« ពួកអ្នកផ្សព្វផ្សាយសាសនាផ្នែកសេវាកម្ម ៖ ការស្ថាបនានគរតាមរយៈការបម្រើ និងសេចក្ដីស្រឡាញ់ » លីអាហូណា ខែ កក្កដា/ខែ សីហា ឆ្នាំ ២០២២ ។
យុវមជ្ឈិមវ័យ
ពួកអ្នកផ្សព្វផ្សាយសាសនាផ្នែកសេវាកម្ម ៖ ការស្ថាបនានគរតាមរយៈការបម្រើ និងសេចក្ដីស្រឡាញ់
ខ្ញុំឆ្ងល់ថា តើការបម្រើជាអ្នកផ្សព្វផ្សាយសាសនាផ្នែកសេវាកម្ម មានន័យថាខ្ញុំមិន « ល្អគ្រប់គ្រាន់ » មែនដែរទេ ។
នៅពេលដែលប្រធានស្តេករបស់ខ្ញុំបានសួរខ្ញុំជាលើកដំបូង ថាតើខ្ញុំនឹងស្ម័គ្រចិត្តដើម្បីបម្រើបេសកកម្មផ្នែកសេវាកម្មឬទេ គំនិតដំបូងរបស់ខ្ញុំគឺ « យល់ព្រម ! »
ខ្ញុំមានទំនុកចិត្តថាព្រះអម្ចាស់មានកិច្ចការឲ្យខ្ញុំធ្វើ ហើយខ្ញុំជឿថាអ្វីក៏ដោយដែលទ្រង់ចង់ឲ្យខ្ញុំធ្វើ នឹងធ្វើឲ្យខ្ញុំរីកចម្រើន និងមានសុភមង្គល ពីព្រោះទ្រង់ស្រឡាញ់ខ្ញុំ ហើយចង់ឲ្យអ្វីដែលល្អបំផុតសម្រាប់ខ្ញុំ ។
គំនិតទីពីររបស់ខ្ញុំគឺ « តើបេសកកម្មផ្នែកសេវាកម្មគឺជាអ្វី ? »
ប្រធានស្តេករបស់ខ្ញុំបានពន្យល់ពីអ្វីដែលជាបេសកកម្មផ្នែកសេវាកម្ម កាលដែលពួកយើងបានជួបគ្នានៅក្នុងការិយាល័យរបស់លោកនៅថ្ងៃអាទិត្យនោះ ប៉ុន្តែខ្ញុំពុំបានយល់ច្បាស់អំពីបេសកកម្មនោះ ឬសារៈសំខាន់របស់បេសកកម្មនោះច្រើនទេ រហូតដល់មួយរយៈពេលក្រោយមក ។ នៅពេលនោះ ខ្ញុំថែមទាំងឆ្ងល់ថា តើការហៅបម្រើនេះមានន័យថា ខ្ញុំមិនប្រក្រតី ពីព្រោះខ្ញុំពុំបានមើលឃើញពីគោលបំណងធំដុំដែលនៅពីក្រោយបេសកកម្មផ្នែកសេវាកម្មនេះឡើយ ។
តើគេត្រូវការខ្ញុំដែរឬទេ ?
