Auaunaga e ala i le Fatuina o le Avea ma Itutino

E le o se mea e le masani ai mo i tatou le faatasi ai ma se vaega, ae e foliga mai e le o ni ō le vaega. Pe a tupu lenei mea i le lotu, e mafai ona faigata tele i se tasi o loo tauivi.

Na aoao mai e Peresitene Gordon B. Hinckley (1910 – 2008) e faapea, o tagata uma o e auai i le Ekalesia e manaomia se uo.¹ O uso ma tuafafine o auaunaga ua maua le avanoa e faamautinoa ai ua iloa e tagata uma o loo i ai se latou uo i totonu o le uarota po o le paranesi.

E faapitoa lava le taua o lenei mea mo soo se tasi e lagona e le fetaui ia te ia le “mamanu.” O i latou o e manatu e le fetaui mo i latou, e ono aofia ai i latou o tagata fou, o tagata fou faatoa masii mai, nofofua, leai se fanau, talavou, matutua, le toaaga, filemu, pe o tauivi i nisi o auala. E aofia ai i latou o e foliga, leo, manatu, lavalava, pe ese a latou amioga mai mea e fai e le vaega. I se isi faaupuga, e mafai e soo se tasi o i tatou ona lagonaina i nisi taimi e pei e le o i latou o ni ō le vaega.

Fai mai Alissia, o se tamaitai o le sa tauivi e faafetaui ona o lona lanu, “O le eseese e mafai ona faigata, ma e faigata ona faamatalaina pe faapei se tasi e lei oo i ai.” Ae peitai, sa ia fai mai, “sa ou lagonaina le vaai mai ma le aofia ai i ni faatinoga faigofie o le agalelei ma le aapa atu. Ou te lagona le faaaofia ai pe a faia e tagata se taumafaiga ia faia se talanoaga moni ia te au, faaavanoa se taimi mo au, pe valaaulia au e faaalu se taimi ma i latou. E ese le manaia o le lagona pe a faaalia e tagata latou te mananao e faatasi ma outou.“²

Manatu mo le Fatuina o le Avea ma Itutino

O le a se mea e mafai ona faia e tuafafine ma tuagane o auaunaga e fesoasoani ai e fatuina se nofoaga e avea isi ma itutino?

Faalogo ia i latou. Tatou te lagonaina se lagona o le avea ma ni ō po o se itutino,i pe a tatou iloa ua faafofogaina i tatou ma vaaia i tatou e pei ona tatou i ai, e oo lava i o tatou le atoatoa. Tatou te le tau foia se faafitauli o se tasi — o le mea moni, e tele ina tatou le mafaia. Ae e mafai ona tatou faalogo ma le agaalofa ma le fia iloa, toe tepa i tua i mea tatou te faalogo i ai ina ia mautinoa ua tatou malamalama, ma fesili po o le a se isi mea o loo i ai i o latou mafaufau. O tomai ia o sootaga e mafai ona tatou faataitaia patino ma avea ma faataitaiga mo isi.
Tatalo mo i latou. E ono mafai ona tatou lagona le musuia e tatalo mo i latou. E mafai foi ona uunaia i tatou e fesili atu pe mafai ona tatou tatalo faatasi ma i latou pe fesili atu po o le a le mea e mafai ona tatou tatalo atu ai mo i latou.
Luga: ata pue mai le Getty Images

Valaaulia, faailoa atu, ma faaaofia ai. Valaaulia i latou i gaoioiga a le uarota, galuega fesoasoani, mea faaagafesootai, po o gaoioiga faasamasamanoa faavaega. Ave faatasi ma oe pe a mafai, faailoa atu i isi, ma faaaofia i latou i talanoaga e ala i le fai atu ia i latou o fesili e aumai ai i latou i totonu. Fesoasoani ia i latou o e ua faatoa siitia atu ia iloa po o ai isi tagata fou, atonu o latou vaavaai foi mo ni uo.
Iloilo. Fesili sa’o i ai pe o faapefea so latou lagona fesootai i le uarota. O ai a latou uo? O ai e mafai ona avea ma a latou uo? Fesili atu e uiga i mea latou te fiafia i ai, o o latou mausa, fanau, ma popolega ina ia mafai ai ona e nofouta i avanoa e faafesootai ai i latou ma isi e tutusa o latou tulaga, po o e atonu e manaomia o latou tomai.
Tautino ia malosiaga. Tatou te lagona le avea ma ni ō pe a tatou iloa e i ai se mea tatou te foai atu. Tautino ia mea e te matauina e lelei lo latou faia. Fesili po o le a se tala a se tasi e iloa lelei i latou, i o latou malosiaga. Afai latou te le iloa, valaaulia i latou e fesili. Vaavaai mo ni auala e mafai ai e o latou malosiaga ona faamalolosia isi.
Fefautuaa’i ma taitai. Pe a talafeagai ai, ia ta’u atu i taitai o le uarota po o a malosiaga ma manaoga o nisi o i latou, ina ia maua e taitai ia faamatalaga latou te manaomia a o latou sailia musumusuga mo tofiga ma valaauga anoa.
Faamanaina i latou. Fesoasoani ia i latou ia talisapaia o latou tomai e ala i le fai atu o fesili e pei o nei: Afai e te manao e faaloloto se faigauo ma se tasi, o le a se mea e te faia? O le a se mea ua uma ona e taumafaia o ni auala e fesootai ai ma isi? O le a se isi mea e mafai ona e taumafai ai?