E Na’o le Faatekinolosi: Mataupu Faavae o le Auaunaga

O Auala e 9 e Faia ai se Eseesega Mamana: Fatuina o se Lagona o le Auai i le Ekalesia

Tatou te faia uma lava se vaega ia avea ai le lotu o se nofoaga talileleia.

O le faafeiloai atu i isi, e aofia ai i latou, ma fesoasoani ia latou iloa e faaaofiaina i latou o ni auala taua uma ia tatou te lagolagoina ai le tasi ma le isi i luga o le ala o feagaiga ina ia mafai ai e le Faaola ona faamalolo i tatou (tagai Eperu 12:12–13; 3 Nifae 18:22–23, 32). O le lotogatasi o se vaega taua foi o le fausiaina o Siona (tagai i le 4 Nifae 1:15–17; Mataupu Faavae ma Feagaiga 38:24–27; Mose 7:18–19).

Pe e te fou i le Ekalesia, faatoa siitia atu i se uarota fou, pe sa i ai i se uarota mo sina taimi, o auala nei e iva e mafai ona tatou faia ai le lotu o se nofoaga talileleia lea e auai ai tagata uma.

Afai E Te Fou i le Uarota

1. Auai i sauniga ma gaoioiga. E pei ona masani ai, tatou te faia ni uo e ala i le faatasi ma isi tagata ma faamasani ia i latou. Taunuu i sauniga a le Ekalesia ma gaoioiga i ni nai minute ao lei amata pe nofo pe a mae’a e feiloai i tagata fou. E mafai foi ona e saini e auauna atu pe a manaomia se fesoasoani. O auala faigofie nei e faia ai ni fesootaiga e mafai ona liua i ni faigauo.

2. Tagai mo malosiaga. Faailoa atu faalauaitele ma faalilolilo ia malosiaga e te vaaia i lau uarota fou, taitai, ma le nuu. Nai lo le na o le mafaufau i le nofoaga matagofie na e tuua, ia iloa po o le a le mea matagofie e uiga i lau uarota fou ma talanoa po o ai na e feiloai i ai i le asō. Fesili atu i isi mo faamatalaga ma manatu e uiga i le mea e fai, nofoaga e fai ai faatau, ma le auala e maua ai se fomai nifo lelei po o ni nofoaga e aai ai. Mafaufau e o faatasi i nisi o nofoaga tou te talanoaina.

3. Faauo i tagata fou. Aua e te manatu o tagata o loo nonofo i ou autafa i le Aoga Sa ua tele tausaga o i ai iina. Manatu faapea e fou foi i latou, ma o loo latou faatalitali mo oe e fesoasoani i le uarota ia lagona le talialelei o i latou. Faailoa atu oe lava ma ia e fia iloa e uiga ia i latou, e tusa lava po o le a le umi na latou i ai iina. Ma toe fai lena mea i le vaiaso e sosoo ai ma le isi.

4. Ia onosai. Ia onosai ia te oe lava ma faatasi ai ma isi a o e taumafai e fausia ni faigauo. Afai e le fia manao i ai se tasi e te valaaulia mo se taumafataga o le afiafi, fesili i se isi tagata. Afai e alu se isi masina e aunoa ma lou mauaina o se valaauga, toe talanoa ma taitai o le uarota e uiga i le auala e mafai ona e auauna atu ai.

Afai Ua E i ai i le Uarota mo Sina Taimi

1. Tatalo po o fea e te nofo ai. Atonu e te le lagonaina i taimi uma le fia nofo i talaane o se tasi e te le iloa, ae a e taunuu atu mo se sauniga a le Ekalesia, ia naunau e tu i le faitotoa ma tatalo mo se taitaiga po o ai e te nofo ai i autafa. Ona faatino lea o uunaiga e faamasani atili ai i isi.

2. Fesili atu pe mafai faapefea ona e auauna atu i isi. Faailoa atu i taitai o le uarota ua e naunau e faamasani i se tagata fou ma ua e naunau e fesoasoani pe a manaomia e isi se uo. O le auauna atu i isi ma le aoao e tausi moni lava o se tasi lea o auala sili ona lelei e fatu ai ni faauoga. Tatalo ia iloa le mea e mafai ona e faia e fesoasoani ai i isi ia lagona le taliaina ma le alofaina, e tusa lava po o le a le umi na latou i ai i le uarota.

3. Faataitai le fefaasoaai o le alofa. O le fatuina o se nuu o le faaauai mo isi o se faailoaga lea o le alofa mama—o le alofa mama o Keriso o loo tatou taumafai e atiina ae. Ae e le tutusa uma le talenia o i tatou i tomai po o manaoga e manuia ai. Afai e le o se mea masani mo oe le aapa atu i isi, vaavaai mo ni auala e faaitiitia ai le matafefe e atiina ae ni faauoga ma isi, e pei o le valaaulia o se uo lona tolu e auai faatasi ma oe i talanoaga po o tafaoga po o le valaaulia o i latou i gaoioiga ua uma ona e faia.

Afai o Oe o se Taitai o le Uarota

1. Faafeiloai i le faitotoa. Tu latalata i faitotoa o le falesa (pe tuu atu i isi tagata o le uarota e fai) ina ia vaavaai mo tagata e lei leva ona auai pe siitia atu. Ia faamasani ia i latou ma fesili atu mo a latou faamatalaga e faafesootai ai; e mafai foi ona e fai atu ia i latou e pue se ata e mafai ona e faasoa atu i isi taitai o le uarota. Afai e masani ona tele ni tagata fou e masii mai i lau uarota, mafaufau e fatu ni taga lanu sesega ma faamatalaga a le uarota ma se meaai mama e avatu i soo se tasi e fou. Valaaulia tagata uma o le uarota e vaavaai mo na taga lanu sesega ma faia se taumafaiga faaopoopo e faafeiloai ai soo se tasi o loo uuina.

2. Ia faia o se taumafaiga a le uarota. Mafaufau e avea faauooga ma le faaaofiaina o se sini a le uarota. Talanoa faatasi i fonotaga a korama ma vasega e uiga i auala e fesoasoani ai i isi ia lagona le faauoina. Ia aofia ai se faamanatu mai lea taimi i lea taimi i fesootaiga a le uarota po o luga o laupapa puletini.

E mafai ona e auina mai lau lava tala, manatu, poo manatu faaalia i le liahona.ChurchofJesusChrist.org. Ua le mafai ona tatali lo matou fia faalogo atu ia te oe!