« ដោយមានការដឹកនាំរបស់ព្រះអម្ចាស់ » លីអាហូណា ខែ កក្កដា/សីហា ឆ្នាំ ២០២២ ។
សំឡេងពួកបរិសុទ្ធថ្ងៃចុងក្រោយ
ដោយមានការដឹកនាំរបស់ព្រះអម្ចាស់
នៅគ្រាជួបទុក្ខលំបាក ខ្ញុំរៀនថា ខ្ញុំអាចធ្វើកិច្ចការលំបាកៗបាន ។
រចនារូបភាពដោយ ស្ទេផានី ហូក
ក្នុងនាមជាគិលានុបដ្ឋាកដាក់ថ្នាំស្ពឹកនៅក្នុងកងទ័ពជើងទឹកបម្រុងរបស់សហរដ្ឋអាមេរិកម្នាក់ ក្នុងអំឡុងពេលនៃជំងឺរាតត្បាតកូវីដ-១៩ ខ្ញុំត្រូវចល័ត និងចាត់ឲ្យទៅមន្ទីរពេទ្យផ្នែកសង្គ្រោះបន្ទាន់នៅមជ្ឈមណ្ឌលសន្និបាត ចាកុប ខេ ចាវីធស៍ ក្នុងទីក្រុង ញូវយ៉ក ដោយផ្តល់ការថែទាំជួរមុខអំឡុងពេលនៃការផ្ទុះឡើង នៃជំងឺកូវីដ-១៩ នៅទីក្រុងនេះ ។
កាលដែលខ្ញុំបានចាប់ផ្តើមការងាររបស់ខ្ញុំ ខ្ញុំបានព្រួយបារម្ភជាខ្លាំង ។ ខ្ញុំមានការព្រួយបារម្ភជាពិសេសអំពីការមើលថែអ្នកជំងឺ និងការប្រយុទ្ធប្រឆាំងនឹងមេរោគដ៏សាហាវនេះ ។
ខ្ញុំមានអារម្មណ៍ដូចជានីហ្វៃនិយាយថា« ខ្ញុំត្រូវបាននាំទៅដោយព្រះវិញ្ញាណ ដោយមិនដឹងជាមុនសោះឡើយថា តើខ្ញុំនឹងត្រូវធ្វើអ្វីខ្លះ » ( នីហ្វៃទី ១ ៤:៦ ) ។ គំនិតនេះបានជួយខ្ញុំឲ្យទុកចិត្តលើព្រះវរបិតាសួគ៌ និងអធិស្ឋានជាញឹកញាប់ ដើម្បីខ្ញុំនឹងឮព្រះសូរសៀងទ្រង់ ធ្វើតាមការណែនាំរបស់ទ្រង់ ហើយមើលថែអ្នកជំងឺរបស់ខ្ញុំឲ្យអស់ពីលទ្ធភាពរបស់ខ្ញុំ ។
ក្នុងអំឡុងពេលប្រចាំការរបស់ខ្ញុំនៅយប់ដំបូង មានអ្នកជំងឺម្នាក់ចូលមកសម្រាកក្នុងស្ថានភាពធ្ងន់ធ្ងរ ។ កាលដែលខ្ញុំ និងមិត្តរួមការងាររបស់ខ្ញុំ បានចាប់ផ្តើមវាយតម្លៃស្ថានភាពរបស់គាត់ ភ្លាមៗ ខ្ញុំបានដឹងថាគាត់អាចប្រាស្រ័យទាក់ទងតែជាភាសាអេស្ប៉ាញប៉ុណ្ណោះ ។ ខ្ញុំជាមនុស្សម្នាក់គត់នៅទីនោះដែលចេះនិយាយភាសាអេស្ប៉ាញ ដែលខ្ញុំបានរៀនភាសានេះនៅក្នុងបេសកកម្មរបស់ខ្ញុំនៅវ៉េណេស៊ុយអេឡា ។
កាលដែលខ្ញុំចាប់ផ្តើមនិយាយជាមួយអ្នកជំងឺ គាត់បានសួរថា តើស្ថានភាពរបស់គាត់មិនអីទេមែនទេ ។ ខ្ញុំបានធានាដល់គាត់ជាថ្មី ដោយប្រាប់គាត់ថា គាត់នឹងទទួលបានការមើលថែដ៏ល្អបំផុតដែលអាចធ្វើទៅបាន ។ ខ្ញុំបានមើលឃើញពីកំណើននៃទំនុកចិត្ត និងការលួងលោមនៅក្នុងកែវភ្នែករបស់គាត់ ។ នៅពេញមួយយប់នោះ ខ្ញុំបានទៅជិតគ្រែរបស់គាត់ជាញឹកញាប់ ដោយធ្វើការវាយតម្លៃ និងធ្វើបច្ចុប្បន្នភាព ។ ក្នុងរយៈពេលពីរបីថ្ងៃ ស្ថានភាពរបស់គាត់បានប្រសើរឡើងយ៉ាងគួរឲ្យកត់សម្គាល់ ហើយបានឲ្យគាត់ចេញពីមន្ទីរពេទ្យ ។
នៅអំឡុងពេលភារកិច្ចរបស់ខ្ញុំ ខ្ញុំបានជួបអ្នកជំងឺជាច្រើនដែលចេះសន្ទនាតែជាភាសាអេស្ប៉ាញតែប៉ុណ្ណោះ ។ សមត្ថភាពនិយាយរបស់ខ្ញុំទៅកាន់ពួកគេ បានផ្តល់ឲ្យពួកគេនូវការធូរស្រាល និងការធានាអះអាងក្នុងអំឡុងពេលនៃការជាសះស្បើយរបស់ពួកគេ ។
កាលដែលខ្ញុំគិតពិចារណាពីបទពិសោធន៍នេះ ក្នុងការការស្វែងរកការណែនាំពីសួគ៌ា ដើម្បីផ្តល់ការមើលថែដ៏ប្រសើរបំផុតដល់អ្នកជំងឺ ខ្ញុំបាននឹកឃើញដល់ដំបូន្មានរបស់អែលឌើរ ប្រ៊ូក ភី ហែលស៍ នៃពួកចិតសិបនាក់ ។ លោកបានមានប្រសាសន៍ថា ព្រះវរបិតាសួគ៌ចូលរួម « នៅក្នុងកិច្ចការតូចតាចនៃជីវិតយើង » ហើយថា « យើងទទួលបានសិទ្ធិដើម្បីមានការណែនាំដ៏ទេវភាពជាបន្តបន្ទាប់ឥតឈប់ឈរតាមរយៈឥទ្ធិពល និងការបំផុសនៃព្រះវិញ្ញាណបរិសុទ្ធ » ។១
ខ្ញុំបានដឹងយ៉ាងច្បាស់ថា សមត្ថភាពនិយាយភាសាអេស្ប៉ាញ គឺមានតម្លៃដូចជាចំណេះដឹងផ្នែកវេជ្ជសាស្ត្ររបស់ខ្ញុំដែរ ។ នៅពេលខ្ញុំយកចិត្តទុកដាក់ចំពោះអ្នកដទៃ ខ្ញុំក៏បានទទួលនូវទស្សនៈដ៏ច្បាស់មួយថា នៅគ្រាជួបទុក្ខលំបាក និងដោយមានការណែនាំពីព្រះអម្ចាស់ ខ្ញុំអាចធ្វើកិច្ចការលំបាកៗបាន ។