ou feagai ma le tele o faaosoosoga.
E faapena foi, sa ou vaaia le tele o mea faafeagai i le saunia e auauna atu i se misiona talai. Sa ou oo i le tele o le popole. Sa amata ona faaitiitia lo‘u soifua maloloina faalemafaufau, ma sa tatau ona ou faia ni laasaga talafeagai e fetaiai ai ma o’u lagona ma agai i luma ma le faatuatua.
A o tupu lenei mea, sa ou iloaina sa lei manao le fili ou te faia nei laasaga maoae faaleagaga.
Mauaina o le Malosi ia Keriso
Ina ia tetee atu i nei mea faafeagai, sa ou tatalo i aso uma mo se fesoasoani e faatoilalo ai faaosoosoga ma ou lagona popole. Sa sili atu lo‘u faalagolago i le Tama Faalelagi ma Iesu Keriso nai lo se isi lava taimi muamua. Sa ou anapogi, suesue i tusitusiga paia, ma saili faaaliga. Sa ou tatalo mo le malosi e faia ai faaiuga sa‘o, e faatoilalo ai o’u vaivaiga, ma ina ia lagonaina le filemu i lo‘u loto ma tausisia se vaaiga e faavavau.
O na faiga laiti faaleagaga na fesoasoani ia te au e iloa atili ai ma mulimuli i uunaiga a le Agaga. Sa ou lagonaina foi le faaitiitia o lo‘u popole. Sa ou maua se malamalama sili atu i le mana faamalolo o Iesu Keriso ma sa masani ona ufitia i le filemu ina ua ou liliu atu ia te Ia.
O le mea e ese ai, sa ala mai i le feagai ai ma faaosoosoga ma le fefe le mafai lea ona ou latalata atili atu ia Keriso ma saunia ai au lava ia maua o‘u faaeega paia.
Ma ina ua ou ulu atu i le Malumalu o Sapporo Iapani, sa i ai iina le Agaga lea sa ou lagonaina a o ou tamaitiiti i le potu faatalitali o le Malumalu o Tokyo, ae o le taimi lea sa sili atu ona malosi, e pei lava ona sa masani ona ou mafaufauina o le a i ai.
Ina ua uma ona maua o‘u faaeega paia, sa ou nofo filemu i totonu o le potu selesitila ma fai se tatalo, ma ole atu i le Tama Faalelagi po o le a le mea e finagalo o Ia ou te iloa.
Sa faaali mai e le Agaga ia te au e silafia au e le Tama Faalelagi ma o‘u tulaga (tagai Mataupu Faavae ma Feagaiga 38:2). Sa ou iloa sa fiafia o Ia ia te a‘u mo le osia o feagaiga ma e finagalo o Ia ia tatou o mai i Lona maota—o se fale e mafai ona taumamao moni ai i tatou mai le lalolagi faigata a o faamalosia i tatou ma aumaia i tatou ia latalata atili atu ia te Ia ma Iesu Keriso.
Sa ou lagonaina le lagona sili ona mamana o le filemu i lo‘u loto. Ma sa mafai foi ona ou maua le faaaliga sa ou manaomia e lagona ai le mautinoa i la’u filifiliga e auauna atu i se misiona.
E Silafia e le Tama Faalelagi o Tatou Loto
Ua ou iloaina e ala i la‘u malaga e silafia e le Atua manaoga o o tatou loto ma e mafai ona Ia fesoasoani ia i tatou ia manuia. Afai tatou te mulimuli ia te Ia ma le faatuatua ma faalagolago ia te Ia mo le taitaiga ma le malosi, e mafai ona Ia fesoasoani ia i tatou e saunia i tatou lava e ola agavaa ma ulu atu i Lona maota paia.
O sauniga o le malumalu o le a sili atu ona faapitoa ia te oe pe a e saunia oe lava e ulufale atu ma pe a faaauau pea ona e toe foi atu ma auauna atu iina. Ou te iloa e finagalo le Tama Faalelagi ia tatou maua sauniga ma osia feagaiga ina ia mafai ai ona tatou toe faatasi ma Ia. Ma e tusa lava pe le mafai ona tatou auai soo atu i le malumalu, pe a tatou taumafai e tumau le agavaa mo se pepa faataga o le malumalu, ua tatou agavaa mo faamanuiaga uma ua Ia ofoina mai e ala i le tausia o a tatou feagaiga o le malumalu.1
Ou te iloa a tatou tausia a tatou feagaiga ma taumafai e mulimuli ia Iesu Keriso, o le a faamalosia i tatou e tetee atu i luitau uma ma faaosoosoga o loo tatou feagai. Ma e mafai ona tatou valaaulia le Agaga ma faamanuiaga ma le olioli lea e tafe mai le malumalu i o tatou lava loto ma aiga.