“Kuó u Tokangaʻi Koe,” Liahona, Siulai 2022.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Kuó u Tokangaʻi Koe
Naʻe mālohi ʻa e ongo naʻá ku maʻú ʻo ne ueʻi ai au ke u tūʻulutui.
Laʻitā mei he tokotaha faʻu tohí; ngaahi ʻīmisí mei he Getty Images
Ne u fāinga ʻi ha ngaahi taʻu lahi mo e loto-manavaheé mo e loto-mafasiá koeʻuhi ko ha fakatamaki he halá ne u foua mo ʻeku ongomātuʻá ʻi hoku taʻu tolú. Naʻe mālōlō hoku kiʻi tuongaʻane ne ʻamanaki ke fāʻeleʻí.
ʻI he lava e taʻu ʻe 25 ʻo e fakatamakí, ne ʻi ai haʻaku manatu ki ai. Hili ha ngaahi māhina siʻi, ne u kei faingataʻaʻia pē, faifai pea fokotuʻu mai ʻe ha kaungāmeʻa ke u tafoki ki heʻeku Tamai Hēvaní. Naʻá ku kata peá u fehuʻi ange, “Ko e hā te Ne fai maʻakú?”
Ne hokohoko atu ʻeku faingataʻaʻiá. Hili ha taʻu ʻe taha pe ua, ne u foʻi ʻi he loto-mamahí pea hoko ʻeku mamahí ke u loto-ʻita ai. Naʻá ku tali e faleʻi hoku kaungāmeʻá pea kamata ke tafoki ki he ʻOtuá.
Naʻá ku lotu ʻo pehē, “Kapau ʻokú ke ʻi ai moʻoni, fekauʻi mai ha taha—ha taha pē.” “ʻOku ou fie maʻu ha taha!”
Ne ʻosi mai ha ngaahi ʻaho ʻo ʻeku tuʻu ʻi he kaumatapaá, ʻo tali noa pē.
Naʻá ku pehē, “Vakai, ʻOtua, ʻoku ʻikai ke tokanga mai ha taha! “Naʻe ʻikai ke haʻu ha taha!”
ʻI he tafe hifo hoku loʻimatá, ne u hū māmālie ki fale ʻo tāpuniʻi e matapaá. Naʻá ku kaka hake ʻi he sitepú mo e ongoʻi foʻi. Ka ʻi heʻeku aʻu ki he tumutumu ʻo e sitepú, ne u haʻu ha ongo mālohi kiate au. Naʻe mālohi ʻa e ongo naʻá ku maʻú ʻo ne ueʻi ai au ke u tūʻulutui.
Pea naʻe haʻu e fakakaukau ko ʻení kiate au: “Lenei, kuó U tokangaʻi koe.”
Naʻe ʻomi ʻe he Tamai Hēvaní ʻa e fakakaukau mālohi ko iá kiate au ʻi ha founga angaʻofa ʻi he taimi naʻá ku fie maʻu lahi taha ai iá. Naʻá ku ʻiloʻi ʻokú Ne ʻofa moʻoni ʻiate au pea ʻokú Ne ʻafioʻi moʻoni au. ʻOkú Ne ʻofa lahi ʻiate au ʻo Ne foaki mai ai kiate au ʻa e tauʻatāina ke filí. He ʻikai ke Ne fakamālohiʻi au pe ha taha kehe ke muimui ʻiate Ia, ka ʻokú Ne fakaafeʻi kitautolu mo Hono ʻAló ke tau haʻu kiate Kinaua (vakai Mātiu 11:28–30).
Talu mei he ʻaho ko iá, mo ʻeku ʻiloʻi te u lava ʻo falala kiate Ia. ʻOku lelei ange ʻeku moʻuí he taimí ni koeʻuhí he ʻoku ou feinga ke muimui kiate Ia mo fanongo kiate Ia ʻi he ʻaho kotoa pē. Neongo ʻoku tuku ʻe he Tamai Hēvaní mo Sīsū Kalaisi ke u ongoʻi e mamahí, ka ʻokú Ne ʻomi foki kiate au ʻa e nongá, fiemālié, mālohí, mo e loto-toʻa kae lava ke u ako mei hono fakahoko e ngaahi meʻa faingataʻá. ‘Oku tokoni mai hono ongoʻi e mamahí ke mahino mo poupouʻi e niʻihi ʻoku faingataʻaʻiá.
Mahalo he ʻikai ke tau teitei ʻiloʻi kakato e meʻa ʻoku foua ʻe he niʻihi kehé, ka te tau lava ʻo fakahaaʻi ʻetau ʻofá kiate kinautolu ʻoku tau feohí. ʻOku ou houngaʻia ʻoku ou ʻiloʻi ʻoku ʻofeina au ʻe he Tamai Hēvaní pea ʻokú Ne ʻafioʻi au ʻi he taimi ʻoku ou ui ai kiate Iá.