« ព្រះអម្ចាស់បានរក្សាការសន្យារបស់ទ្រង់ » Liahonaខែកក្កដា/សីហា ឆ្នាំ២០២២
សំឡេងពួកបរិសុទ្ធថ្ងៃចុងក្រោយ
ព្រះអម្ចាស់បានរក្សាការសន្យារបស់ទ្រង់
ចំពោះគ្រួសារខ្ញុំ និងខ្ញុំ ពរជ័យរបស់ព្រះអម្ចាស់បានកើតឡើងបន្ទាប់ពីការគោរពប្រតិបត្តិរបស់ខ្ញុំ ។
បន្ទាប់ពីខ្ញុំត្រូវបានហៅជាទីប្រឹក្សាម្នាក់នៅក្នុងគណៈប្រធានស្តេកបានពីរខែ ខ្ញុំបានបាត់បង់ការងារ ។ ខ្ញុំបានព្រួយចិត្តថា តើខ្ញុំនឹងផ្គត់ផ្គង់ដល់ភរិយា និងកូនទាំងពីររបស់ខ្ញុំបានយ៉ាងដូចម្ដេច ។
ខណៈដែលកំពុងស្វែងរកការងារថ្មី ខ្ញុំបានថ្វាយខ្លួនខ្ញុំសម្រាប់ការហៅរបស់ខ្ញុំ ដែលវាបានផ្ដល់ឱកាសឲ្យខ្ញុំយ៉ាងច្រើនដើម្បីបម្រើបងប្អូនប្រុសស្រីរបស់ខ្ញុំ ។ ពិតណាស់ ខ្ញុំមានភាពមមាញឹកយ៉ាងខ្លាំងនៅក្នុងការហៅរបស់ខ្ញុំ រហូតដល់ភរិយាខ្ញុំបានងឿងឆ្ងល់ថា តើអាចមាននរណាម្នាក់ផ្សេងទៀតនៅក្នុងស្តេក ដែលអាចធ្វើការចាត់តាំងខ្លះរបស់ខ្ញុំបានទេ ។
នាយប់មួយដែលមានភ្លៀងធ្លាក់ គឺពីមុនរាត្រីជួបជុំក្រុមគ្រួសារបន្តិច នោះទូរសព្ទបានរោទិ៍ឡើង ។ នៅក្នុងស្តេកមានបងប្រុសម្នាក់ដែលឈឺធ្ងន់ត្រូវការការប្រសិទ្ធពរ ហើយខ្ញុំត្រូវបានស្នើសុំឲ្យទៅមើលគាត់ ។ ភ្លាមៗនោះ ខ្ញុំបានធ្វើការរៀបចំដើម្បីឲ្យមិត្តម្នាក់ទៅជាមួយនឹងខ្ញុំ ។
ពេលយើងទៅដល់ រំពេចនោះ ខ្ញុំបានស្គាល់បងប្រុសដែលឈឺនោះភ្លាម ហើយមានអំណរគុណចំពោះអ្នកដែលបានទូរសព្ទមកខ្ញុំ ។ ពីរបីថ្ងៃមុននោះ គាត់បានសម្ភាសសម្រាប់ការហៅនៅក្នុងស្តេក ។ បន្ទាប់ពីយើងបានចាក់ប្រេងតាំង និងបានប្រសិទ្ធពរគាត់ហើយ យើងបានប្រាប់គាត់ថា យើងនឹងត្រឡប់មកវិញពេលក្រោយ ដើម្បីសួរសុខទុក្ខគាត់ម្ដងទៀត ។
ខ្ញុំបានទៅដល់ផ្ទះវិញនៅពេលយប់ទាំងទទឹកខ្លួនជោគ ប៉ុន្តែយើងនៅតែមានពេលខ្លីមួយ សម្រាប់មេរៀនរាត្រីជួបជុំគ្រួសារ ។ យើងបានសម្រេចចិត្តមើលវីដេអូមួយអំពីអេលីយ៉ា និងស្ត្រីមេម៉ាយ នៅក្រុងសារិបតា ។
កាលស្ត្រីមេម៉ាយនោះកំពុងរៀបចំចម្អិនអាហារចុងក្រោយសម្រាប់នាង និងកូនរបស់នាង នោះអេលីយ៉ាបានពោលទៅកាន់នាងថា « សូមធ្វើនំ១យ៉ាងតូចមកឲ្យខ្ញុំជាមុនសិន រួចសឹមធ្វើសម្រាប់អ្នក និងកូនអ្នកចុះ » ។ ដោយសារតែការគោរពប្រតិបត្តិរបស់នាង « ម្សៅក្នុងខាប់នោះ នឹងមិនដែល[ បាន ] ផុតទៅ ហើយប្រេងក្នុងដប ក៏មិនដែល[ បាន ] រលោះឡើយ ដរាបដល់ថ្ងៃដែលព្រះយេហូវ៉ានឹង[ ចាត់ឲ្យ ]បង្អុរភ្លៀងមកលើផែនដី »( ពង្សាវតាក្សត្រទី ១ ១៧:១៣–១៤ ) ។
ពាក្យរបស់អេលីយ៉ា« ធ្វើ … មកឲ្យខ្ញុំជាមុនសិន »បានចាក់ដោតដល់ដួងចិត្តខ្ញុំ ។ ខ្ញុំបាននិយាយទៅភរិយាខ្ញុំទាំងទឹកភ្នែកថា « វាត្រឹមត្រូវណាស់ ! ដំបូង យើងត្រូវធ្វើអ្វីៗដែលព្រះអម្ចាស់បង្គាប់ ហើយបន្ទាប់មកពរជ័យនឹងកើតឡើង » ។
ដូចគ្នានឹងការបំពេញសេចក្ដីសន្យារបស់អេលីយ៉ាចំពោះស្ត្រីមេម៉ាយនោះដែរ នោះម្ហូបអាហារ និងប្រេងរបស់យើង« មិនផុត » ឡើយ ខណៈដែលខ្ញុំគ្មានការងារធ្វើ ។ ព្រះអម្ចាស់ទ្រង់បានជ្រាបពីស្ថានភាពហិរញ្ញវត្ថុដ៏លំបាករបស់យើង ហើយបានប្រទានពរយើង ។ លុះព្រឹកស្អែក បន្ទាប់ពីរាត្រីជួបជុំក្រុមគ្រួសារនោះមក ខ្ញុំទទួលបានការងារមួយ ។
ខ្ញុំដឹងថា ព្រះអម្ចាស់រក្សាការសន្យារបស់ទ្រង់ ។ ដោយសារតែបទពិសោធន៍នេះ សេចក្ដីជំនឿខ្ញុំគឺអស្ចារ្យ ហើយខ្ញុំក៏មានអំណរគុណកាន់តែខ្លាំងចំពោះទ្រង់ផងដែរ ។