“O Le a Faapea Ona Ta’uao La’u Ekalesia”
Saunia e Peresitene Henry B. Eyring
Fesoasoani Lua i le Au Peresitene Sili
A tatou faaaogaina le igoa atoa o le Ekalesia, e faamanuiaina i tatou ma tatou faamanuia i isi.
I Aferika, o tagata taitoatasi e saili mo se Ekalesia e auai ua lipotia mai le faia o a latou miti. I a latou miti, sa faatonuina i latou e vaavaai mo se Ekalesia ua valaauina i le suafa o Iesu Keriso. A o latou saili, na latou maua e na o le tasi le Ekalesia o loo tutotonu ai le suafa o le Faaola — O Le Ekalesia a Iesu Keriso o le Au Paia o Aso e Gata Ai.
I Amerika Latina, na lipotia mai ai e nisi o le Au Paia o Aso e Gata Ai e faapea, o a latou valaaulia i uo e auai i le “Ekalesia Mamona” na feiloai ma le le fiafia. Na suia lena mea ina ua latou tuuina atu se valaaulia i Le Ekalesia a Iesu Keriso o le Au Paia o Aso e Gata Ai. “Afai e ta’ua la outou Ekalesia o le Ekalesia a Iesu Keriso,” na tali atu ai a latou uo, “matou te fia o mai e vaai.”
I le Iunaite Setete, sa valaaulia ai e se tamaitiiti o le Peraimeri ona tuaoi i lona papatisoga. Sa fai mai se faifeau o se isi lotu, semanu e le alu lava i se papatisoga a se “Lotu Mamona”. Ae ona sa ia iloa o le ekalesia a le tamaitiiti o loo taulai atu ia Iesu Keriso, o lea na auai ai le faifeau ma lona toalua.
Ina ua fesili atu se sui o le ofisa e tusi ai avanoa o vaalele i se tagata o le Ekalesia mo se tuatusi imeli, na tali atu le tagata, “ldschurch.org.”
“O le a lena lotu?” na fesili atu ai le sui.
“O Le Ekalesia a Iesu Keriso o le Au Paia o Aso e Gata Ai,” sa tali atu ai le tagata lotu.
“Ou te alu e faigaluega mo ni aso i se taimi e aunoa ma le mafai ona talanoa e uiga i le Alii,” o le tala lea a le sui. “O le iloaina o loo ou talanoa atu i se isi Kerisiano ua manuia ai lo’u aso.”
Sa vave ona faafou e le tagata o le Ekalesia lona atatosi o le vaalele i le tuatusi fou o le imeli a le Ekalesia: ChurchofJesusChrist.org.1
O Se Folafolaga ua Faataunuuina
O nei tala matagofie ua ta’u mai ai le faataunuuga o se folafolaga na tuuina mai e Peresitene Russell M. Nelson i le Au Paia o Aso e Gata Ai ia Oketopa 2018 ma e faapena foi ia Aperila 2020.
“Ou te folafola atu afai o le a tatou faia le mea sili tatou te mafaia e toefuatai ai le igoa sa’o o le Ekalesia a le Alii, o le a liligi mai e Ia o le e ana le Ekalesia Lona mana i lalo ma faamanuiaga i luga o ulu o le Au Paia o Aso e Gata Ai, i auala tatou te lei vaaia lava,” na saunoa ai Peresitene Nelson. O le a tatou maua le poto ma le mana o le Atua e fesoasoani ai ia i tatou e avatu faamanuiaga o le talalelei toefuataiina a Iesu Keriso i malo uma, ituaiga, gagana, ma nuu ma ia saunia le lalolagi mo le Afio Faalua Mai o le Alii.”2
Talu ai nei, e ala i a’u faitotoa o ala o faasalalauga faaagafesootai, sa ou valaaulia ai tagata o le Ekalesia e ta’u mai ia te au e uiga i faamanuiaga na latou maua mai le faaaogaina o le igoa sao o le Ekalesia. Sa ou ootia i le mauaina o le silia ma le 2,600 tali.
Ou te fia faasoa atu ni isi o nei mea ia te outou. O le a foliga tou te masani ai aua sa outou maua foi faamanuiaga faapena a o outou mulimuli i le fautuaga a Peresitene Nelson.
Latalata atili ia Iesu Keriso.
