« ព្រះវិហារបរិសុទ្ធ ៖មុក្តាដ៏មានតម្លៃមហិមា » លីអាហូណា ខែ កក្កដា/សីហា ឆ្នាំ ២០២២ ។
សូមស្វាគមន៍មកកាន់ច្បាប់នេះ
ព្រះវិហារបរិសុទ្ធ ៖មុក្តាដ៏មានតម្លៃមហិមា
រូបថតព្រះវិហារបរិសុទ្ធព្រិកហាំ ស៊ីធីយូថាហ៍
វាជាពរជ័យដ៏អស្ចារ្យអ្វីម្ល៉េះដើម្បីមើលឃើញព្រះវិហារបរិសុទ្ធសាងសង់យ៉ាងច្រើននៅជុំវិញពិភពលោក ។ យើងរីករាយនឹងសមាជិកសាសនាចក្រ ពេលព្រះវិហារបរិសុទ្ធថ្មីត្រូវបានឧទ្ទិសឆ្លងនៅក្នុងតំបន់របស់ពួកគេ ។
យើងសង្ឃឹមថា មនុស្សគ្រប់គ្នានឹងឲ្យតម្លៃទៅលើព្រះវិហារបរិសុទ្ធ និងមិនធ្លាក់ចូលទៅក្នុងកំហុសដែលបានពិពណ៌នាដោយប្រធាន ប៊យដ៍ ឃេ ផាកកឺ( ១៩២៤–២០១៥ ) ប្រធានកូរ៉ុមនៃពួកសាវកដប់ពីរនាក់ ។ នៅក្នុងរឿងប្រៀបប្រដូចរបស់លោកអំពីគុជខ្យង និងប្រអប់ នោះលោកបានលើកឡើងថា មានជាងម្នាក់បានធ្វើប្រអប់មួយយ៉ាងស្អាតដើម្បីដាក់បង្ហាញគុជខ្យងដ៏មានតម្លៃមហិមា ។ ប៉ុន្តែពេលមនុស្សមកមើលគុជខ្យងនោះ ពួកគេបានកោតសរសើរទៅលើប្រអប់នោះទៅវិញ ។ ( សូមមើល « The Cloven Tongues of Fire » Liahonaខែ កក្កដា ឆ្នាំ ២០០០ ទំព័រ ៧ ) ។
ពិតណាស់ គុជខ្យងដ៏មានតម្លៃមហិមានៅក្នុងព្រះវិហារបរិសុទ្ធរួមមាន ពិធីបរិសុទ្ធ សេចក្ដីសញ្ញា និងពរជ័យដែលបានសន្យាដែលយើងអាចទទួលបានតែនៅក្នុងព្រះវិហារបរិសុទ្ធប៉ុណ្ណោះ ។ ដូចដែលអែលឌើរ ដេវីឌ អេ បែដណា ក្នុងកូរ៉ុមនៃពួកសាវកដប់ពីរនាក់បង្រៀននៅក្នុងច្បាប់នេះថា « អ្វីៗគ្រប់យ៉ាងដែលបានរៀនសូត្រ និងអ្វីៗដែលបានធ្វើនៅក្នុងព្រះវិហារបរិសុទ្ធនៃពួកបរិសុទ្ធថ្ងៃចុងក្រោយគូសបញ្ជាក់ពីផែនការសុភមង្គលដ៏មហិមារបស់ព្រះវរបិតាសួគ៌ ដ៏ទេវភាពរបស់ព្រះយេស៊ូវគ្រីស្ទ និងតួនាទីរបស់ទ្រង់ជាព្រះអង្គសង្គ្រោះរបស់យើង ។ សេចក្ដីសញ្ញាដែលបានទទួល និងពិធីបរិសុទ្ធដែលបានធ្វើឡើងក្នុងព្រះវិហារបរិសុទ្ធ មានសារសំខាន់យ៉ាងខ្លាំងដើម្បីធ្វើឲ្យដួងចិត្តយើងបានបរិសុទ្ធ និងសម្រាប់ការលើកតម្កើងដ៏ខ្ពង់ខ្ពស់ដល់បុត្រា និងបុត្រីនៃព្រះ » ( ទំព័រ ៦ ) ។
នៅពេលអ្នកអានអត្ថបទរបស់អែលឌើរបែដណា យើងសូមអញ្ជើញអ្នកឲ្យចងចាំពីសេចក្ដីសញ្ញាដែលអ្នកបានធ្វើនៅក្នុងព្រះវិហារបរិសុទ្ធ ។ ប្រសិនបើអ្នកខកខានមិនបានទៅព្រះវិហារបរិសុទ្ធមួយរយៈ យើងសូមអញ្ជើញអ្នកឲ្យត្រឡប់មកវិញ ហើយទទួលអារម្មណ៍ជាថ្មីនូវអំណរ និងសេចក្ដីសុខសាន្តដែលមាននៅក្នុងដំណាក់របស់ព្រះអម្ចាស់ ។ ប្រសិនបើអ្នកមិនធ្លាប់បានទៅព្រះវិហារបរិសុទ្ធនៅឡើយ យើងសូមអញ្ជើញអ្នកឲ្យរៀបចំខ្លួនដើម្បី « បានទទួលព្រះចេស្ដាមកពីស្ថានលើ »( គោលលទ្ធិ និង សេចក្ដីសញ្ញា ៣៨:៣២ ) ។
អែលឌើរ ខេវិន អ័រ ដានឃិន
ក្នុងពួកចិតសិបនាក់
នាយកប្រតិបត្តិនៃនាយកដ្ឋានព្រះវិហារបរិសុទ្ធ