ខ្ញុំបានទទួលការហៅឲ្យបម្រើរបស់ខ្ញុំប្រហែលជាមួយខែពីមុនបេសកកម្មរបស់ខ្ញុំចាប់ផ្តើមពិតប្រាកដ ។ ការណ៍នេះមានន័យថា ខ្ញុំបានជួបជាមួយនឹងអ្នកដឹកនាំបេសកកម្មផ្នែកសេវាកម្មរបស់ខ្ញុំ ចូលរួមសន្និសីទបេសកកម្មផ្នែកសេវាកម្មនៅក្នុងតំបន់របស់ខ្ញុំ ហើយថែមទាំងបានស្នើសុំឲ្យដឹកនាំការសិក្សាជាដៃគូជាមួយនឹងស៊ីស្ទើរពីររូបផ្សេងទៀតនៅក្នុងតំបន់របស់ខ្ញុំ ពីមុនខ្ញុំបានទទួលពិធីញែកចេញ ។
ខ្ញុំបានចំណាយពេលខ្លះនៅចន្លោះការហៅរបស់ខ្ញុំ និងការថ្លែងទីបន្ទាល់ « លាគ្នា » ( ទោះបីជាខ្ញុំមិនចេញទៅណាក៏ដោយ ) ដើម្បីរៀនអំពីបេសកកម្មផ្នែកសេវាកម្ម និងពួកអ្នកផ្សព្វផ្សាយសាសនាផ្នែកសេវាកម្មដែលនៅជុំវិញខ្លួនខ្ញុំ ។
នៅក្នុងសន្និសីទបេសកកម្មផ្នែកសេវាកម្មដែលខ្ញុំបានចូលរួម ខ្ញុំបានរៀនថា ពួកអ្នកផ្សព្វផ្សាយសាសនាផ្នែកសេវាកម្មជាច្រើន នៅពេលដែលពួកគាត់បានទទួលការហៅជាលើកដំបូង មានអារម្មណ៍ថាពួកគាត់ពុំមានលក្ខណៈគ្រប់គ្រាន់ដើម្បីបម្រើបេសកកម្មផ្នែកផ្សព្វផ្សាយនោះទេ ។ ខ្ញុំខ្មាស់អៀនពេលនឹកឃើញពីប្រតិកម្មដំបូងរបស់ខ្ញុំផ្ទាល់ចំពោះការហៅរបស់ខ្ញុំ ។
ទីបំផុត ខ្ញុំបានដឹងថា ខ្ញុំមិនមែនហៅដើម្បី បម្រើបេសកកម្មផ្នែកសេវាកម្ម ដោយសារខ្ញុំពុំមានលក្ខណៈគ្រប់គ្រាន់នោះទេ ប៉ុន្តែដោយសារនេះគឺជាការដឹកនាំរបស់ព្រះវរបិតាសួគ៌សម្រាប់ខ្ញុំ ។ ខ្ញុំពុំមានតម្លៃ « តិចជាង » ពួកអ្នកផ្សព្វផ្សាយសាសនាផ្នែកផ្សព្វផ្សាយនោះទេ ផ្ទុយទៅវិញ ទ្រង់ត្រូវការខ្ញុំឲ្យជួយស្ថាបនានគររបស់ទ្រង់តាមរយៈផ្នែកសេវាកម្មនេះ ។ ខ្ញុំបានទទួលទីបន្ទាល់ដ៏រឹងមាំថា ពួកអ្នកផ្សព្វផ្សាយសាសនាទាំងអស់គឺសំខាន់ចំពោះព្រះវរបិតាសួគ៌ ហើយសំខាន់ចំពោះកិច្ចការរបស់ទ្រង់ ពីព្រោះពួកអ្នកផ្សព្វផ្សាយសាសនាទាំងអស់មានគោលបំណងចង់បម្រើទ្រង់ និងកូនចៅរបស់ ទ្រង់ ។
បន្ទាប់ពីការរៀនសូត្រពីពួកអ្នកផ្សព្វផ្សាយសាសនាផ្នែកសេវាកម្មនៅតំបន់របស់ខ្ញុំដទៃទៀត ដោយការជួបជាមួយពួកគាត់ និងការស្តាប់ពីដំណើររឿងរបស់ពួកគាត់ ខ្ញុំបានដឹងថា ពួកគាត់ជាមនុស្សអស្ចារ្យណាស់ គឺជាពួកអ្នកបម្រើដ៏សុចរិតរបស់ព្រះអម្ចាស់ ។ ខ្ញុំដឹងថា ទោះបីជាពួកយើងមួយចំនួនមានអារម្មណ៍សោកស្ដាយបន្តិចបន្តួចចំពោះខ្លួនឯង នៅពេលចាប់ផ្តើមបេសកកម្មរបស់យើងក៏ដោយ ក៏យើងទាំងអស់គ្នាបានសន្និដ្ឋានដូចគ្នា ៖ ព្រះអម្ចាស់ស្រឡាញ់ពួកអ្នកផ្សព្វផ្សាយសាសនាផ្នែកសេវាកម្ម ហើយថាយើងនៅចំកន្លែងដែលទ្រង់ចង់ឲ្យយើងនៅ ដើម្បី រៀនសូត្រ និងរីកចម្រើនខណៈពេលកំពុងបម្រើទ្រង់ ប្រៀបដូចជាព្រះហស្តរបស់ទ្រង់នៅលើផែនដីនេះ ។