Sa faagaeetia au i le molimau a Iakopo e uiga i le auala na fesoasoani ai le igoa atoa o le Ekalesia ia te ia e taulai atu i le Faaola: “Na ou matauina o lo’u taulai atu ia Iesu Keriso ua vevela i vaega uma o lo’u olaga,” sa ia faasoa mai ia te au. “Pe a ou ai ma inu i le faamanatuga, ou te mafaufau ia te ia ma Lana taulaga togiola. Pe a ou faitau i tusitusiga paia, ou te gauai atili atu i ana upu ma isi mau faasino ia te ia. Ua ou latalata atili atu ai ia te ia ma na fesoasoani ia te au e malamalama atili ai i lana matafaioi o lo’u Faaola ma le Togiola.”
Sa ou lagonaina le faamanuiaina i le aoaoina o le uiga o le suafa o le Faaola ia Beth ma Bryce: “Sa ou lagonaina se sootaga latalata atu i lou Faaola,” o le tala lea a Beth. “Pe a fesiligia au po o le a le lotu ou te alu i ai, ma ou te tali atu ou te auai i Le Ekalesia a Iesu Keriso o le Au Paia o Aso e Gata Ai, ou te lagonaina se lagona moni o le auai ai. Ou a’u o sō o Lona nuu. Ou a’u o sō o Lona aiga. O a’u o sō o lo Ia.”
Sa ta’u mai e Bryce ia te au e faapea o le igoa sao o le Ekalesia e fesoasoani ia te ia e “manatua ai po o ai ou te auauna i ai ma o le ou te saili ia ou so’o atili i ai. Ua faamanatu mai ai ia te au o le Faaola o le Ia lea o loo tuuina mai nei aoaoga ma e le mai tagata.”
“O Le Suafa o le Faaola o Loo I Ai le Mana”
Fai mai Haley, o se faifeautalai faamisiona, na faapea mai: “O le faaaogaina o le igoa sao o le Ekalesia a le Alii e aumaia atili ai le mana ma le pule, pe a tatou aoao atu i isi i Lana talalelei toefuataiina. Pe a ou fai atu ‘O Le Ekalesia a Iesu Keriso o le Au Paia o Aso e Gata Ai,’ e faamautu e le Agaga o le Alii ma molimau mai o le Ekalesia lenei a le Alii ua toefuataiina mai i luga o le fogaeleele i aso nei. Ou te fiafia e faaaoga le igoa sa’o aua o loo ou faaopoopo atu foi la’u molimau ola i lena upumoni!”
Ma sa ta’u mai foi e Nicola ia te au: “talu ai, a ou fai atu o ‘Mamona,’ e tele lava ina i ai lena maalo o le le mautonu ia i latou e le auai i lo tatou faatuatuaga. E toetoe lava a mafai ona e lagonaina le televave o le manatua o mea uma na latou faalogo i ai e uiga ‘i Mamona.’ Ae o le taimi nei ua i ai se filemu, o le tele lava o taimi e talia ai. E i ai le mana o le suafa o le Faaola. Na te aumaia le filemu. O lau molimau i le moni o le talalelei ua tuputupu ae i le na o le ta’u atu o le igoa sao o le Ekalesia. Ou te lagona le Agaga i taimi uma ou te fai atu ai. O nisi taimi e na o le pau lava le mea ou te tau atu e uiga i mea tatou te talitonu i ai, ae ua lava lea.”
Faamaninoina o Manatu Sese
Na saunoa Harold, o se polofesa i se Iunivesite i le Iunaite Setete e faapea o le faaaogaina o le igoa atoa o le Ekalesia ua fesoasoani ia te ia e faamanino ai ni manatu sese. Sa ia tau mai ia te au, sa taumafai se tamaitiiti aoga se tasi, e aotele se talanoaga e uiga i le lotu, “ou te matea o lotu uma o ni Kerisiano, sei vagana ai le Au Mamona.”
O le vaaia o se taimi auro e faamanino atu ai lena manatu sese, na fai mai Harold, “sa ou fai atu i tamaiti aoga o ‘Mamona’ o se igoa tauvalaau na tuuina atu i tagata o le Ekalesia ona o lo tatou talitonuga i le Tusi Paia ma le Tusi a Mamona o ni molimau faatusi paia anamua e lua ia Iesu Keriso.”
