“Ngaahi Temipalé: Ko ha Mataʻitofe Mahuʻinga,” Liahona, Siulai 2022.
ʻOku Talitali Lelei Kimoutolu ki he Makasini ko ʻEní
Ngaahi Temipalé: Ko ha Mataʻitofe Mahuʻinga
Tā ʻo e Temipale Brigham City Utah
Ko ha tāpuaki fakaʻofoʻofa moʻoni ke mamata ki he fakautuutu ke lahi e ngaahi temipale ʻoku langa ʻi he funga ʻo e māmaní (vakai peesi 12). ʻOku tau fiefia fakataha mo e kāingalotu ʻo e Siasí ʻi hono fakatapui ha ngaahi temipale foʻou ʻi honau ngaahi feituʻú.
Naʻe fakamatalaʻi ʻe Palesiteni Boyd K. Packer (1924–2015), ko e Palesiteni ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻoku mau fakatauange ʻe mataʻikoloa ʻaki ʻe he kakai kotoa pē ʻa e temipalé pea ʻoua naʻa nau moʻulaloa ki ha fehalaaki. ʻI heʻene talanoa fakatātā ki he mataʻitofé mo e puhá, naʻá ne pehē naʻe faʻu ʻe ha tangata tufunga ha puha fakaʻofoʻofa ke fakaʻaliʻali ai ha mataʻitofe mahuʻinga lahi. Ka ʻi he taimi naʻe omi ai e kakaí ke mamata ki he mataʻitofé, naʻa nau saiʻia kinautolu ʻi he puhá. (Vakai “The Cloven Tongues of Fire,” Ensign, Mē 2000, 7; Liahona, Siulai 2000, 7.)
Ko e moʻoni, ʻoku kau ʻi he mataʻitofe mahuʻinga ʻi he loto temipalé ʻa e ngaahi ouau, ngaahi fuakava, mo e ngaahi tāpuaki kuo talaʻofa mai te tau toki lava pē ʻo maʻu ʻi he temipalé. Hangē ko ia ʻoku akoʻi ʻe ʻEletā Tevita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi he makasini ko ʻení: “ʻOku fakamamafaʻi ʻe he meʻa kotoa pē ʻoku ako mo ia kotoa pē ʻoku fai ʻi he ngaahi temipale ʻi he ngaahi ʻaho kimui ní, ʻa e palani lahi ʻa e Tamai Hēvaní ki he fiefiá, ko e faka-ʻotua ʻo Sīsū Kalaisí, pea mo Hono fatongia ko hotau Fakamoʻuí. Ko e ngaahi fuakava ʻoku maʻú mo e ngaahi ouau ʻoku fakahoko ʻi he ngaahi temipalé, ʻoku mahuʻinga ia ki hono fakamāʻoniʻoniʻi hotau lotó pea mo hono hākeakiʻi taupotu taha ʻa e ngaahi foha mo e ngaahi ʻofefine ʻo e ʻOtuá” (peesi 6).
ʻI hoʻo lau ʻa e talanoa ʻa ʻEletā Petinaá mo e ngaahi fakamoʻoni ʻo e kāingalotu ʻoku hoko mai aí (peesi 8), ʻoku mau fakaafeʻi koe ke ke manatuʻi e ngaahi fuakava kuó ke fakahoko ʻi he temipalé. Kapau kuo fuoloa ʻa e ʻikai ke ke ʻalu ki he temipalé, ʻoku mau fakaafeʻi koe ke ke toe foki ʻo ongoʻi ʻa e fiefia mo e melino ʻoku maʻu ʻi he fale ʻo e ʻEikí. Kapau kuo teʻeki ke ke ʻalu ki he temipalé, ʻoku mau fakaafeʻi atu ke ke teuteu ke “fakakoloaʻi [koe] ʻaki ʻa e mālohi mei ʻolunga” (Tokāteline mo e Ngaahi Fuakava 38:32).
ʻEletā Kevin R. Duncan
ʻO e Kau Fitungofulú
Talēkita Pule ʻo e Potungāue Temipalé