“Ngaahi Folofolá: Ko e Folofola ʻa e ʻOtuá,” Liahona, Siulai 2022.
Ngaahi Tefitoʻi Meʻa Mahuʻinga ʻo e Ongoongoleleí
Ngaahi Folofolá: Ko e Folofola ʻa e ʻOtuá
Palōfita ʻi he Fuakava Motuʻá,Judith A. Mehr
Ko e ngaahi folofolá ko ha ngaahi tohi māʻoniʻoni ia naʻe hiki ia ʻe ha kau palōfita. ʻOku fakamoʻoni ʻa e ngaahi folofolá kia Sīsū Kalaisi mo ako kau ki Heʻene ongoongoleleí. Ko e ngaahi tohi folofola ko ia kuo fakangofua ke fakaʻaongaʻi ʻe he Siasí, ko e Tohi Tapú (ʻa ia ʻoku kau ki ai ʻa e Fuakava Motuʻá mo e Fuakava Foʻoú), Tohi ʻa Molomoná, Tokāteline mo e Ngaahi Fuakavá, pea mo e Mataʻitofe Mahuʻingá.
Fuakava Motuʻá
Ko e Fuakava Motuʻá ko ha lekooti toputapu ia ʻo e ngaahi fengāueʻaki ʻa e ʻOtuá mo Hono kakai ʻo e fuakavá ʻi he kuonga kimuʻá. ‘Oku kau ai ʻa e ngaahi akonaki ʻo ha kau palōfita hangē ko Mōsese, Sōsiua, ʻĪsaia, Selemaia, mo Taniela. Neongo naʻe hiki ia ʻi ha taʻu ʻe laungeau kimuʻa pea ʻaloʻi ʻa Sīsū Kalaisí, ka naʻe tokolahi ha kau palōfita ʻi he Fuakava Motuʻá naʻa nau tohi fekauʻaki mo Ia.
Fuakava Foʻoú
ʻOku lekooti ʻi he Fuakava Foʻoú ʻa e ʻaloʻí, ngāue fakamatelié, ngaahi akonakí, mo e Fakalelei ʻa Sīsū Kalaisí. ʻOku kau foki ai e ngaahi akonaki ʻa e Kau ʻAposetolo ʻa Kalaisí mo ha kau ākonga kehe. ʻOku tokoniʻi kitautolu ʻi he ʻahó ni ʻe he Fuakava Foʻoú ke mahino e founga ke moʻui ʻaki e ongoongolelei ʻo Sīsū Kalaisí.
Tohi ʻa Molomoná: Ko ha Fakamoʻoni ʻe Taha ʻo Sīsū Kalaisi
Ko e Tohi ʻa Molomoná ko ha lekooti ia ʻo ha niʻihi ʻo e kakai naʻa nau nofo ʻi he ongo ʻAmeliká he kuonga muʻá. ʻOku kau ai e ngaahi akonaki mei he kau palōfitá, pea ko hono tefitoʻi taumuʻá ke fakalotoʻi e kakai kotoa pē, ko Sīsū ʻa e Kalaisí. Na‘e liliu leva ia ʻe he Palōfita ko Siosefa Sāmitá mei he ʻū lauʻi peleti koulá ʻaki e meʻafoaki mo e mālohi ʻo e ʻOtuá.
Tokāteline mo e Ngaahi Fuakava
ʻOku ʻi he Tokāteline mo e Ngaahi Fuakavá ha ngaahi fakahā naʻe foaki kia Siosefa Sāmita mo e kau palōfita kehe kimui ní. ʻOku fakamatalaʻi ʻe he ngaahi fakahaá ʻa e founga hono fokotuʻu ʻo e Siasi ʻo Kalaisí. ʻOku ʻi ai foki mo ha ngaahi akonaki mahuʻinga ʻo e ongoongoleleí fekauʻaki mo e lakanga fakataulaʻeikí, ngaahi ouau ʻo e ongoongoleleí, mo e meʻa ʻoku hoko hili ʻa e moʻuí ni.
Mataʻitofe Mahuʻingá
ʻOku kau ʻi he Mataʻitofe Mahuʻingá ʻa e ngaahi tohi ʻa Mōsese mo ʻĒpalahamé, ko e fakamoʻoni ʻa Siosefa Sāmitá, mo e Ngaahi Tefito ʻo e Tui ʻa e Siasí. ʻOku kau foki ai e Siosefa Sāmita—Mātiu, ko ha konga ʻo e liliu ʻe Siosefa Sāmita ʻo e Fuakava Foʻoú.
Ko Hono Ako ʻo e Folofolá
Kuo akoʻi kitautolu ʻe he kau palōfitá ke tau ako fakaʻaho e folofolá. ʻOku tokoni ʻetau fai iá ke fakatupulaki ʻetau tuí mo ʻunu ke ofi ange ki he Tamai Hēvaní mo Sīsū Kalaisi. ʻI heʻetau ako e folofolá ʻi he faʻa lotu, ʻe tokoniʻi kitautolu ʻe he Laumālie Māʻoniʻoní ke maʻu e tali ki heʻetau ngaahi fehuʻí.
Kau Palōfita ʻo Onopōní
ʻI he taimi ʻoku lea ai ʻa e kau palōfitá mo e kau ʻaposetoló he ʻahó ni ʻi he mālohi ʻo e Laumālie Māʻoniʻoní, ʻoku hangē ʻenau ngaahi leá ko e folofolá. Ko ha sīpinga ʻe taha ʻo e meʻá ni ko e konifelenisi lahí. Te tau lava ʻo ako e ngaahi akonaki mei he konifelenisí ʻi he ongo makasini Liahona ʻo Mē mo Nōvemá.