Na tatala mai e Maria lona loto ia te au, ma faasoa atu le auala ua faamanuiaina ai o ia e le igoa atoa o le Ekalesia i le aoaoina o lana fanau: “Ua laititi nei le fenumiai o la’u fanau i le taimi ou te aoao atu ai ia i latou e faapea o i matou o le Au Paia o le Ekalesia a Iesu Keriso i nei aso e gata ai e faatusa ia i tatou lava o ‘Mamona.’ Sa masani ona latou le mautonu ma fesili, ‘Aisea e ta’u ai o Mamona? Pe o lona uiga ea e le o i tatou o ni Kerisiano? Ou te lagona o lenei suiga ua fesoasoani ia i latou pe a talanoa atu i isi tamaiti i le aoga e le talitonu.”
O A’u o se Faifeautalai mo Iesu Keriso”
Na folafola mai e Peresitene Nelson e faapea, a o tatou faaaogaina le igoa sao o le Ekalesia, “o le a tatou maua le malamalama ma le mana o le Atua” e faasalalau atu ai le talalelei. Sa musuia au e Teresa i lana tala e uiga i le mea na tupu ina ua fesili atu se uo i le galuega ia te ia e uiga i le Ekalesia. I le mulimuli ai i le fautuaga a Peresitene Nelson, sa amata ai e Teresa i le faasoaina atu o le igoa atoa o le Ekalesia.
“Sa fiafia o ia i le Ekalesia,” sa ia fai mai ai ia te au. “Sa ia sailiilia mo ni nai masina ona oo lea, o se vavega, sa papatisoina o ia e lou atalii, le epikopo. Sa ou lagonaina le fiafia tele i lena aso, faapea foi ma lou aiga. E moni folafolaga.”
Fai mai Ionatana, e toatele tagata e le masani lava i le igoa o le Ekalesia. “I le faaaogaina o le igoa atoa o le Ekalesia,” na ia fai mai ai, “ua tuuina mai ia te au se avanoa e faamatala ai le auala e taulai atu ai le Ekalesia ia Iesu Keriso ma le mafuaaga tatou te faasino ai ia i tatou lava o ni Au Paia o Aso e Gata Ai.”
Ina ua fesili atu se tamaloa ia Chloe pe o ia o se “faifeautalai Mamona,” sa ia molimau malosi atu, “leai, o au o se faifeautalai mo Iesu Keriso.” Sa tau mai e Chloe ia te au le manao o le tamaloa e mulimuli i le Faaola, o lea sa ia aoao atu ai ia te ia o Le Ekalesia a Iesu Keriso o le Au Paia o Aso e Gata Ai e taitaia e le Faaola. Ona ia tuuina atu lea ia te ia o faamatalaga e uiga i Lana Ekalesia.
“Valaau le Ekalesia i Lo’u igoa”
I le faailoa mai o le igoa o Lana Ekalesia i le Perofeta o Iosefa Samita, na tautino mai ai e le Faaola, “Aua o le a faapea ona ta’ua o la’u ekalesia i aso e gata ai, O Le Ekalesia a Iesu Keriso o le Au Paia o Aso e Gata Ai” (Mataupu Faavae ma Feagaiga 115:4). Ma ia sa Nifae, na ia fetalai ai, “O le a outou ta’ua le Ekalesia i lo’u igoa,” aua “e faapefea ona avea ma au Ekalesia vagana ai ua faaigoaina i lo’u igoa?” (3 Nifae 27:7, 8).
Ou te molimau atu faatasi ma se tagata o le Au Paia o Aso e Gata Ai e igoa ia Tommie e faapea, a tatou faaaogaina le igoa atoa o le Ekalesia, e faamanuiaina i tatou ma tatou faamanuiaina ai foi ma isi. Sa tau mai e Tommie ia te au, “A o ou faasoa atu i isi ia faamanuiaga o le avea ma se tagata o Le Ekalesia a Iesu Keriso o le Au Paia o Aso e Gata Ai i se taimi o le a manumalo ai le fefinauai ma le fefe, ua ou iloa o loo ou fesoasoani i isi ia iloa o loo i ai se sulufaiga mai le afa i soo o Iesu Keriso, o e e manatu ma mulimuli ia te Ia.”