“ʻOku ʻIkai Te Ke Teitei Tuēnoa,” Liahona, Siulai 2022.
Haʻu, ʻo Muimui ʻIate Au
ʻOku ʻIkai Te Ke Teitei Tuēnoa
Kuó ke ongoʻi tuēnoa pe manavasiʻi nai ʻi he meʻa ʻe hoko maí? Naʻe ongoʻi pehē foki mo e tamaioʻeiki ʻa ʻIlaisá ʻi heʻene mamata ki he kau ʻa Sīlia ʻi he fanga hōsí mo e sālioté ʻoku nau takatakaiʻi ʻa Tōtani, ko e kolo tupuʻanga ʻo ʻIlaisá.
Ngaahi tā fakatātā ʻa Denis Freitas
ʻI he ilifia ʻa e tamaioʻeikí naʻá ne kaila kia ʻIlaisa, “ʻOiauē ʻa ʻeku ʻeiki! ko e hā te ta faí?” (2 Ngaahi Tuʻi 6:15).
Naʻe tali ange ʻa ʻIlaisa ʻi he tui, “ʻOua naʻá ke manavahē: he ko kinautolu ʻoku kau mai kiate kitauá ʻoku toko lahi hake ʻiate kinautolu ʻoku kau kiate kinautolú” (veesi 16). Hili e lotu ʻa ʻIlaisa ke fakaʻā ʻe he ʻEikí ʻa e mata ʻo e tamaioʻeikí, naʻe mamata e tamaioʻeikí ki he “fanga hoosi mo e ngaahi saliote afi naʻe nofo takatakai ʻia ʻIlaisa” (veesi 17).
“Mahalo ʻe ʻi ai ha taimi te ke hangē pē ko e tamaioʻeikí ʻo fiu feinga ke ʻilo ki he anga ʻo e ngāue mai ʻa e ʻOtuá ki hoʻo moʻuí—ʻa e ngaahi taimi ʻokú ke ongoʻi lōmekina aí—he taulōfuʻu ʻa e ngaahi faingataʻa ʻo e moʻui matelié. Kiʻi tatali pea falala ki he ʻOtuá mo ʻEne taimí, koeʻuhí te ke lava ʻo falala ki Hono finangaló ʻaki ho lotó kotoa. … Te ke lava ʻo lotu ki he ʻEikí ke Ne fakaʻā ho matá ke ke sio ki ha ngaahi meʻa ʻoku ʻikai ke angamaheni hoʻo sio ki aí” (Michelle D. Craig, “Mata ke Mamata,” Liahona, Nōvema 2020, 15).
Mahalo ʻe ʻikai ke tau mamata ki ai, ka ʻoku takatakaiʻi kitautolu ʻe he ʻEikí mo ʻEne kau ʻāngeló (vakai Tokāteline mo e Ngaahi Fuakava 84:88). “Ka kuo kau ʻa e ʻOtuá maʻatautolu, pea ko hai ʻe angatuʻu kiate kitautolu?” (Loma 8:31).