Ngaahi Moʻoniʻi Meʻa ʻe 5 fekauʻaki mo ʻĒseta

ʻĪmisi

Ko e hū ʻa ʻĒseta ki he ʻao ʻo e Tuʻí

Esther Approaching the King [Ko e Hū ʻa ʻĒseta ki he ʻAo ʻo e Tuʻí], tā ʻe Robert T. Barrett, ʻoua naʻa hiki hano tatau

1. Ko ʻĒsetá ko ha tokotaha paea.

Ko ʻĒsetá ko ha Siu, pea ʻi he mālōlō ʻene ongomātuʻá, naʻe ohi hake ia ʻe hono kāinga ko Motekiaí, ʻa ia ko ha Siu foki ia (vakai ʻĒseta 2:7).

2. Naʻe nofo ʻa ʻĒseta ʻi Peasia.

Naʻe nofo ʻa ʻĒseta ʻi Sūsani, Peasia (ʻIulani ʻo onopōní), hili ha taʻu ʻe 100 tupu mei hono ʻave pōpula e kau Siú ki Pāpiloné.

3. Naʻe pau ke fakapulipuli ʻe ʻĒseta hono tuʻunga faka-Siú.

ʻI he kole ʻa Motekiaí, naʻe ʻikai ai ke fakahā ʻe ʻĒseta hono tukufakaholo faka-Siú ki ha taha pē. Naʻá ne fakapulipuliʻi ia, ʻo aʻu pē ki he hili ʻene hoko ko e kuiní. (Vakai ʻĒseta 2:10, 20.)

4. Naʻe līʻoa ʻe ʻĒseta ʻene moʻuí ke fakahaofi hono kakaí.

Lolotonga e kuonga ʻo ʻĒsetá, naʻe faʻa tuʻu laveangofua maʻu pē ʻa e ngaahi tuʻí ki ha fakapoongi. Ko ia, koeʻuhí ko e malu ʻa e tuʻí, naʻe tuʻutuʻuni ai ʻe he ʻulungāanga fakafonuá ʻoku ʻikai totonu ke ʻalu ha taha ki he tuʻí taʻe te ne fakaafeʻi ia. Ko e ʻuhinga ia naʻe fakatuʻutāmaki ai e moʻui ʻa ʻĒsetá ʻi heʻene ʻalu ki he tuʻí ke fakaafeʻi ia ki ha kātoanga kai ke fakahā ai ʻa e faʻufaʻu ʻa Hāmani ke tāmateʻi e kau Siú (vakai ʻĒseta 5; 7).

5. Naʻe tui ʻa ʻĒseta ki he ʻOtuá.

Naʻe kole ʻe ʻĒseta ke ʻaukai ʻa e kau Siu kotoa pē ʻi Sūsani ʻi ha ʻaho ʻe tolu kimuʻa peá ne ʻalu atu ki he tuʻí (vakai ʻĒseta 4:16). Koeʻuhí ko e loto-toʻa ʻa ʻĒsetá mo e ngaahi tāpuaki ʻa e ʻEikí, naʻe fakahaofi ai ʻa e kau Siú.