« តើខ្ញុំចង់ថយទៅឬ ? » លីអាហូណា ខែ មីនា/ខែ មេសា ឆ្នាំ ២០២២ ។
សំឡេងពួកបរិសុទ្ធថ្ងៃចុងក្រោយ ៖ ស្ដ្រីនៃសេចក្តីជំនឿ
តើខ្ញុំចង់ថយទៅឬ ?
បន្ទាប់ពីខ្ញុំបានអាក់អន់ចិត្តអំឡុងពេលសកម្មភាពសមាគមសង្គ្រោះ នោះខ្ញុំត្រូវធ្វើការសម្រេចចិត្តមួយ ។
បានថតដោយតួសម្តែង
មិនយូរប៉ុន្មានបន្ទាប់ពីខ្ញុំបានចូលរួមក្នុងសាសនាចក្រ នោះមានអ្នកដឹកនាំសមាគមសង្គ្រោះម្នាក់បាននិយាយលេងសើចអំពីរឿងកំប្លែងមួយ ។ ភ្លាមនោះស្រាប់តែគាត់ចាប់ផ្ដើមនិយាយលេងសើចអំពីខ្ញុំនៅមុខមនុស្សគ្រប់គ្នា ។ ខ្ញុំមានអារម្មណ៍មិនស្រួលទេ ហើយអនុញ្ញាតឲ្យខ្លួនឯងរងការអាក់អន់ចិត្ត ។
គំនិតដំបូងរបស់ខ្ញុំគឺ ខ្ញុំមិនត្រឡប់មកវួដនេះទៀតទេ ។ ខ្ញុំបានបើកព្រះគម្ពីររបស់ខ្ញុំ ដោយព្យាយាមស្វែងរកការលួងលោម ។ នៅពេលខ្ញុំអាន ខ្ញុំបានប៉ះចំខគម្ពីរមួយ ដែលព្រះយេស៊ូវបានសួរអ្នកដែលអាក់អន់ចិត្តដោយការបង្រៀនរបស់ទ្រង់ថា « អ្នករាល់គ្នាចង់ថយទៅដែរឬ ? » ( យ៉ូហាន ៦:៦៧ ) ។
ភ្លាមៗនោះ ខ្ញុំបានឆ្លើយក្នុងចិត្តថា « ទេ ខ្ញុំនឹងមិនថយទៅទេ ! »
ខ្ញុំបានទូរសព្ទទៅប្រធានសមាគមសង្គ្រោះ គាត់បានណែនាំថា ខ្ញុំគួរតែទូរសព្ទទៅបងស្រីនោះ ដែលបានលេងសើចអំពីរូបខ្ញុំ ។ ខ្ញុំបានទូរសព្ទទៅគាត់ ហើយបង្ហាញពីអារម្មណ៍របស់ខ្ញុំ ។ យើងបានសន្និដ្ឋានថា ការចេះលេងសើចកំប្លែងគឺល្អ ប៉ុន្ដែយើងមិនគួរនិយាយលេងសើចអំពីនរណាម្នាក់ ដែលយើងមិនស្គាល់នៅមុខមនុស្សមួយក្រុមនោះទេ ។ យើងក៏បាននិយាយអំពីការប្រយ័ត្នប្រយែងចំពោះសមាជិកវួដថ្មីៗផងដែរ ។
ខ្ញុំបានបន្ដចូលរួមវួដនោះ ពេលខ្ញុំបានរស់នៅទីក្រុងនោះ ។ ខ្ញុំបានមានបទពិសោធន៍ដ៏អស្ចារ្យជាច្រើន បន្ទាប់ពីខ្ញុំបានប្រែចិត្តជឿលើដំណឹងល្អ ។
នៅក្នុងដំណើរផ្ទាល់ខ្លួនខ្ញុំដើម្បីយកឈ្នះលើការអាក់អន់ចិត្ត នោះខ្ញុំឃើញថា ពាក្យសម្ដីដ៏មានប្រយោជន៍ទាំងនេះមកពីថ្នាក់ដឹកនាំសាសនាចក្ររបស់យើង ៖
« ប្រសិនបើបុគ្គលម្នាក់និយាយ ឬធ្វើអ្វីមួយដែលយើងចាត់ទុកថាប្រមាថ នោះកាតព្វកិច្ចដំបូងរបស់យើងគឺ មិនព្រមអាក់អន់ចិត្តឡើយ ហើយបន្ទាប់មក ត្រូវប្រាស្រ័យទាក់ទងជាឯកជន ដោយស្មោះត្រង់ និងដោយផ្ទាល់ទៅកាន់បុគ្គលនោះ » ។ ១
« ខ្ញុំសន្យានឹងបងប្អូនថា នៅពេលបងប្អូនជ្រើសរើសមិនអន់ចិត្ត … នោះបងប្អូននឹងមានអារម្មណ៍ពីសេចក្ដីស្រឡាញ់ និងការយល់ព្រម [ របស់ព្រះអង្គសង្រ្គោះ ] » ។ ២
ខ្ញុំមានអំណរគុណ ដែលខ្ញុំបានជ្រើសរើសមិនចាកចេញពីសាសនាចក្រ ដោយសារសម្ដីដែលមិនប្រុងប្រយ័ត្នមួយ ។ ហើយខ្ញុំមានអំណរគុណ ដែលបានធ្វើជាសមាជិកនៃសាសនាចក្រដែលបានស្ដារឡើងវិញនេះ ជាកន្លែងដែលខ្ញុំទទួលបានកម្លាំង ដើម្បីមានភាពស្មោះត្រង់ ហើយបន្តនៅលើផ្លូវនៃភាពជាសិស្សនេះ ។ ខ្ញុំមានអំណរគុណចំពោះដំបូន្មានរបស់ព្យាការី និងពួកសាវក ដែលបង្រៀនយើងពីរបៀបប្រាស្រ័យទាក់ទងជាមួយបងប្អូនប្រុសស្រីរបស់យើងនៅក្នុងដំណឹងល្អ ។
ខ្ញុំអាចបន្តមានភាពស្មោះត្រង់ ហើយជ្រើសរើស មិន អាក់អន់ចិត្តបាន ។ ខ្ញុំអាចផ្តោតលើការខិតខំរបស់ខ្ញុំផ្ទាល់ ដើម្បីក្លាយដូចជាព្រះគ្រីស្ទ ហើយមានអារម្មណ៍ពីសេចក្ដីស្រឡាញ់ និងការយល់ព្រមរបស់ព្រះអង្គសង្គ្រោះ ។
តើខ្ញុំចង់ថយទៅឬ ? អត់ទេ ។ ខ្ញុំមានទីបន្ទាល់មួយថា នេះគឺជាសាសនាចក្រដែលបានស្ដារឡើងវិញរបស់ព្រះយេស៊ូវគ្រីស្ទនៅលើផែនដីសព្វថ្ងៃនេះ ហើយថាវាមាន « ព្រះបន្ទូលនៃជីវិតដ៏នៅអស់កល្បជានិច្ច » ( យ៉ូហាន ៦:៦៨ ) ។