E Na’o le Faatekinolosi
Tatalo mo se Auala e Maua ai Faamaumauga a Lo‘u Aiga
E alala le tusitala i Virgina, ISA.
Sa fesoasoani la‘u uo agelu o Shirley ia te au e sue tusi o talafaasolopito o aiga a o’u tuaa.
Ata pue mai le faaaloaloga a le tusitala
I le tele o tausaga ua mavae, sa ou lagona ai e tatau ona ou talanoa i lo‘u tamamatua e uiga i le matou talafaasolopito o aiga. Ina ua ou asiasi atu ia Tamamatua, sa vaivai ma tigaina o ia. Sa fai mai le uso o lo‘u tina ia aua nei faalavelave ia te ia, o lea ou te lei fesili atu ai ia te ia e uiga i le talafaasolopito o lo matou aiga. I ni nai masina mulimuli ane, sa ou faaipoipo ma siitia atu mai Taiuani i le Iunaite Setete. Sa ou faanoanoa i le le toe maua o se isi avanoa e talanoa ai ma Tamamatua a o lei maliu o ia. Sa ou fesili atu i isi tagata o le aiga e uiga i lo matou gafa, ae sa leai se tasi na mafai ona fesoasoani ia te au. Sa ou faanoanoa ma lē fiafia ia te au lava mo le faatalitali mo se taimi umi e aoao e uiga ia Tamamatua ma mo le le taliaina o uunaiga mai le Agaga e talanoa ia te ia e uiga i lana talafaasolopito.
I se tasi aso a o ou faitauina lo‘u faamanuiaga faapeteriaka, sa faagaeetia au i se fuaitau na faamatalaina le ala e mafai ai ona ou fesoasoani e faatino se galuega ofoofogia mo o’u tuaa ua maliliu ma isi o loo soifua. Sa ou mafaufau, “E mafai faapefea ona tupu lenei mea pe afai ou te le iloa po o fea e amata ai?” Mulimuli ane sa ou faitau i le Mataupu Faavae ma Feagaiga 82:8, 10:
“Ou te tuu atu ia te outou se poloaiga fou, ina ia outou malamalama i loʼu loto e faatatau ia te outou; …
“Ua noatia au, le Alii, pe a outou faia mea ou te fai atu ai; ae pe a outou le faia mea ou te fai atu ai e leai sa outou folafolaga.”
Sa ou lagonaina le faamalosiau mai o le Alii ia te au, ma sa ou tatalo mo se auala e agai atu ai i luma e saili a‘u faamaumauga o talafaasolopito o aiga.
I ni nai masina mulimuli ane a o i ai i Shanghai, Saina, sa ou feiloai ai ia Shirley Wu, o le sa asiasi mai Taiuani. E lei umi ae avea i maua ma ni uo lelei. Ina ua ia iloaina o loo ou sailia le gafa o lou aiga, sa ia uunaia au e aua le fiu. Sa ia fautua mai o se nofoaga e amata ai, e tatau ona ou alu i le matagaluega o faamaumauga o aiga i le lotoifale i Taiuani e talosaga ai ni tuatusi tuai. “Atonu o le a i ai se mea o le a oo mai,” o lana tala lea.
Sa ou lele atu i Taiuani, ma le faamoemoe ia maua le faamaumauga o le fale o le tama o lou tamamatua, ae paga lea, ua le o toe i ai. Ou te lei iloa foi lona nuu na fanau ai po o le igoa o lou tuaa o le na muamua sau i Taiuani. E ui lava i lenei faafitauli, sa fai mai Shirley ia te au e aua le popole. “Tau lava o le i ai o le faatuatua,” o lana tala lea. “O le a fesoasoani le Atua ia i ta’ua, ma o ou tuaa i le isi itu o le veli o le a fesoasoani foi.” I ni nai aso mulimuli ane, sa ou toe foi atu ai i Shanghai, ma le faamoemoe ma tatalo mo se vavega.
I se tasi aoauli o le Aso Sa, sa auina mai ai e Shirley se ata o ni faamaumauga o gafa. Sa ia fesili mai ia te au pe i ai se igoa e foliga masani ai.
Sa ou tei lava. O igoa o o‘u tuaa sa i luga o le itulau! Ina ua ou fesili atu pe na faapefea ona ia mauaina, sa ia faamatala mai ia te au le tala faavavega lenei:
Sa ou mafaufau i lou gafa mo ni nai vaiaso, ma sa ou lagonaina e tatau ona ou alu i le tuatusi o le fale o lou tamamatua e siaki le eria.