របៀបដែលពួកអ្នកផ្សព្វផ្សាយសាសនាផ្នែកសេវាកម្មស្ថាបនាស៊ីយ៉ូន
ពួកអ្នកផ្សព្វផ្សាយសាសនាមានសារៈសំខាន់ខ្លាំងណាស់នៅចំពោះគ្រប់សមត្ថភាពដែលពួកគេបានបម្រើ ។ ពួកយើងត្រូវការពួកអ្នកផ្សព្វផ្សាយសាសនាដែលបានចាកចេញពីក្រុមគ្រួសារ និងគេហដ្ឋានរបស់ពួកគេសម្រាប់រយៈពេលពីរឆ្នាំ ដើម្បីបង្រៀន និងប្រកាសពីដំណឹងល្អដល់ពិភពលោកទាំងមូល ។ ប៉ុន្តែយើងក៏ត្រូវការស្ថាបនាសហគមន៍ស៊ីយ៉ូនដែលពោរពេញដោយក្តីស្រឡាញ់ចំពោះអ្នកដទៃ និងបំណងប្រាថ្នាដើម្បីបម្រើ និងលើកស្ទួយដល់អ្នកដែលតូចតាចនៅក្នុងចំណោមពួកគេផងដែរ ។ នេះគឺជាអ្វីដែលពួកអ្នកផ្សព្វផ្សាយសាសនាផ្នែកសេវាកម្មធ្វើ ។ យើងស្ថាបនាស៊ីយ៉ូនដោយការបង្កើតវប្បធម៌នៃក្តីស្រឡាញ់ និងការបម្រើ ។ ការណ៍នេះបង្កើតការស្វាគមន៍ ភាពសុចរិត និងលើកស្ទួយសហគមន៍សម្រាប់សមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយទាំងអស់—ទាំងអ្នកដែលកើតក្នុងសាសនាចក្រ អ្នកប្រែចិត្តជឿថ្មី និងមនុស្សគ្រប់ៗគ្នា ។
បេសកកម្មផ្នែកសេវាកម្មរបស់ខ្ញុំជាមួយនឹងទស្សនាវដ្តីសាសនាចក្រ បានជួយខ្ញុំមើលឃើញថា តើខ្ញុំពិតជាមានពរជ័យប៉ុណ្ណា ។ ខ្ញុំអាចប្រើប្រាស់អ្វីដែលខ្ញុំបានរៀនអំពីឧបសគ្គរបស់ខ្ញុំពេញមួយជីវិតរបស់ខ្ញុំ ដើម្បីជួយលើកស្ទួយដល់អ្នកដទៃដែលជួបបញ្ហាផងដែរ ។ ខ្ញុំបានខិតខំចែកចាយបទពិសោធន៍របស់ខ្ញុំជាមួយអ្នកដទៃ ហើយការធ្វើដូច្នោះ បានលើកទឹកចិត្តឲ្យអ្នកដទៃចែកចាយដំណើររឿងរបស់ពួកគេផងដែរ ។ បុត្រាបុត្រីទាំងអស់របស់ព្រះគឺមានសារៈសំខាន់ ។ បេសកកម្មផ្នែកសេវាកម្មរបស់ខ្ញុំបានជួយខ្ញុំឲ្យជួយពួកគេទទួលបានព្រះគុណថែមទៀត ហើយបានអនុញ្ញាតឲ្យខ្ញុំស្រឡាញ់ពួកគេ ជាពួកគេ កាលដែលយើងខិតខំដើម្បីមករកព្រះគ្រីស្ទជាមួយគ្នា ។
