Mamalu I le Silisiliese

Saunia e Elder Inoke Fotu Kupu

Fitugafulu Eria

O Aperila 7, 2019, o se aso matuā ofoofogia lava, o se aso o le a ou faapelepeleina pea. Sa maua ai e i ma’ua ma Elder Vaiangina Sikahema, o le Fitugafulu, faatasi ai ma o ma taito’alua, se aafiaga suamalie ma faaleagaga, a o matou nonofo i le Nofoaga Autu mo Konafesi i le taimi o le sauniga faaiu o le konafesi aoao.¹ Sa faasilasila mai e Peresitene Russell M. Nelson se malumalu fou mo Neiafu, Toga. I le autasi ai ma o matou tagata i atumotu ma le lalolagi atoa, sa matou tagi ifo loimata o le faafetai a o matou faafetai faatamalii i le Atua mo Lona agalelei ma le alofa faifai pea. Sa faatumulia o matou loto i le alofa tele mo o matou tua’ā o e ua pasi atu i tua atu o le veli, a o matou manatuaina lo latou faatuatua ma osigataulaga maoa’e sa latou faia i tausaga e tele e fausia le malo o le Atua i Toga.

Sa mua’i taunuu faifeautalai mai i Le Ekalesia a Iesu Keriso o le Au Paia o Aso e Gata Ai i Toga i le 1891, ae sa itiiti le faamanuiaina, sa latou toe o ese ai mai lo matou atunuu.² Ona oo lea i le 1907, sa latou taunuu ai i le Motu o Vava’u; sa latou ui mai i Samoa. Sa matuā tele se osigataulaga a tagata o Vava’u ina ia fausia le Ekalesia, lea na mulimuli ane faalauteleina atu i Togatapu ma isi motu o Toga.

E tusa e 57 tausaga faatoa faamanuiaina ai tagata o le Ekalesia e ulufale atu i le Malumalu o Hamilton Niu Sila, o le malumalu sili ona latalata atu ia i latou i lea taimi. Sa faatau ese atu e le Au Paia o Toga a latou meatotino uma ina ia mafai ai ona malaga i le vaa po o le vaalele e ulufale atu i lena malumalu. E fia sefulu tausaga mulimuli ane, sa fausiaina ma faapaiaina ai le Malumalu o Nuku’alofa Toga i le 1983, ma maua ai e le Au Paia le avanoa e ulufale ai i se malumalu latalata i o latou lava aiga.

I le taimi lenei, o le i ai o se malumalu lona lua i lenei tama’i atumotu o Toga o se meaalofa moni lava o le alofa mai le Atua i Lana fanau i motu o le sami.

I lana saunoaga ia Oketopa 2020 i le konafesi aoao, sa folafola mai e Peresitene Russell M. Nelson: “O loo faapotopotoina mai e le Alii i latou o loo loto e faamuamua le Atua i o latou olaga.”³ O le malumalu o le faailoga sili lea o lenei faapotopotoga ma o le i ai o se malumalu e mafai e le tele o le Au Paia ona savavali i ai, o se faailoga lea o loo tatou loto e faamuamua le Atua i o tatou olaga.

O lu’itau o ni nai tausaga ua mavae atu sa tofotofoina le faatuatua o le Au Paia i le motu o Vava’u. O le seleselega mai a latou meatoto na matuā afaina i le leaga o le tau i taimi uma; sa latou feagai ma le aafiaga o ni afā na taia ai le atunuu; sa latou feagai ma le tele o faigata tau le tamaoaiga ona o le Koviti-19 ma ona ituaiga eseese ma sa tauivi i luitau i totonu o o latou nuu. E ui lava i nei tofotofoga, ua faaauau pea e le Au Paia ona tuu ia faamuamua le Atua i o latou olaga ona latou te malamalama i le folafolaga na faia e Peresitene Nelson faapea, “a o outou filifili e faamuamua le Atua i o outou olaga, o le a outou lagonaina mo outou lava o lo tatou Atua o ‘se Atua o vavega.’”⁴

Ina ua mae’a ona faasilasila mai e le Au Peresitene Sili le suatia o le eleele mo le Malumalu o Neiafu Toga o le a faia ia Setema 11, 2021, o i latou uma lava sa i ai sa latou vaega e faia sa galulue loa lava i le taimi lena i lalo o le taitaiga poto a o tatou taitai i le Eria o le Pasefika ma le laumua o le Ekalesia. E le i sologa lelei le folauga, ae sa matou molimauina le aao o le Atua Silisiliese o taitaia i matou. Mai le galulue ia maua le pemita faufale, e oo atu i fetuunaiga o Totogi o le Iloiloga o le Siosiomaga Faalelotoifale na manaomia e le Tulafono, e oo atu i sauniuniga faaiu o le nofoaga mo le Malumalu, ma oo atu ai i le sauniga o le suatiaina o le eleele, sa i ai lu’itau.

O se vaega mai se ripoti na saunia e Uso Tukia ma Tuafafine Linda Havea, o taitai komiti faamaopoopo o le suatiaina o le eleele, ua sili le faamatalaina mai o lenei taualumaga paia faatupu faatuatua ma faavavega.

I le po o Setema 10, 2021, sa taumafai tagata o le Ekalesia e faamae’a tapenapenaga mo le fanua o le malumalu e suatia. Sa le muta le timu. E oo lava i le taeao po, sa timu pea. Ae peitai, sa alafa’i mai le Au Paia aua o le aso lenei sa vaai faalemafaufau i ai, tatalo, ma ositaulaga ai o latou tuaa. Sa vave ona tumutumu atu i Saineha, o se upu e tutusa ma le La; o se punavai o le malosi ma le faamalologa faaleagaga. O le nofoaga lea o le malumalu fou.

Oka se lagona maoa’e o le to’afilemu. Sa matuā toafilemu ma na toatele na tutulu lemu i le lotomaualalo ma le faafetai. Sa nonofo le Au Paia i le itu taumatau o le maota malu tautupu. …O tagata uma o le Ekalesia, le aufaipese ma taitai o le Ekalesia i le polokalama sa ono aafia i latou i elemene i le leai o se malutaga. O leo o le Aufaipese a le Tapeneko sa mautinoa le faamalieina uma ai e ui lava i le taufaafefe o ao pogisa o afā sa lalata mai i o latou luga. Na amata le polokalama e pei ona fuafuaina e aunoa ma se timu, aua na te’a ese ao. Na oo mai le taimi ofoofogia ina ua amata e Elder Kupu le tatalo o le faapa’iaga mo le suatia o le eleele; na susulu mai le la, ma ufitia ai le nofoaga i lona susulu, ma faalauteleina atili ai le agaga na matuā tele ma manumalo ai. Sa tutulu tagata uma i le olioli ma le faamemelo i le Pule Aoao o Lē na faaali maia ma le ofoofogia ma le mamalu i Ē UMA sa auai o lenei suataga o le fanua e moni lava, o se galuega na auina mai le lagi!

O le mamalu i le Silisiliese, o Lē o se “Atua o vavega.”⁵ Ou te molimau atu afai tatou te faatagaina o ia, o Lē ua “aunoa . . . ma se amataga o aso po o se gataaga o tausaga” e manumalo i o tatou olaga, o le a faifaipea ona molimauina “galuega a [Ona aao],”⁶ e pei lava ona ou molimauina mo a’u lava Lona mana ma Lana fesoasoani faavavega i le taimi o le suatiaina o le eleele paia o le Malumalu o Neiafu Toga.