« ព្រះគម្ពីរ ៖ ព្រះបន្ទូលរបស់ព្រះ » លីអាហូណា ខែ កក្កដា/ខែ សីហា ឆ្នាំ ២០២២ ។
មូលដ្ឋានគ្រឹះនៃដំណឹងល្អ
ព្រះគម្ពីរ ៖ ព្រះបន្ទូលរបស់ព្រះ
ព្យាការីក្នុងព្រះគម្ពីរសញ្ញាចាស់ ដោយ ជូឌីត អេ. ម៉ែ
ព្រះគម្ពីរគឺជាសៀវភៅបរិសុទ្ធដែលភាគច្រើនត្រូវបានសរសេរដោយព្យាការីទាំងឡាយ ព្រះគម្ពីរទាំងឡាយថ្លែងទីបន្ទាល់អំពីព្រះយេស៊ូវគ្រីស្ទ ហើយបង្រៀនអំពីដំណឹងល្អរបស់ទ្រង់ ។ ព្រះគម្ពីរដែលប្រើប្រាស់ជាផ្លូវការរបស់សាសនាចក្រគឺព្រះគម្ពីរប៊ីប ( ដែលមានទាំងព្រះគម្ពីរសញ្ញាចាស់ និងគម្ពីរសញ្ញាថ្មី ) ព្រះគម្ពីរមរមន គោលលទ្ធិ និងសេចក្តីសញ្ញា និងមុក្តាដ៏មានតម្លៃមហិមា ។
ព្រះគម្ពីរសញ្ញាចាស់
ព្រះគម្ពីរសញ្ញាចាស់គឺជាកំណត់ត្រារបស់ព្រះធ្វើការជាមួយនឹងរាស្រ្តនៃសេចក្តី សញ្ញារបស់ទ្រង់នៅសម័យបុរាណ ។ វារួមមានទាំងការបង្រៀនរបស់ព្យាការីទាំងឡាយ ដូចជា ម៉ូសេ យ៉ូស្វេ អេសាយ យេរេមា និងដានីយ៉ែល ។ ទោះបីជាព្រះគម្ពីរបានសរសេររាប់រយឆ្នាំ មុនពេលការប្រសូតរបស់ព្រះយេស៊ូវគ្រីស្ទក៏ដោយ ក៏ព្យាការីក្នុងព្រះគម្ពីរសញ្ញាចាស់ជាច្រើន បានសរសេរអំពីទ្រង់ផងដែរ ។
ព្រះគម្ពីរសញ្ញាថ្មី
ព្រះគម្ពីរសញ្ញាថ្មីកត់ត្រាអំពីការប្រសូត ជីវិតរមែងស្លាប់ ការបង្រៀន និងដង្វាយធួនរបស់ព្រះយេស៊ូវគ្រីស្ទ ។ ព្រះគម្ពីរនេះរួមមានទាំងការបង្រៀនរបស់ពួកសាវក និងសិស្សដទៃទៀតរបស់ព្រះគ្រីស្ទផងដែរ ។ ព្រះគម្ពីរសញ្ញាថ្មីជួយយើងយល់ពីរបៀប ដើម្បីរស់នៅតាមដំណឹងល្អរបស់ព្រះយេស៊ូវគ្រីស្ទនៅសព្វថ្ងៃនេះ ។
ព្រះគម្ពីរមរមន ៖ សក្ខីបទមួយទៀតអំពីព្រះយេស៊ូវគ្រីស្ទ
ព្រះគម្ពីរមរមនគឺជាកំណត់ត្រាពីប្រជាជនមួយចំនួន ដែលបានរស់នៅទ្វីបអាមេរិកពីបុរាណ ។ ព្រះគម្ពីរនេះរួមមានទាំងការបង្រៀនមកពីព្យាការីទាំងឡាយ ហើយគោលបំណងដ៏សំខាន់របស់ព្រះគម្ពីរមរមន គឺដើម្បីបញ្ចុះបញ្ចូលមនុស្សទាំងអស់ថាព្រះយេស៊ូវគឺជាព្រះគ្រីស្ទ ។ ព្យាការីយ៉ូសែប ស្ម៊ីធ បានបកប្រែព្រះគម្ពីរមរមនមកពីផ្ទាំងចំណារមាស ដោយអំណោយទាន និងព្រះចេស្តានៃព្រះ ។
គោលលទ្ធិ និង សេចក្តីសញ្ញា
គម្ពីរគោលលទ្ធិ និងសេចក្ដីសញ្ញា មាននូវវិវរណៈដែលប្រទានឲ្យយ៉ូសែប ស្ម៊ីធ និងព្យាការីសម័យចុងក្រោយទាំងឡាយ ។ វិវរណៈដែលរៀបរាប់ពីរបៀបដែលសាសនាចក្ររបស់ព្រះគ្រីស្ទបានរៀបចំឡើង ។ វាក៏មាននូវការបង្រៀនដំណឹងល្អដ៏សំខាន់ៗអំពីបព្វជិតភាព ពិធីបរិសុទ្ធនៃដំណឹងល្អ និងអ្វីដែលកើតឡើងបន្ទាប់ពីជីវិតនេះផងដែរ ។
មុក្តាដ៏មានតម្លៃមហិមា
គម្ពីរមុក្តាដ៏មានតម្លៃមហិមារួមមានទាំងគម្ពីរម៉ូសេ និងអ័ប្រាហាំ ទីបន្ទាល់របស់ព្យាការីយ៉ូសែប ស្ម៊ីធ ហើយនិងមាត្រានៃសេចក្តីជំនឿរបស់សាសនាចក្រផងដែរ ។ វាក៏មានយ៉ូសែប ស្ម៊ីធ—ម៉ាថាយ ដែលជាផ្នែកមួយនៃការបកប្រែដោយយ៉ូសែប ស្ម៊ីធនៃព្រះគម្ពីរសញ្ញាថ្មី ។
ការសិក្សាព្រះគម្ពីរ
ព្យាការីទាំងឡាយបានបង្រៀនយើងឲ្យសិក្សាព្រះគម្ពីរជាប្រចាំថ្ងៃ ។ ការធ្វើដូច្នោះជួយយើងបង្កើនសេចក្តីជំនឿរបស់យើង ហើយកាន់តែជិតស្និទ្ធនឹងព្រះវរបិតាសួគ៌ និងព្រះយេស៊ូវគ្រីស្ទ ។ កាលដែលយើងសិក្សាព្រះគម្ពីរទាំងឡាយដោយការអធិស្ឋាន នោះព្រះវិញ្ញាណបរិសុទ្ធនឹងជួយយើងរកឃើញចម្លើយចំពោះសំណួរទាំងឡាយរបស់យើង ។
ព្យាការីសម័យថ្មី
នៅពេលព្យាការី និងសាវកទាំងឡាយនៅសព្វថ្ងៃនេះមានប្រសាសន៍ដោយអំណាចនៃព្រះវិញ្ញាណបរិសុទ្ធ នោះពាក្យពេចន៍របស់ពួកលោក គឺដូចជាព្រះគម្ពីរដូច្នោះដែរ ។ គំរូមួយមួយអំពីការណ៍នេះគឺជាសន្និសីទទូទៅ ។ យើងអាចសិក្សាការបង្រៀនទាំងឡាយមកពីសន្និសីទទូទៅនៅក្នុងខែឧសភា និងខែវិច្ឆិកានៃច្បាប់ លីអាហូណា ។