ពួកអ្នកផ្សព្វផ្សាយសាសនាផ្នែកសេវាកម្មចំណាយពេលវេលា និងកម្លាំងរបស់ពួកគេបង្កើតស៊ីយ៉ូនតាមរបៀបផ្សេងៗ ប៉ុន្តែមានសារៈប្រយោជន៍ ។ អ្នកខ្លះជួយផ្នែកសេវាកម្មផ្ទាល់ៗនៅនឹងកន្លែង ដូចជា វិសាលដ្ឋានសុខុមាលភាព ឬកន្លែងស្តុកអាហារក្នុងមូលដ្ឋានជាដើម ។ មានពួកអ្នកផ្សព្វផ្សាយសាសនាផ្នែកសេវាកម្មដែលធ្វើការលម្អទីធ្លាព្រះវិហារបរិសុទ្ធ និងបម្រើជាអ្នកធ្វើពិធីបរិសុទ្ធនៅក្នុងព្រះវិហារបរិសុទ្ធផងដែរ ។ អ្នកខ្លះទៀតជួយចែកអាហារដល់កុមារដែលគ្មានអាហារ នៅពេលរៀនចប់ និងបម្រើពួកគេដោយការស្ថាបនាពួកគេ ។ អ្នកផ្សេងទៀតជួយផ្សព្វផ្សាយដំណឹងល្អ និងពង្រឹងដល់សមាជិកដែលមានដំណឹងល្អរួចហើយ ។ សូម្បីតែពួកអ្នកផ្សព្វផ្សាយសាសនា ផ្នែកថែទាំយានជំនិះប្រភេទផ្សេងៗ របស់សាសនាចក្រក៏មានដែរ ។
ពួកអ្នកផ្សព្វផ្សាយសាសនាផ្នែកសេវាកម្មក៏បម្រើតាមរបៀបផ្សេងៗទៀតដែរ ដូចជាការដាក់ស្លាកសញ្ញាសម្រាប់ប៊ីស្សពនៅក្នុងអគារសាសនាចក្រ ធ្វើការនៅក្នុងស្ទូឌីយ៉ូ រូបភាព ជីវចល របស់សាសនាចក្រ និងសម្អាតអ្វីៗជាច្រើន ដើម្បីរក្សាសុវត្ថិភាពដល់មនុស្សគ្រប់គ្នានៅក្នុងគ្រាដែលមានជំងឺកូវីដ-១៩ នេះ ។ មិនថាការចាត់តាំងរបស់យើងម្នាក់ៗជាអ្វីនោះទេ យើងជួយស្ថាបនាស៊ីយ៉ូនដោយបណ្តុះបរិយាកាសនៃសេចក្តីស្រឡាញ់ និងការបម្រើដោយមិនគិតពីផលប្រយោជន៍ផ្ទាល់ខ្លួនឡើយ ។
យើងទាំងអស់គ្នាជាពួកអ្នកផ្សព្វផ្សាយសាសនាចូលរួមសិក្សាព្រះគម្ពីរប្រចាំថ្ងៃ បង្រៀនមេរៀន ចូលរួមក្នុងមេរៀន និងក្រុមប្រឹក្សាមណ្ឌល និងពង្រឹង ហើយលើកស្ទួយគ្នាទៅវិញទៅមក ព្រមទាំងមនុស្សគ្រប់គ្នាដែលនៅជុំវិញយើង មិនថាវាជាផ្នែកមួយនៃការចាត់តាំងជាផ្លូវការរបស់យើង ឬអត់នោះទេ ។
កិច្ចការដ៏សំខាន់បំផុតមួយដែលខ្ញុំធ្វើគឺមិនសូវទាក់ទងនឹងការចាត់តាំងផ្លូវការរបស់ខ្ញុំជាមួយក្រុមរៀបមាតិកាសម្រាប់យុវមជ្ឈិមវ័យ សម្រាប់ទស្សនាវដ្ដីសាសនាចក្រនោះទេ ប៉ុន្តែទាក់ទងទៅនឹងការបម្រើដល់ពួកអ្នកផ្សព្វផ្សាយសាសនាផ្សេងទៀតនៅក្នុងក្រុមរបស់ខ្ញុំ នៅឯទីកន្លែងវិសាលដ្ឋានព្រះវិហារបរិសុទ្ធច្រើនជាង ។ ខ្ញុំបម្រើដោយធានាឲ្យបានថាពួកគេមានអារម្មណ៍ថាត្រូវបានមើលឃើញ និងឮ ហើយថាពួកគេដឹងថាខ្ញុំយកចិត្តទុកដាក់ចំពោះពួកគេ ហើយថាពួកគេមានចំណែកផងដែរ ។
