E Na‘o le Faatekinolosi: Ata o le Faatuatua
Sa Ou Faatuatua o le a Taitaia e le Atua Lana Perofeta
Sa oo mai ia te au se manatu ona sa tatou fai atu “Mamona” ma le “AAG,” sa lei iloa e tagata le igoa sa‘o o le Ekalesia.
Ata pue mai le faaaloaloga a le tusitala
A o ma asiasi atu ma la‘u soa i se tagata faatoa papatiso, sa sau sana uo faifeau. “Oi, o faifeautalai a le AAG!” o lana tala lea. Sa ma fiafia sa ia iloaina i ma‘ua, ma sa mafai ona ma iloa sa fiafia o ia. A o ma faafeiloaia o ia, sa ou lagonaina le manaomia ona faailoa faalelei atu i ma’ua.
“O i ma’ua o faifeautalai mai Le Ekalesia a Iesu Keriso o le Au Paia o Aso e Gata Ai,” sa ma fai atu ai.
“Ioe,” o lana tali lea. “Mamona, po o le AAG.”
Sa le logolelei lena mea i o‘u taliga. Sa ou ta‘u atu ia te ia e valaau e tagata i matou o Mamona ona o le Tusi a Mamona.
“Leai,” na ia fai mai ai. “E oo lava i o outou tagata latou te faaigoaina i latou lava i lena igoa.”
Sa ma taumafai i le mea sili e fesoasoani ia te ia ia malamalama i le igoa moni o le Ekalesia, ma sa ma tuuina atu le molimau i le moni o le Ekalesia. Sa ma valaaulia foi le ma tagata faatoa liliu mai e tuuina atu lana molimau.
O lenei mea na tupu na faamanatu mai ai ia te au le taua o le faaaogaina o le igoa moni o le Ekalesia. Sa ou le amanaiaina le aveeseina o le suafa o le Faaola ina ua ou faapuupuuina le igoa o Lana Ekalesia. O lea la ua amata ona ou malamalama lelei i nisi o mau sa ou faitauina i le tele o taimi. O fuaiupu i le 3 Nifae na fesoasoani ou te malamalama ai i le taua tele o le le suia o le igoa o le Ekalesia a le Alii pe afai ou te manao moni lava e tauave i o‘u luga Lona suafa:
Latou te lei faitau ea i tusitusiga paia, ia ua fai mai e ao ina outou ave i o outou luga le suafa o Keriso, o lou igoa lea? Ona o le igoa lea o le a valaau ai outou i le aso gataaga. …
“O lea, soo se mea tou te faia, ia outou faia i lou igoa; o lea ia outou faaigoa ai le ekalesia i lou igoa; ma ia outou valaau atu i le Tama i lou igoa ia faamanuia mai o ia i le ekalesia ona o au” (3 Nifae 27:5, 7).
Mulimuli ane, a o taumafai e faasino se taavale i le falesa, sa ou faaaogaina le igoa atoa o le Ekalesia e taitai ai le avetaavale i le mea ma te o i ai. Sa ou faaeteete ia aua nei ou aveesea “Iesu Keriso.”
Sa ou tei ina ua tau mai e le avetaavale ia i ma’ua na te le iloaina le nofoaga. Ina ua fesili atu lau soa i le tamaloa pe na faalogo o ia i le Ekalesia AAG, sa ia fai mai, “Ioe.”
Talu ai na tatou valaauina i tatou lava o “Mamona” ma le “AAG,” sa lei iloa e tagata le igoa atoa o le Ekalesia. Sa ou filifili e tatalo ina ia iloa e i tatou o tagata o le Ekalesia la tatou mea sese. A o mafaufau e uiga i lenei mea, sa ou manatuaina le perofeta. Sa ou malamalama e na o le perofeta lava e mafai ona saunoa mo le Alii i le lalolagi atoa, afai la o le a tupu se suiga, o le a manaomia ona sau mai ia te ia.
Ae sa ou mafaufau ia te au lava, “E faapefea ona mafai lenei mea? E oo lava i le uepisaite a le Ekalesia ua faapuupuuina ‘LDS.org.’ O le a faapefea ona suia lena mea?”
I a tatou tatalo, sa tatou aioi atu ai ma le naunautai i le Tama Faalelagi e musuia Lana auauna, le perofeta, e taiala i tatou i lenei mataupu taua. Sa ou faatuatua e faaali moni mai e le Atua Lona finagalo i Lana perofeta.
Sa faatulagaina au ina ia faamaloloina mai le Misiona a Benin City Nigeria ia Setema 2018. Ae o le aso na faauma ai la’u misiona na suia ia Oketopa—o Oketopa lava lea na tuuina atu ai e Peresitene Russell M. Nelson se savali taua i le Ekalesia i le lalolagi atoa:
Mo le toatele o le lalolagi, o loo latou iloaina sese le Ekalesia a le Alii i le taimi nei o le “Ekalesia Mamona.” Ae o i tatou i le avea ai ma tagata o le Ekalesia a le Alii, ua iloaina le o loo tu i le ulu: o Iesu Keriso lava Ia. …
“… Atonu o le a mulimuli pe leai foi, le lalolagi i la tatou ta’imua i le valaauina o i tatou i le igoa sa’o. Ae o se le faamaoni mo i tatou le le fiafia pe afai e valaau e le toatele o le lalolagi le Ekalesia ma ona tagata i igoa sese ae o loo tatou faia foi lea mea e tasi.”1
E le mafai ona e vaai faalemafaufau i le faate’ia ma le fiafia sa oo mai! Sa matua manino lava le savali a Peresitene Nelson, ma sa ou lagonaina ua taliina a tatou tatalo. Sa le mafai ona faamatala lo’u lotofaafetai.
O lenei aafiaga ua faaopoopo i la‘u molimau e taliina tatalo ma e musuia e le Tama Faalelagi Ana perofeta. O le Ekalesia lenei a le Alii, ma Na te silafia le mea e fai i Lana Ekalesia. E oo lava i le uepisaite a le Ekalesia, lea sa ou manatu e le mafai ona suia, sa faafouina i le ChurchofJesusChrist.org.
Ou te iloa o Peresitene Nelson ua valaauina e le Atua. Ou te iloa foi sa lei faaigoaina e le Perofeta o Iosefa Samita le Ekalesia lea na toefuatai mai e ala mai ia te ia. E lei faia foi e Mamona. O le Faaola lava Ia na fetalai, ‘Aua o le a faapea ona ta’ua la’u ekalesia i aso e gata ai, O Le Ekalesia a Iesu Keriso o le Au Paia o Aso e Gata Ai.’ (Mataupu Faavae ma Feagaiga 115:4).