Ou te Lei Fiafia i Galuega o Talafaasolopito o Aiga. Ae Na Ou Mauaina Vavega

Saunia e Yvonne Liu

Sa lei tele ni faamatalaga a lou aiga i Taiuani i lo matou talafaasolopito o aiga, ae e ala i le faatinoina o le faatuatua, sa mafai ai ona ou molimauina ni vavega.

o se tamaitai talavou o loo tilotilo atu i se tusi o atapue

Ina ua 10 o‘u tausaga ma nofo i Taiuani, sa faailoa atu e lo’u tinamatua faifeautalai i lo matou aiga. Sa mafai e lo‘u tama ona papatiso a’u, lo‘u tina, ma lo’u tuagane. Peitai, e lei leva ona uma ona faamauina i matou i le malumalu, ae le toe o mai uma lo‘u aiga i le lotu.

O lea la, o le mea masani lava, o le tiutetauave o le galuega o talafaasolopito o aiga na pau i luga o o‘u tauau. Ae o lena galuega sa lei faigofie lava mo au.

Sa ou taumafai e mulimuli i valaaulia mai o tatou taitai o le Ekalesia e fai lenei galuega paia, ae ona o ni faafitauli eseese, sa ou le toe faia ai se taumafaiga tele.

Mo se tasi mafuaaga, e le fiafia lava ou matua i le manatu o le faia o galuega faalemalumalu mo e ua maliliu. Sa la lagonaina ua matou faia le faaiuga mo o matou tuaa ia maua sauniga ma o le le faaaloalo lea i lo latou faitalia.

Sa faigata foi ia te au le mauaina o faamatalaga e uiga i o‘u tuaa. O le tele o aiga Saina e tausia se tusi o gafa e taua o se zupu o loo i ai faamaumauga e oo atu i le pe tusa ma le 2000 T.L.M. Ae o le zupu o lo‘u aiga e lei maua ai tausaga na fanau ai ma maliu ai o’u tuaa alii po o soo se faamatalaga lava e uiga i o‘u tuaa tamaitai, o lea sa le mafai ai ona ou auina atu ni igoa i le malumalu pe faatino sauniga mo o’u tuaa.

Ina ua mavae nei faafitauli, sa ou fiu i au taumafaiga o talafaasolopito o aiga.

Toe Amataina

E oo ane i le taimi na ou alu ai i le kolisi, ou te lei mafaufau lava e uiga i talafaasolopito o aiga mo le tele o tausaga. Ona oo lea, i le taimi o se tasi o semesa, sa uunaia i matou e la‘u siteki e faatu se sini e ave se igoa o le aiga i le malumalu. Sa folafola mai e o matou taitai o le siteki ia i matou afai matou te tatalo ae matou te lei amataina le faia o galuega o talafaasolopito o aiga, o le a taitai atu i matou i tuaa o e sa mananao e faia o latou sauniga.

I le taimi muamua, sa ou le fiafia tele i lenei valaaulia. Ua uma ona ou taumafai ma na le manuia muamua.

Peitai, a o ou tatalo i aso uma ina ia faamanuiaina i la‘u galuega o talafaasolopito o aiga ma mo se manao e agai pea i luma i a’u taumafaiga, sa faamaluluina lo‘u loto. Ma e lei umi, ae amata ona ou lagonaina se manao e toe amata.

I se tasi po, sa ou lagonaina ai se uunaiga malosi e tatala la‘u gafa o le aiga i luga o le FamilySearch ma saili se laina faapitoa se tasi o tuaa. I le mavae ai o ni sailiga le faamanuiaina o ni nai igoa eseese i se saite saili, sa ou mauaina se itulau uepi mo se tasi o o‘u tuaa.

O le mea moni, o lenei tuaa o se tagata iloga i le taimi o le fetauaiga i Taiuani, ma o ana faamatalaga uma sa faamaumauina i luga o lenei itulau, faatasi ai ma punaoa o loo faapipii ai. Mai iina, sa mafai ai ona ou maua nisi faamatalaga e uiga i lana fanau ma matua.

E ala i lena sailiga o le initoneti, sa mafai ai ona ou maua ma auina atu ni igoa se ono i le malumalu i lena aso, ma i totonu o le masina na ou auina atu ai le silia ma le 50 igoa.

Sa matuā ofoofogia tele.

Pe Sa Ou Faia se Eseesega?

E lei leva ae ou aumaia le tele o igoa i le malumalu, ae sa ou fesiligia pea pe na taliaina e o‘u tuaa i le isi itu o le veli nei sauniga. Sa ou mafaufau pe na ou faia se eseesega.

O lea na ou tatalo ai mo se faamautinoaga. Ma o le isi taimi na ou alu ai i le malumalu, a o ou faamaeaina se faamauga mo se tasi o o‘u tuaa, sa liliu mai le fai faamauga o le malumalu ia te a’u ma loimata i ona mata. Sa ia tau mai ia te au na mafai ona ia lagonaina le fiafia o lou tuaa i le mauaina o le sauniga.

Sa ou iloa sa tali mai le Atua i la‘u tatalo ma o la’u galuega suitulaga mo i latou sa faia moni lava se eseesega.

