Faingamālie ke Fakalakalaka

Fai ʻe Deborah L. Dougal

Naʻe ʻafioʻi ʻe he ʻEikí te u toe tupulaki mo fakalakalaka.

Kuo ʻosi atu ʻeni ha ngaahi taʻu lahi talu mei he mālōlō ʻa hoku husepāniti ko Selotí. Naʻe vave mo mafola lahi ʻa e kanisaá, pea naʻá ne mālōlō ʻi ha māhina ʻe tolu. Ne u fakakaukau kiate ia ʻi heʻeku ngāue ʻi hoku ʻapí.

ʻI heʻeku hiki ha kiʻi ʻakau ki ha kapa kehe, ne u maʻu ha fakakaukau. Kimuʻa peá u taʻaki e kiʻi ʻakaú ke toe toó, naʻe sai pē ʻa e ʻakaú ia. Naʻe ʻosi ʻi fiemālie pē ia ʻi he kapa naʻe ʻosi tō aí, ka naʻe ʻikai ke maʻuiʻui. Naʻá ku ʻilo kapau he ʻikai ke u hiki ia ki ha kapa kehe, ʻe aʻu ki ha taimi ʻe ʻikai ke toe matala pea mahalo ʻe aʻu ai pē ʻo ʻikai toe tupu. He ʻikai ke lava ia ʻo fakahoko hono lelei tahá.

Ko ia, naʻá ku fakakaukau ke u ʻoange ʻa e faingamālie ki he kiʻi fuʻu ʻakaú ke tupu ai, ʻaki hono hiki ia ki ha kapa ʻakau lahi ange. Naʻe ʻikai ko ha fuʻu kapa ʻakau lahi ia—ka naʻe lahi ʻaki pē ha ʻinisi ʻe ua hono fōlahí. Kapau te u tuku ange ha fuʻu konga ʻatā lahi, ʻe lava ke fuʻu lahi e vai aí pea mate ʻi ha palapalangia ʻa e aká.

Naʻá ku ʻamanaki ʻe faingataʻaʻia ʻa e kiʻi fuʻu ʻakaú ʻi heʻene feinga ke feangai mo e kapa foʻoú. Naʻe fakafiefiemālie pē mo hao ʻi hono kiʻi kapa ʻakau kuo anga ki aí. Naʻe ʻikai ke ne ʻiloʻi ʻe tokoni ʻa e liliú ke hoko atu ʻene tupú. Naʻe fie maʻu ke u tanumaki ia, ʻoange ki ai ʻa e maama feʻunga, vai, mo e ngaahi meʻatokoni fakatupu ivi naʻe fie maʻu lolotonga e taimi ko ʻeni ʻo e fakafeangai ki he kapa foʻoú. Naʻá ku ʻiloʻi ʻe faifai pē pea toe maʻuiʻui pea matala ia.

ʻI heʻeku fakakaukau ki heʻeku moʻui ko ha uitoú, naʻá ku fakatokangaʻi naʻá ku hangē ko e kiʻi fuʻu ʻakau ko iá. Naʻá ku fiemālie pē. Naʻá ku sai pē. Ka ʻi he mālōlō hoku husepānití, ne u ongoʻi e fanafana mai ʻa e Laumālié kuó u aʻu ki ha tūkunga foʻou ʻo e fakalakalaká. Naʻe kei ʻi ai pē ha ngaahi meʻa ne fie maʻu ke u ako mo fakahoko ʻi he moʻuí ni.

ʻI he taʻu ʻe ua hono hokó, naʻe pekia mo ha kau tangata kehe ʻe toko fitu ʻi homau uōtí. Naʻe kamata ke u kole ki hoku ngaahi kaungāmeʻa uitou foʻoú ke mau fakataha ʻo talanoa, ʻaʻahi, mo fetokoniʻaki—koeʻuhí ke siʻi ai ʻemau ongoʻi taʻelatá. Naʻe ʻikai ha taha ʻiate kimautolu ʻe teitei fie fili ke “liliu.” Ka ʻi heʻeku feinga ke feangai mo e moʻui fakamatelie ʻoku ʻikai kau ai hoku husepānití, ne u ʻilo te u lava ʻo tokoni ki he niʻihi kehe ne nau fehangahangai mo ha faingataʻa tataú. Naʻá ku ʻiloʻi foki naʻe lahi ha ngaahi faingamālie ke feohi ai mo e fānaú mo e makapuná pea fakapapauʻi ange kiate kinautolu ʻe lava ke toe fakataha homau fāmilí ʻi he moʻui ka hokó tuʻunga ʻi he Fakalelei ʻa Sīsū Kalaisí.

Naʻe ʻikai ke u mei ʻamanaki ki ha tupulaki te u maʻu koeʻuhí ko e mole ʻa hoku malí. Ka naʻe ala mai ʻa e Tamai Hēvaní ʻo “liliu” au, ʻo tuku mai ha faingamālie ke u tupulaki ai ʻaki hono ʻomi ha faingamālie lahi ange—ko ha pole foʻou foʻou naʻe ʻomi ai ha faingamālie ki he fakalakalaká.

ʻOku ou kei ʻofa pē kia Seloti he ʻaho kotoa pē. Hili ha ngaahi taʻu mei ai, ʻoku ou kei fāinga pē ʻi heʻeku feinga ke feangai mo e liliu ʻo e moʻui ʻo ʻikai te ne kau aí. Ka ʻoku ou ʻilo ʻe lehilehiʻi au ʻe he ʻEikí ʻi heʻeku moʻuí. ʻI he fakalau ʻa e taimí, pea mo e falala kiate Iá, te u toe tupulaki mo fakalakalaka.

ʻOku nofo ʻa e tokotaha naʻá ne faʻú ʻi ʻAitahō, USA.