តើនោះមិនមែន ជាអ្វីៗដែលពួកអ្នកផ្សព្វផ្សាយសាសនាទាំងអស់ ធ្វើទេឬអី ? តើពួកអ្នកផ្សព្វផ្សាយសាសនាទាំងអស់មិនបញ្ជាក់ដល់មនុស្សគ្រប់គ្នានៅជុំវិញពិភពលោកថា នៅទីនេះ នៅក្នុងនគររបស់ព្រះ មានកន្លែងសំខាន់ និងផ្ទាល់ខ្លួនសម្រាប់បុត្រាបុត្រីទាំងអស់របស់ទ្រង់ទេឬអី ? ពួកអ្នកផ្សព្វផ្សាយសាសនាផ្នែកផ្សព្វផ្សាយ ជួយបង្រៀនដល់ពិភពលោកថា នគររបស់ព្រះគឺនៅលើផែនដីនេះ ហើយពួកអ្នកផ្សព្វផ្សាយសាសនាផ្នែកសេវាកម្មជួយអ្នកដទៃឲ្យមើលឃើញថា នគរនោះគួរមានលក្ខណៈបែបណា នៅពេលយើងរៀបចំសម្រាប់ការយាងមកជាលើកទីពីររបស់ព្រះអង្គសង្គ្រោះ—ជាកន្លែងដែលដួងចិត្តរបស់យើងងាកទៅជួយអ្នកដទៃ ជាកន្លែងដែលយើងបម្រើដោយគ្មានការបម្រុងទុក និងជាកន្លែងដែលយើងជួយអ្នកដទៃឲ្យដឹងថាពួកគេមានចំណែក ។
ការបម្រើដូចជាព្រះអង្គសង្គ្រោះ—ដោយស្វែងរកកូនចៀមមួយដែលបាត់
ទោះជាយើងបម្រើដោយរបៀបណាក៏ដោយ និងនៅកន្លែងណាក៏ដោយ រឿងតែមួយដែលពួកអ្នកផ្សព្វផ្សាយសាសនាទាំងអស់ធ្វើ—បម្រើឲ្យដូចជាព្រះយេស៊ូវគ្រីស្ទបានធ្វើ ដោយផ្ដល់ការងារបម្រើដល់បុគ្គលនោះ ។
លើសពីការបំពេញការចាត់តាំងរៀងៗខ្លួនរបស់យើងគឺ « គោលបំណងរបស់យើងគឺជួយអ្នកដទៃឲ្យមករកព្រះគ្រីស្ទ ដោយបម្រើពួកគេឲ្យដូចព្រះអង្គសង្គ្រោះនឹងធ្វើ » ។ យើងបម្រើដោយស្ម័គ្រចិត្តនៅក្នុងអង្គការសប្បុរសធម៌ ធុរកិច្ចរបស់សាសនាចក្រ និងនៅក្នុងសហគមន៍ ។ យើងនឹងផ្ដល់ការងារបម្រើនៅក្នុងព្រះនាមរបស់ទ្រង់ ទៅកាន់បុគ្គលនោះ គឺដូចជាទ្រង់បានធ្វើ ដោយការបង្ហាញសេចក្តីស្រឡាញ់ដ៏សប្បុរសរបស់ទ្រង់ » ។១
យើងដែល ជាពួកអ្នកផ្សព្វផ្សាយសាសនាផ្នែកសេវាកម្មចារពាក្យពេចន៍នៅក្នុងគោលបំណងរបស់យើង ពីព្រោះយើងដឹងថាព្រះអង្គសង្គ្រោះធ្វើការងារបម្រើដល់យើងជាបុគ្គលម្នាក់ៗ ហើយយើងទទួលបានអារម្មណ៍នៃសេចក្តីស្រឡាញ់ដ៏សប្បុរសរបស់ទ្រង់ ។ ខ្ញុំបានទទួលអារម្មណ៍ពីសេចក្តីស្រឡាញ់ដ៏សប្បុរសរបស់ព្រះអង្គសង្គ្រោះនៅក្នុងបេសកកម្មរបស់ខ្ញុំ កាលដែលខ្ញុំខិតខំស្វែងយល់អំពីទ្រង់ កាលដែលឧបសគ្គរបស់ខ្ញុំត្រូវបានសម្រាល កាលទីបន្ទាល់របស់ខ្ញុំត្រូវបានពង្រឹង និងនៅពេលដែលពួកអ្នកផ្សព្វផ្សាយសាសនាជុំវិញខ្ញុំបានស្រឡាញ់ និងលើកស្ទួយខ្ញុំឡើង ។
ពួកអ្នកផ្សព្វផ្សាយសាសនាផ្នែកសេវាកម្ម ខិតខំចែកចាយសេចក្តីស្រឡាញ់ដ៏សប្បុរសរបស់ព្រះគ្រីស្ទ ជាមួយមនុស្សគ្រប់គ្នាដែលនៅជុំវិញពួកគេ ហើយយើងលះបង់ជីវិតរបស់យើងដើម្បីធ្វើដូច្នេះ ពេញមួយបេសកកម្មរបស់យើង—និងពេញមួយជីវិតរបស់យើង ។