A o mavae atu le taimi, sa le fiafia pea ou matua i le manatu o le galuega o talafaasolopito o aiga. Ae na ou lagonaina le faamafanafanaina ma le lagolagoina o au e ou tuaa, aemaise lava pe a ou lagonaina le tuuatoatasi e uiga i le avea ai na o au o le tagata malosi i le lotu i lo‘u aiga. Ou te lagona o loo latou fesoasoani foi e faamaluluina loto o ou matua.

Na aoao mai Elder John A. Widtsoe (1872–1952) o le Korama a Aposetolo e Toasefululua e faapea “po o ai lava e saili e fesoasoani ia i latou o i le isi itu e mauaina le fesoasoani e toe faafoi mai ai mea uma o le olaga.”¹

Ma sa ou lagonaina lena fesoasoani o sau mai le isi itu.

O talafaasolopito o aiga o se tasi lea o galuega e sili ona fiafia ma tauia tatou te faia o ni tagata o le Ekalesia a Iesu Keriso. A o tatou faapotopotoina Isaraelu i le isi itu o le veli, ua tatou faapotopotoina se “autau a agelu” e lagolagoina i tatou i la tatou malaga i le olaga nei, o loo tatou fesootai ma le lagi, ma ua tatou latalata atili atu ia Keriso. Ma, e pei ona sa molimau mai Sister Wendy Watson Nelson, “O le galuega o talafaasolopito o aiga o le a aumaia vavega i lou olaga ma olaga o i latou e te alofa i ai.”²

Ou te iloa e moni lea mea.

Motugaafa mo le Sailia o Igoa o le Aiga

Sa ou galue ma le FamilySearch mo se taimi. O lena aafiaga na aoaoina atili ai a‘u i le tele o fesoasoaniga ma auala faigofie mo le sailia o igoa o le aiga. Ua na o nisi nei:

Amata i le tatalo ma mulimuli i le Agaga.

O le sailia o igoa o le aiga e mafai ona talitutusa ma le aafiaga a Nifae ina ua ia aumaia papatusi apamemea (tagai i le 1 Nifae 3–4). Atonu tatou te le iloa po o fea ae pe faapefea foi ona amata, ae afai tatou te talitonu ma faatino i le faatuatua e pei o Nifae, o le a taitaia i tatou e le Agaga. E le tuuina mai e le Alii ia i tatou ni poloaiga e aunoa ma Lona saunia o se ala mo i tatou e faataunuu ai (tagai i le 1 Nifae 3:7). E finagalo le Tama Faalelagi ia tatou maua o tatou tuaa, ma o le a Ia faaali mai ia i tatou le ala a o faaauau pea ona tatou fetaomi atu i luma ma le faatuatua.
Faaaoga le faailoga Pusa o Punaoa i luga o le FamilySearch e galulue ai ma isi.

E foliga mai a o e galue ai i lau laina o talafaasolopito o aiga, o loo galulue foi isi tauaiga mamao i le laina lava e tasi. E mafai ona e faaopoopo auiliiliga i le Pusa o Punaoa e ta‘u atu ai i isi le mea na e maua ai faamatalaga e uiga i ou tuaa, le sa’o o le faamatalaga, ma po o a faamatalaga o loo manaomia pea ona ao mai. E mafai ona e maua nisi faamatalaga e uiga i le faailoga o le Pusa o Punaoa i luga o le uepisaite FamilySearch.
Mafaufau e saili i punaoa e ono i ai faamatalaga e uiga i lou gafa.

Afai e le tele ni au faamatalaga e uiga i le gafa o lou aiga, e mafai ona avea ofisa o le malo i le lotoifale ma se nofoaga sili e amata ai, e pei ona latou maua ai ni faamaumauga patino.

O loo i ai foi i le FamilySearch le silia ma le ono piliona faamaumauga mai le lalolagi atoa e tuusaoloto i soo se tasi e i ai se faitotoa o le FamilySearch. Faaaoga le vaaiga o Faaiteite o Faamaumauga i le FamilySearch e su‘e ai ou tuaa ma vaavaai mo punavai uma e mafai ona i ai, mai faamaumauga o faaipoipoga i faamaumauga o maliu, e uiga i ou tuaa.

E mafai foi ona e taumafai e ta igoa o tagata o lou aiga i totonu o se saite saili. Atonu e te maua le tele o faamatalaga i luga o le initoneti pe afai na lauiloa ou tuaa pe sa auai foi i ni mea faapitoa na tutupu i le aluga o o latou olaga.

O le fesootai atu i tagata o le aiga lautele o loo soifua e mafai foi ona fesoasoani. Atonu e mafai ona latou taliina fesili e uiga i ou tuaa. O se ‘alofaga lelei foi e maua ai se sootaga lelei ma aiga atonu e te le iloaina lelei.

Ma le mea mulimuli, faalautele ou mafaufauga. Mo se faataitaiga, aua le fefe e asiasi i eria (pe aapa atu i ala o faasalalauga faaagafesootai i se tasi e nofo i se eria) lea sa nonofo ai ou tuaa. Atonu e te maua ni faamatalaga e faateia ai oe.

O galuega o talafaasolopito o aiga e mafai ona faigata i nisi taimi, ae e tele naua punaoa e fesoasoani ia te oe i le aluga o le ala. E tatau lava ona tatou naunau e aapa atu ma agai i luma!