I le mavae ai o le lua itula i luga o le nofoaafi saoasaoa, sa ou alu atu i le pasi i le aai o Chi Kan, o se nofoaga ou te lei i ai muamua lava. Sa ou moe, ma i le nuu mulimuli na fafagu ai au e le avenofoaafi. Sa ou oso ese, tilotilo solo, ma iloa ai sa ou i ai i se nuu faifaiva. Sa ou fesili atu i se tagata talavou e ona le faleoloa i le isi itu o le auala mo ni taitaiga. Sa ia valaauina se taavale la‘u pasese mo a’u ma faasino atu le avetaavale i se nofoaga sa nofo ai se toeaina matua. Ina ua ou taunuu atu ma fesili atu i lena alii po o fea e mafai ona ou maua ai faamaumauga o gafa o le taulaga, sa ia fai mai ia te au e savali i ni nai poloka i se faletapua’i i tafatafa o le matafaga.
I le faletapua’i, sa ou vaaia ai se vaega o tamaloloa o inu ti ma talatalanoa. Sa latou fai mai o lea faatoa latou amataina se fonotaga faaletausaga o le gafa o le aiga o Liu Shi e saunia ai mo se konafesi tele ia Oketopa. Sa ou faamatala atu sa ou i ai iina e sue igoa o le aiga mo la‘u uo.
“E masani lava e leai se tasi i lenei faletapuai,” sa latou fai mai ai. “E loka le faitotoa sei vagana ai le lua i le tolu itula pe a matou faia le fonotaga faaletausaga. Ua e matua laki lava ua e feiloai ma i matou iinei.”
Ina ua ou tau atu i alii sa ou sailia le igoa o Liu Bei, sa latou tau mai ia te au sa latou aoina le gafa o le aiga o Liu mo le tele o tausaga ma e latou te le manatuaina lena igoa. Sa ofoina mai ma le agalelei e se tasi o alii ana faamaumauga o gafa mo au e vaai i ai. Sa faaauau pea la latou fonotaga a o ou sailia faamaumauga. Ina ua mavae le 10–15 minute, sa ou alaga atu, “Ua ou mauaina!”
I le faateia ai, sa le toe talanoa i latou ma uu atu le tusi. Sa ou faaali atu ia i latou le igoa, ma sa latou fai mai ia te au, na sau mai le laina o le aiga o Mr. Liu Qiu Shan, o le sa auai i le latou fonotaga i lena aso. Sa ou faatauina se kopi o le tusi o gafa, lea sa i ai faamaumauga e oo atu i tua i augatupulaga e 26 ma le 2,460 tausaga o igoa o tuaa i laina o aiga lautele.
Na ofoina mai mulimuli ane e Mr. Liu Qiu Shan e momoli atu a’u i le nofoaga o nofoaafi. Sa ia tau mai ia te au pe na ou sau i se itula na muamua atu po o le aso na sosoo ai, semanu ou te le mauaina se tasi po o se mea iina. Sa ia fai mai, “O lenei nofoaga e lokaina i taimi uma. E le taumate lava o faamanuiaga a tuaa. O se vavega lava.”
O Shirley o la‘u agelu. E tumu o ia i le alofa o Keriso ma e naunau i taimi uma e fesoasoani e faia le galuega a le Atua. O ia o se faataitaiga sili o le auauna atu i isi. O lona naunautaiga e auauna atu ua aumaia ai faamanuiaga maoae ma se vavega i le faitau selau o agaga. Ou te molimau atu o loo i ai agelu o loo faatasi ma i tatou, ae e manaomia ona tatou maua le manao e faia le feau a le Alii ina ia maua ai la latou fesoasoani. Sa saunoa mai Peresitene Gordon B. Hinckley (1910–2008): “Talitonu ia te oe lava. Talitonu i lou mafai ona faia ni mea maoae ma lelei. Talitonu e leai se mauga e maualuga tele e le mafai ona e a’ea. Talitonu e leai se afa e malosi atu e le mafai ona e talitalia.”1 A tatou sailia le taitaiga a le Alii, o le a tatou vaai i Lona aao ma agelu i o tatou olaga, ma o le a mafai ona tatou faataunuuina mea ua Ia poloaiina i tatou e fai.