O Galuega o le Malumalu e Faamanuiaina ai Tagata Uma, O E o Soifua ma E Ua Maliliu
E alala le tusitala i Gauteng, Aferika i Saute.
I le 2018, sa ou faia ai se sini ia maua se pepa faataga o le malumalu. I le tasi le tausaga mulimuli ane, sa faamauina ai i ma’ua ma la’u uo i le malumalu mo le faavavau atoa.
Malumalu o Johannesburg Aferika i Saute
Agavale: ata na pueina e Fernando Bragança
Pe a faasilasila mai ni asiasiga i le malumalu mo la’u paranesi, sa ou auai. E ui lava ina sa le mafai ona ou ulufale i le malumalu, ae sa masani ona ou savali i lotoa o le malumalu. Sa ou tatalo i le Tama Faalelagi ma faailoa atu i ai o’u manaoga sili ona loloto ia i ai se aso e ulu atu ai i le malumalu. O nisi o nei asiasiga sa na o le 10 minute, ae sa i ai se aafiaga maoae i lo’u agaga.
I se tasi o afiafi sa matua malulu ma timuga, sa tuai ai ona ou taunuu i le malumalu. E ui ina sa tapunia laufanua, ae sa faatagaina a’u e le leoleo mo ni nai minute i le lotoa. Sa ia te a’u se kopi o le tatalo o le faapaiaga o le malumalu. Sa uunaia au e faitau i ai.
Sa faatumulia a’u i lagona ootia, a o ou faitau i upu nei: “Sei E musumusu atu le filemu i Lou nuu e ala i le mana o Lou Agaga pe a latou o mai iinei ma loto mafatia e saili le taitaiga i o latou faafatiatamaiga. Sei E faamafanafanaina ma lagolagoina i latou pe a oo mai i taimi o le faanoanoa. Sei E tuu atu ia te i latou le lototele, taitaiga, ma le faatuatua, pe a latou faapotopoto, e pei o se sulufaiga, mai le vevesi o le lalolagi. Sei E faamautinoa atu ia te i latou Lou moni ma le paia, ma le moni ma le paia o Lou Alo toetu. “1
Sa ou iloa ai i lena taimi, o a’u asiasiga i le lotoa o le malumalu o se mea e taua i le Alii, e ui lava ou te lei i ai i totonu o le malumalu.
O La’u Sini ia Auai Ai
O lo’u manao e auai i le malumalu na amata i se tasi taeao ia Tesema 2018. Sa ou nofo i le moega ma faitau se lauga o le konafesi aoao ia Aperila 1999 na saunia e Elder Richard G. Scott (1928 – 2015) o le Korama a Aposetolo e Toasefululua. Sa ia saunoa e uiga i le taua o le agavaa e ulu atu i le malumalu. Sa ia saunoa o le malumalu “o se nofoaga o le filemu, taaligoligoa, ma musumusuga. O le auai e le aunoa o le a faatamaoaigaina ai lou olaga ma se faamoemoega sili atu. ” Sa ia faaauau ona faaopoopo atu lenei faamatalaga ofoofogia: “Alu i le malumalu. Ua e iloa o le mea sa’o lea e fai. Fai nei loa.”2
Sa ou faamamafaina lenei fuaitau, tilotilo i la’u kalena a le siteki 2019, ma iloa ai ua faatulagaina la’u paranesi e asiasi i le malumalu o Johannesburg Aferika i Saute i le Aso Faraile lona lua uma o le masina. Sa ou faia se sini e alu i le lotoa o le malumalu pe a ma le tasi i le masina ma la’u paranesi pe na o a’u lava ia, e ui lava e lei i ai so’u pepa faataga o le malumalu.
Agavaa e Ulufale
I le amataga o Ianuari, sa ou talanoa ai i lo’u peresitene o le paranesi e uiga i le mauaina o se pepa faataga ma sa i’u ai ina ulufale atu i le malumalu. Sa ou naunau ia ausia lenei sini.
Ia Aokuso, sa ou maua ai se pepa faataga e faatapulaa le faaaogaina ma sa mafai ona ou asiasi atu ma le autalavou a la’u paranesi. Sa ou papatiso mo toeaiina e toalua o lo’u aiga ma le tamamatua i le itu o lo’u tina. Sa amata foi ona ou auai i le vasega sauniuni mo le malumalu ma le faamoemoe ia maua ou faaeega paia. Seia oo i lena taimi sa faaauau pea ona ou asiasi atu i le malumalu ma auai i le faatinoga o papatisoga.
Mulimuli ane, i le aso 2 o Novema, 2019, sa ma ulufale atu ai i le malumalu ma la’u uo, ma sa ma savavali mai i fafo o se tane ma se ava, ua faamauina mo le olaga nei ma le faavavau. E le mafai e upu ona faamatalaina le agaga na auai i lenei sauniga tele. Sa faaauau pea ona ma auai atu ma lo’u toalua i le malumalu. Sa tele ni o ma aafiaga taua ma le paia seia oo ina tapunia malumalu i le lalolagi atoa i le 2020 ona o le KOVITI-19.
O Sister ma Brother Mncwabe (ogatotonu) i le aso o la laua faamauga, faatasi ai ma tagata o le aiga.
Luga: atapue mai faaaloaloga a le aiga o Mncwabe
O Le Malumalu e mo Tagata Uma
O le uso o lo’u tina e le o se tagata o le Ekalesia, ae na sau o ia i le malumalu mo la ma faamauga. Mulimuli ane, sa ia faasoa mai se aafiaga na ia maua ina ua uma ona asiasi atu i le lotoa o le malumalu. Sa i ai sana miti sa toe i ai o ia i le malumalu mo la ma faamauga, ae o le taimi lenei o tagata uma o lo’u aiga (e aofia ai i latou sa ou faia papatisoga mo latou) sa faatasi mai ai. “Sa i ai foi lou tina iina,” sa ia fai mai ai, “ae sa ia fai mai pea, e le o mafai ona ou vaai i la’u tama. Aisea ua le mafai ai ona ou vaai i la’u tama?”
Sa ou tagi ina ua ou faalogo i lenei mea, ma sa ou iloa ai le mafuaaga na le mafai ai e lou tina ona vaai mai ia te au. Sa maliu o ia i le 2002, ma sa faatuai ona ou faia ona sauniga mo ia i totonu o le malumalu. Sa tonu ia te au ou te faia lenei mea i le vave e mafai ai. E lei umi ae ou maua le avanoa e faatino ai lona papatisoga ma ta’u lona igoa atoa a o ou papatisoina le tamaitai talavou o le sa avea ma sui mo lo’u tina.
E i ai sa’u molimau malosi o le malumalu o le maota o le Atua. E mafai ona tatou maua Lona mana pe a tatou i ai iina. Ua ou iloa foi o le malumalu e ofo mai ai faamanuiaga i fanau uma a le Atua, pe o soifua pe ua maliliu.