“ʻOku Fakatafoki ʻe he Ngaahi Folofolá ʻa Hotau Lotó ki he ʻOtuá,” Liahona, Siulai 2022.
Haʻu, ʻo Muimui ʻIate Au
ʻOku Fakatafoki ʻe he Ngaahi Folofolá ʻa Hotau Lotó ki he ʻOtuá
Naʻe pehē ʻe Palesiteni Sipenisā W. Kimipolo ko e talanoa kau ki he tuʻi ko Sōsaia ʻi he 2 Ngaahi Tuʻí 21–23, “ko e taha ia ʻo e ngaahi talanoa lelei taha ʻi he ngaahi talanoa kātoa ʻi he folofolá” (ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: Fuakava Motuʻá 2022, 129).
Founga Naʻe ʻIlo Ai ʻe he Tuʻi ko Sōsaiá ʻa e Folofolá
King Josiah Cleansing the Land of Idols [Ko Hono Fakamaʻa ʻe he Tuʻi ko Sōsaiá ʻa e Fonua ʻo e Ngaahi Tamapuá], © Look and Learn / Bridgeman Images
Naʻe hoko ʻa Sōsaia ko e tuʻi ʻo Siuta ʻi hono taʻu valú pē. Naʻá ne maʻu ha puleʻanga ʻo ha kakai ne nau tui ki ha ngaahi ʻotua loi, ka naʻá ne fie muimui ki he ʻEikí. ʻI he taʻu hono valu ʻo ʻene pulé, naʻá ne tuʻutuʻuni ke fakaʻauha ʻa e ngaahi ʻōlita mo e ngaahi tamapua ʻo e ngaahi ʻotua loi ʻi Siuta kotoa.
Josiah, King of Judah, Restores the Worship of God in His Kingdom [Fakafoki ʻe Sōsaia ko e Tuʻi ʻo Siuta ʻa e Moihū ki he ʻOtuá ʻi Hono Puleʻangá], ʻikai ʻilo e tokotaha naʻá ne taá, faitaaʻi ʻe Stefano Bianchetti / Bridgeman Images
Hili ha taʻu ʻe hongofulu mei ai, naʻá ne kole ki hono kakaí ke nau fakafoki mai ʻa e temipale ʻi Selusalemá, ʻa ia naʻe maʻu ai ʻe he taulaʻeiki lahi ko Hilikiá ʻa e folofolá. ʻI he taimi ne lau ai ʻe he Tuʻi ko Sōsaiá ʻa e tohí, naʻe ueʻi ia ke muimui ki hono ngaahi akonakí. Naʻá ne tānaki leva hono kakaí pea lau e tohí kiate kinautolu.
Kuo fuoloa hono fakafefeka ʻe he kakaí honau lotó ki he ʻEikí. Ka naʻe tokoni ʻa e folofolá ke fakatafoki ʻa e ngaahi loto ʻo e kakaí ki he ʻOtuá. Naʻe palōmesi ange ʻe he Tuʻi ko Sōsaiá ki he kakaí te ne ʻaʻeva ʻi he ngaahi hala ʻo e ʻEikí pea talangofua ki he ngaahi fekaú.