Pe Mata Ea O Le A Avea A’u ma Ni O?
A o ou usuina ni upu eseese mai isi tagata uma, sa ou lagona le pei o se tagata ese.
Ata na pueina e Nikki Reier
Ia Ianuari 2009, sa ma felelei ai ma lo’u toalua i Siamani. Sa ia taliaina se galuega iina, ma sa matou faaaluina se vaiaso i Perelini e saunia ai e siitia lo matou aiga.
O le taimi lava lena, sa ou lagona ai le lofituina i eseesega i le va o Siamani ma le Iunaite Setete. O lena po, ou te lei tuua lo ma faletalimalo.
Ae o le taeao na sosoo ai, o le Aso Sa, sa ou aoina mai ai lou lototele e auai i le sauniga faamanatuga. Ina ua ma ulu atu i le falesa, sa iloa mai i ma’ua o ni tagata Amerika e se alii agalelei ma tuuina mai ia i matou se tusi pese faa-Peretania. A o ou saofai i le laina i tua ma usu ni upu e ese mai isi tagata uma, sa ou lagona le pei o se tagata ese.
Sa tuuina mai e le uarota le faaliliuga faa-Peretania ma tuuina mai ia i matou meafaalogo. E oo atu i le afa o le sauniga, sa ou manao e toso ese a’u meafaalogo ma toe foi atu i la’u uarota Amerika. Ae ina ua ou usuina le fuaiupu lona lua o le “Le Faavae Malosi,” sa pueina e le Agaga Paia lo’u loto.
Pe lata pe mamao, i tai, po o uta—
E tusa ma le aso … mea na te ia to mai.1
Sa lagona e le viiga e pei o se savali mai le Alii. Sa tafe ifo loimata i o’u alafau a o ou faanatinati atu i le faapaologa, lea na tuu mai ai e se alii mata agamalu ia te au lana ta’ui o pepa solo. (E leai se tasi i le uarota e le o i ai ni pepa solo.)
Faatopetope atu i le tolu ma le afa tausaga. I le falelotu lava e tasi i se taeao o le Aso Sa ia Iuni, na amata ai e le ta okeni ona tata se viiga. Sa ou susu’e la’u tusipese faa-Siamani ma amata loa ona ou pese.
O le taimi lena na toe siomia ai au e le Agaga Paia. Sa ou toe usuina le pese “Le Faavae Malosi,” ae sa ese mea uma.
Sa ou tilotilo solo. Nai lo le vaai atu i ni tagata ese, sa ou vaaia ni uo. Sa nofo i o’u tua lo matou peresitene o le siteki, o le sa vave ona iloa o ma igoa. I le laina pito i luma, sa soosoo tau’au ai lo’u atalii tiakono ma alii talavou o e sa asiasi atu ia te ia i le falemai ina ua maua o ia i le mai suka. I o latou autafa sa nofo ai le taitai o Tamaitai Talavou o le sa aoaoina la’u tama teine e fai ni panikeke pateta mananaia.
I le falesa atoa sa nonofo ai le au talavou sa ou faiaoga ai ma alofa i ai i se vasega inisitituti i le gagana Peretania, o o’u faiaoga asiasi faamaoni, ma isi o e na auai ma le fiafia i vasega siva a le uarota i le potusiva na fai mai le epikopo ia te au e faiaoga ai.
Sa nenefu la’u vaai i loimata, ae o le taimi lenei ou te lei alu ese mai le falesa. Nai lo lena, sa ou lagaina la’u ato mo la’u lava ta’ui o pepa solo
E leai se tasi i le uarota e aunoa ma se pepa solo.