E Na’o le Faatekinolosi
Aoao Atu Lau Fanau ia Fiafia i le Malumalu
E le o vave tele le fesoasoani i lau fanau e saunia mo le malumalu.
I lana uluai saunoaga faalauaitele i le avea ai ma Peresitene O Le Ekalesia a Iesu Keriso o le Au Paia o Aso e Gata Ai, sa saunoa mai ai Peresitene Russell M. Nelson ia i tatou mai le Malumalu o Sate Leki, faatasi ai ma Aposetolo uma na faatasi atu ma ia. Sa taua lenei nofoaga—o se faatusa e “amata faatasi ma le taunuuga i le mafaufau,”1 o se taulaiga i le ala o feagaiga ma le galuega a le Atua e faaeaina ai aiga.
“O lenei, i tagata taitoatasi o le Ekalesia,” na ia saunoa ai, “tumau i le ala o le feagaiga. O lo outou tuuto e mulimuli i le Faaola e ala i le osia o feagaiga ma Ia ona tausia lea o na feagaiga, o le a matala ai le faitotoa i faamanuiaga uma faaleagaga ma avanoa e maua e alii, tamaitai, ma fanau i soo se mea.”2
Sa ia toe faapea mai, “O sauniga o le malumalu ma feagaiga tou te faia iina o le ki lea i le faamalosia o lou olaga, lau faaipoipoga ma le aiga, ma lou tomai e tetee atu ai i osofaiga a le fili.”3
E ala atu i malumalu, e mafai ai ona tuufaatasia le aiga atoa. O e laiti ma matutua, o e soifua ma e ua maliliu. O le mana o le malumalu e mafai ona faamanuiaina ai tagata uma.
O le fesoasoani i a tatou fanau e saunia mo le malumalu e mafai ona avea o se vaega e masani ai o o tatou olaga. E pei ona taua le malumalu ma ona faamanuiaga ia i tatou, o a tatou faatinoga ma a tatou upu o le a aoao ai a tatou fanau ia fiafia foi i le malumalu. A malamalama tamaiti i le taua o le osia o feagaiga ma le Atua, o le a faateleina lo latou naunau e saunia mo na feagaiga.
O nisi nei o manatu faigofie e fesoasoani ai i a tatou fanau e aoao ia fiafia i le malumalu a o latou sauniuni e osia ma tausia feagaiga iina.
Mo le 3–7 tausaga le matutua:
-
Faaali se ata o le malumalu i totonu o lou aiga.
-
Talanoa faatasi e uiga i le malumalu.
-
I nofoaga e mafai ai, asiasi i lotoa o le malumalu, pa‘i i le malumalu, pe matamata i ata o le malumalu i luga o le initoneti.
-
Tusi se ata pe fausia se faataitaiga o lou malumalu i ni anomea e vave ona maua e pei o maa ma palapala, kelei, paluga kelei, po o poloka. Mulimuli ane, toe fai mo se isi malumalu.
-
Auai i gaoioiga faaleaiga e tuuina atu i luga o le FamilySearch.org/discovery.
-
Faatino ni tala anoa faaleaiga pe fai ni fua o meaai masani faaleaiga. Faamalamalama atu le taua o le iloa e uiga i o tatou tuaa.
Mo le 8–11 tausaga le matutua:
-
I le avea ai o se aiga, ia faitau e le aunoa ma talanoaina faatasi ia fesili o le faatalanoaga o pepa faataga o le malumalu. Uunaia lau fanau ina ia agavaa mo se pepa faataga e tusa lava po o a taimi o le a mafai ai ona latou auai.
-
Aoao atu e uiga i le mana, puipuiga, ma le taua o le tausia o feagaiga ma folafolaga.4
-
Iloilo faatasi faamatalaga ma vitio i le temples.ChurchofJesusChrist.org, e pei o le maimoaga faatekinolosi o le Malumalu o Roma Italia.
-
Faasoa atu ni aafiaga patino o le malumalu po o tala mai tagata o le aiga, e aofia ai aiga lautele.
-
A o atoa le 10 po o le 11 o lau tama, fatu se kalena faigofie e faitau ai aso, vaiaso, po o masina seia oo ina mafai ona latou ulu atu i le malumalu.
-
Talanoa faatasi i le tala faatusipaia o le Faaola i le malumalu i le 12 o Ona tausaga (tagai Luka 2:42–51).
