Fakakomipiuta Pē: Kakai Lalahi Kei Talavoú
ʻOku Fuʻu Tōmui Nai ke u Ngāue Fakafaifekau?
ʻI hoku taʻu 25, naʻá ku fakapapauʻi kuo ʻosi hoku ngaahi faingamālie ke ngāue fakafaifekaú.
ʻI heʻeku ʻosi mei he ako māʻolungá, ne u fakakaukau ke u hiki ki ʻIutā, USA, ʻa ia ne nofo ai hoku ongo taʻoketé hili ʻena foki mai mei heʻena ngāue fakafaifekaú. Naʻa na fokotuʻu haʻana kautaha langa pea ʻomi ʻa e faingamālie ke u ngāue kiate kinaua lolotonga ʻeku feinga ke ʻiloʻi ʻa e meʻa naʻá ku fie fakahoko ʻi heʻeku moʻuí.
Naʻá na fakatou feinga ke fakalotoʻi au ke u ʻalu ʻo ngāue fakafaifekau. Naʻá ku ongoʻi maʻu pē ke u ʻalu ʻo ngāue fakafaifekau ka naʻe ʻikai ke u lava ʻo teuteu. Naʻe ʻikai ke u fakahoko ʻa e ngaahi teuteu ʻoku fie maʻu ki he ngāue fakafaifekaú, ka naʻá ku fili ke u ngāue ʻi ha tuʻunga kehe. ʻI hoku taʻu 20, naʻá ku hoko ko ha tokotaha faitoʻo ʻi he Kau Tau ʻa ʻAmeliká.
Neongo ʻeku kau ki he sōtiá, ka naʻe ʻikai pē ke mavahe ʻa e ongo ko ia ke u ʻalu ʻo ngāue fakafaifekaú. ʻI heʻeku hū atu he taʻu fakaʻosi ʻo ʻeku ngāue fakakautaú, ne u fakalaulauloto ki he meʻa hono hokó.
“Te u toe hoko atu pē ʻi he ngāue fakakautaú? Te u fakaʻosi nai hoku mataʻitohi B.A? Pe te u ʻalu ʻo fakahoko ʻa e ngaahi liliu ʻoku fie maʻu ʻi heʻeku moʻuí, fakatomala, mo teuteu ke ngāue fakafaifekau? Neongo kapau ʻoku ou fie ngāue, ʻoku ou fuʻu motuʻa nai?” Ko e niʻihi ʻeni ʻo e ngaahi fehuʻi naʻá ku fakakaukau ki aí.
ʻI heʻeku fakakaukau pe te u ʻalu ʻo ngāue fakafaifekaú, ne u ongoʻi mālohi ʻoku ʻi ai ha kakai ne nau tatali mai ke u fakaafeʻi kinautolu ke haʻu kia Kalaisi. Naʻe hoko ʻa e ongo ko ʻení ko e kamataʻanga ia ʻo ʻeku fili ke teuteu ke ngāue fakafaifekaú. Naʻá ku fakakaukau neongo naʻe siʻi pē faingamālie ke u ngāue fakafaifekau ʻi hoku taʻu motuʻá, ka naʻe pau ke u feinga.
ʻOku ou tui ko e tokolahi taha ʻo e kau teuteu ngāue fakafaifekaú, ʻoku nau maʻu ha ngaahi ongo fakaeloto kehekehe mo e mālohi ʻo e Laumalie Māʻoniʻoní ʻi hono fakaava mo lau honau uiuiʻi ngāue fakafaifekaú. Ka neongo iá, kiate au, naʻe hoko ia ʻi he ʻaho naʻe fakahā mai ai ʻoku ou kei feʻunga pē ke tohi kole ke u alu ʻo ngāue fakafaifekaú.
ʻI heʻeku fakatomala mo teuteu ke ngāué, ne u ongoʻi ha houngaʻia lahi ki hoku Fakamoʻui ko Sīsū Kalaisí, pea mo ʻeku Tamai Hēvaní. Naʻá ku ongoʻi ʻo hangē naʻá Na ʻōʻōfaki au ʻi Hona toʻukupú mo pehē mai: “ʻOkú ma fakamolemoleʻi koe. ʻOkú ma tali hoʻo fakatomalá mo e ngaahi liliu kuó ke faí pea mo e tuʻunga kuó ke aʻusiá. ʻOkú ke moʻui taau ke ngāue.” Naʻá ku ongoʻi fiefia.
Ne faifai peá u maʻu hoku uiuiʻí ke ngāue ʻi he Misiona Phillipines Quezon City.
Ko ha aʻusia makehe ʻa e hū ki he senitā akoʻanga fakafaifekaú ʻi he taʻu 25. Ko e tokolahi taha ʻo e kau faifekau kehé naʻa nau kei iiki ange. Ko e tokolahi ne toki ʻosi mei he ako māʻolungá pe kuo ʻosi honau taʻu ʻuluaki ʻi he ʻunivēsití. Ne aʻusia ʻe ha niʻihi honau fuofua taimi mavahe mei ʻapí mo e fāmilí. Ka kiate au, ne toki ʻosi pē ʻeku kau ki he Kau Tau ʻa ʻAmeliká pea naʻá ku ʻosi feangai mo e feilaulau lahi mo e fakaangaanga naʻe toki kamata fehangahangai mo e kau faifekau kehé. Naʻe hanga ʻe he meʻa ne u aʻusiá ʻo ʻomi kiate au ha faingamālie ke fakasiʻisiʻi ʻeku tokanga kiate aú kae lahi ange ʻeku manavaʻofa mo fakalotolahi ki he niʻihi kehé. Naʻe ʻomi foki ʻe hoku taʻu motuʻá mo e aʻusiá ha ʻilo ki he mahuʻinga ʻo e taimí mo ʻomi ha loto vēkeveke ke ngāue ʻi he tokanga, taumuʻa, mo e faivelenga.
ʻE hoko maʻu pē ʻeku ngāue fakafaifekaú ko e taha ʻo e ngaahi aʻusia mahuʻinga taha ʻo ʻeku—pea ki—heʻeku moʻuí. Naʻe fakamālohia mo fakamaʻu ai hoku fakavaʻé ʻa ia naʻe langa ʻi he maka ʻo hoku Huhuʻí (vakai, Hilamani 5:12). ʻOku ou fakamālō lahi ʻi heʻeku maʻu e faingamālie ke ngāué.
ʻOku ou fakamoʻoni ʻoku ʻikai te ke fuʻu motuʻa ke ʻomi e ngaahi laumālié kia Kalaisi—ʻo tatau ai pē pe ko ha faifekau taimi kakato pe ko ha kaungāmeʻa mo ha kaungāʻapi. ʻOku tali ʻe he ʻEikí ʻa ʻetau ngaahi feinga kotoa pē ke tauhi kiate Iá—ʻi he taʻu motuʻa kotoa pē.