Folasia Atu o le Malumalu i a Tatou Uo

Saunia e Myriam Vega

E alala le tusitala i Quebec, Kanata.

Sa ou lagonaina le olioli tele ina ua matou auai faatasi ma a’u uo e toalua i le maimoaga i le malumalu.

Montreal Quebec Temple — Malumalu o Montreal Quebec

Ina ua toe faapaiaina le Malumalu o Montreal Quebec i le mavae ai o ni faafouga tetele i le 2015, sa faatulagaina ni maimoaga e o matou taitai i le lotoifale. O se taimi lelei lea e valaaulia ai uo e o mai ma vaai i le malumalu.

Sa vave ona ou mafaufau i ni uo lelei se toalua o e ua uma ona fesili mai ia te au e uiga i le Ekalesia ma o’u talitonuga. I aso ua mavae, sa malilie uma i laua e o mai i le sauniga faamanatuga i le taimi o le Kerisimasi. Sa ou valaauliaina foi i la’ua i la’u faaipoipoga i le lua tausaga talu ai. O se avanoa lena e faamatala atu ai ia i la’ua le mafuaaga e mafai ai ona la o atu i le taumafataga, ae le o le sauniga o le faamauga i le malumalu.¹

Ae, e ui lava sa ou talanoa muamua ma i la’ua e uiga i le Ekalesia, ae sa ou le mautonu e valaaulia i la’ua. Sa ou fefe i le i ai i se tulaga le lelei pe afai la te mumusu. Mulimuli ane, sa ou maua le lototele ma fesili i ai i luga o le telefoni: “Lua te fia vaai i le nofoaga na ou faaipoipo ai? Ua tatala le malumalu i tagata lautele mo maimoaga e taialaina. Afai lua te fiafia i ai, e mafai ona tatou o faatasi.”

O le tali i tulaga uma e lua o le “Ioe! Ou te fia manao ai.”

Sa o mai se tasi o au uo ma lana fanau e toalua, ae o le isi na o mai ma lona toalua. O se aafiaga e le mafaagaloina mo au. Sa ou lagonaina le olioli tele i le mafai ona faasoa atu o lo’u alofa mo le malumalu ia i laua.

I lana saunoaga i le konafesi aoao ia Oketopa 2020, “Fautuaina i le Alii,” na faamanatu mai ai e Elder Ronald A. Rasband o le Korama a Aposetolo e Toasefululua ia i tatou: ”I fafo atu o malumalu uma i le Ekalesia, o loo i ai upu e fetaui lelei “E Paia i le Alii.” O le malumalu o le maota o le Alii ma o se maluapapa mai le lalolagi. E vagaia e Lona Agaga i latou o e tapuai atu i totonu o na puipui paia. Na te faatuina tulaga faatonuina ia tatou te ulufale atu ai o ni Ana malo.²

Ua avea le malumalu o se sulufaiga mai mea leaga o le lalolagi. Pe a ou manatua lena mea, ou te malamalama ai pe aisea e tatau ai ona ola i latou o e ulu atu i ai, i o tatou olaga e tusa ai ma aoaoga a le Alii e pei ona maua i Le Ekalesia a Iesu Keriso o le Au Paia o Aso e Gata Ai. O le mea moni, ua valaaulia tagata uma ia lagonaina le olioli i le osia o feagaiga paia ma le Atua. Ae ina ia faia lena mea, e tatau ona tatou ausia ia tulaga ua ia faatulagaina e agavaa ai mo se pepa faataga. O la tatou lava matafaioi le fai o se tonu pe mulimuli i Ana tulafono.

Pe a tatou faamalamalama atu i a tatou uo le eseesega i le va o se malumalu ma se falelotu, e mafai ona na ona ta’u atu i ai:

O le malumalu o le maota o le Atua. O se nofoaga filemu lea e mafai ai e tagata faamaoni o Le Ekalesia a Iesu Keriso o le Au Paia o Aso e Gata Ai ona faia ni folafolaga paia i le Atua o le a latou ola e tusa ai ma Ana poloaiga. O se nofoaga tatou te aoao atili ai e uiga i lo tatou faamoemoega i le olaga ma le mea e mafai ona faamauina faatasi ai aiga e faavavau. I totonu o le malumalu e mafai ona tatou faatinoina sauniga o le talalelei, e pei o le papatisoga, mo o tatou tuaa o e lei maua se avanoa e talia ai a o soifua.
O falelotu o ni nofoaga e talileleia ai, ia e potopoto ai tagata i Aso Sa e aoao ai e uiga i le Tama Faalelagi ma Iesu Keriso ma aai ma feinu ai i le faamanatuga. I aso o le vaiaso, tatou te faaaogaina ai falelotu mo gaoioiga faaagafesootai po o taaloga. E talileleia tagata asiasi i taimi uma i o tatou falelotu, i Aso Sa ma i le aluga o le vaiaso.

E mafai ona fesoasoani le na o le faasoa atu o a tatou molimau ia tatou uo i le uiga o le malumalu ia i tatou, latou te lagonaina ai le Agaga. O le a molimau atu ai ia i latou e uiga i le paia o lenei nofoaga.

Ou te manatu i le malumalu ma le faaaloalo tele ma le lotofaafetai. Pe a ou alu i ai iina, ou te lagona e pei ua tele atu se vaaiga i lou olaga. E mafai ona ou toe laa i tua mai luitau ma te feagai ma maua se manatu manino i le mea e tatau ona avea ma a’u taulaiga i aso taitasi. Ou te lagona le latalata atili atu i lo’u Faaola o Iesu Keriso ae faapea foi i tagata o lo’u aiga, i le taimi nei ma le tuanai.

Sister and Brother Glowa in front of the temple — O Tuafafine ma Uso Vega i luma o le malumalu i le aso o la laua faamauga.

O a’u asiasiga e sili ona fiafia i ai i le malumalu o taimi ma te o ai ma lo’u toalua. E faamalosia lo tatou alofa pe a tatou manatua feagaiga tatou te osia ma lo tatou Tama i le Lagi ma le tasi ma le isi e pei ona faamauina ai i tatou mo le olaga nei ma le faavavau atoa.