-
Fatu se fuafuaga e saunia ai mo le asiasiga muamua a lau tama i le malumalu. I nofoaga e mafai ai, ia faia o se gaoioiga faaleaiga. Ina ia fesoasoani i lau tama ia lagona atili le toafimalie, ia aofia ai le talanoa e uiga i vaega moni o papatisoga ma faamauga o le malumalu, e pei o ofu e laei atu ma i totonu o le malumalu, lea o le a latou ulu atu ai i le potu papatiso, o ai o le a fesoasoani ia i latou, pe faapefea ona faatino papatisoga ma faamauga, ma le faatulagaga o mea o le a tutupu i totonu.
-
Aoao e fai galuega o talafaasolopito o aiga ma saunia igoa o aiga e ave i le malumalu.
O Faamanuiaga o le Galuega o Malumalu ma Talafaasolopito o Aiga
E toatele perofeta ma aposetolo ua saunoa i le taua o le galuega o malumalu ma talafaasolopito o aiga ma faamanuiaga e mafai ona aumaia a o tatou auai i lenei galuega, e aofia ai le faamalolosia o a tatou fanau ma aiga. Mo se faataitaiga, na saunoa Elder Dale G. Renlund o le Korama a Aposetolo e Toasefululua e uiga i le faateleina o le malamalama e uiga i le Faaola ma Lana Togiola, faatosinaga a le Agaga Paia mo i tatou e lagona ai le malosi ma le taitaiga, faatuatua, olioli, faamanuiaga faaleaiga, alofa ma le talisapaia, mana e iloatino ai, ma le puipuiga mai le fili.5 E mafai ona tatou fesoasoani i a tatou fanau ia maua nei faamanuiaga a o tatou valaaulia i latou e auai i le galuega o le malumalu ma talafaasolopito o aiga faatasi ma i tatou.
O galuega o le malumalu ma talafaasolopito o aiga o se vaega o le galuega lava e tasi o le faaolataga ma le faaeaga. Ma o le galuega o talafaasolopito o aiga e mafai ona faia se matafaioi taua i sauniuniga mo le malumalu.
Na saunoa Peresitene Nelson: “O le maota o le Alii o se fale o le aoaoga. O iina e aoao mai ai le Alii i Lana lava ala. O iina e aoao mai ai sauniga taitasi e uiga i le Faaola. O iina tatou te aoao ai i le auala e vavae ai le veli ma talanoa ma le manino atili ma le lagi. … E ma’eu le naunautai e tatau ona oo ia i tatou taitoatasi e saili atu ai i le malutaga iina.”6
Amata i le Asō
Mo vaitausaga uma, o le avea o le malumalu ma talafaasolopito o aiga o se vaega natura ma masani ai o o tatou olaga o le a aumaia ai faamanuiaga. Talanoa e uiga i le malumalu a o outou malaga faatasi. Faaaofia i suesuega o le Sau, Mulimuli Mai ia te A‘u ma isi talanoaga o le talalelei ma lou aiga. Aoao lau fanau e mafai ona latou avea atili e faapei o le Faaola a o latou saunia mo ma ulu atu i Lona malumalu. O nei mea taitasi o le a fesoasoani i lau fanau e aoao ai e alolofa ma saunia e ulu atu i le maota o le Alii.
Na saunoa mai Sister Joy D. Jones, o le sa avea muamua ma Peresitene Aoao o le Peraimeri: “Ou te tatalo i aso uma ina ia lagona e a tatou talavou ma o latou aiga le alofa o le Faaola ma iloa ma mulimuli i Lona Agaga. Ou te iloa o le a Ia taitai atu i latou i Lona malumalu paia ma i faamanuiaga o le faavavau ina ia maua i le mauaina o sauniga ma osia feagaiga ma lo tatou Tama oi le Lagi.”7
E le afaina le vave aoao o lau fanau e uiga i le malumalu.
A o tatou faaaluina se taimi e faasoa atu ai o tatou aafiaga ia tatou fanau, talanoa e uiga i le mana ma le puipuiga lea e oo mai i le tausia o feagaiga, aoao i latou i le taua o le malumalu, molimau atu i o tatou lagona i totonu o ona puipui, ma faasoa atu tala e uiga i o tatou tuaa, e mafai ona tatou faafaileleina i totonu o i latou se alofa mo le malumalu i o latou uluai tausaga. A o e aoaoina lau fanau ia fiafia ma saunia mo le malumalu, o le a e tuuina atu ia i latou se tasi o meaalofa silisili e te mafaia—o se malamalama o aiga e faavavau ma o se manao e osia ma tausia feagaiga o le a tuufaatasia ai o latou aiga mo le faavavau.