Ko Hono ʻAi ke Toe Lahi Ange Hono Maʻu ʻo e Ngaahi Ouau Fakatemipalé

ʻI he kotoa ʻo e hisitōliá, kuo fakahoko ai ʻe he ʻEikí ha ngaahi ouau mahuʻinga ʻi Hono ngaahi temipale māʻoniʻoní. ʻI he ngaahi ouau ko ʻeni ʻo e lakanga fakataulaʻeikí mo e ngaahi fuakava fekauʻaki mo iá, ʻokú Ne haʻi kitautolu kiate Ia mo ʻai ke malava ʻo maʻu ʻa e hakeakiʻí.

Naʻe maʻu ʻe he Palōfita ko Siosefa Sāmitá ha fakahā ki he mahuʻinga ko ia ʻo e ngaahi ouau fakatemipalé maʻá e kakai moʻuí mo e kau pekiá fakatouʻosi kimuʻa pea fokotuʻutuʻu fakaʻofisiale ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi he 1830 (vakai Tokāteline mo e Ngaahi Fuakava 2).

Naʻe fakaʻilongaʻi e mahuʻinga ʻo e ngaahi ouau ko ʻení ʻi he ngaahi fuofua ʻaho ʻo hono Fakafoki Mai ʻo e Ongoongoleleí ʻi he feinga ke langa e ngaahi temipalé neongo e ngaahi tūkunga faingataʻá. Talu mei ai, mo e lava ke fakatokangaʻi honau mahuʻingá ʻi he taimi ʻoku langa ai ʻa e ngaahi temipalé ke ofi ange ki he kāingalotu ʻo e Siasí ʻi he ngaahi feituʻu ʻi he funga ʻo e māmaní.

1831: Naʻe fakahā ʻe he ʻEikí ki he Kāingalotú, kuo fokotuʻu ha temipale maʻa Tauʻatāina, Mīsuli (vakai Tokāteline mo e Ngaahi Fuakava 57:1–3). ʻI he 1838, naʻe fokotuʻu foki mo ha temipale ki he Hihifo Mamaʻó, Mīsuli (vakai Tokāteline mo e Ngaahi Fuakava 115:7–16). Koeʻuhi ko e moveuveú, naʻe ʻikai langa ai ʻa e ongo temipale ko ʻení ʻi he taimi ko iá. ʻOku ʻikai ke na kau ʻi he lisi lolotonga ʻo e ngaahi temipale kuo fanongonongó pea ʻoku ʻikai ha palani lolotonga ki ai.

Temipale Kirtland

1836: Naʻe fakatapui ʻa e Temipale Kirtland ʻi Māʻasi 1836, hili pē ia ha taʻu ʻe ono mei hono fokotuʻu e Siasi kuo fakafoki maí ʻi he 1830. Naʻe liliu e tokotaha haʻaná hili ha mavahe e tokolahi taha ʻo e kāingalotú mei Ketilani ʻi he 1838, pea ʻoku ʻikai ke toe lau ia ko ha taha ʻo e ngaahi temipale kuo fakatapuí.

Temipale Nauvoo

Temipale Nauvoo Illinois (langa foʻoú)

1846: Naʻe fuofua fakatapui ʻa e Temipale Nauvoo ʻi Mē ʻo e 1846. Naʻe maumauʻi lahi ia ʻe ha afi ʻi he 1848. Naʻe toe langa ʻa e Temipale Nauvoo ʻi he feituʻu ne fuofua tuʻu aí pea fakatapui ʻi he 2002.

Temipale Salt Lake

1847: Naʻe fanongonongo ʻe Pilikihami ʻIongi ʻa e feituʻu ʻe tuʻu ai e Temipale Salt Lake ʻi ha ʻaho pē ʻe fā hili e aʻu ki he teleʻá. Naʻe toki fakatapui ʻa e temipalé ʻi he 1893.

Temipale St. George Utah

1855: ʻI he vahaʻataimi ʻo e liʻaki e Temipale Nauvoo ʻi he 1846 mo hono fakatapui ko ia e Temipale St. George Utah ʻi he 1877, ne ʻikai ha toe temipale ne fakatapui. Naʻe lava ke maʻu ʻe he Kāingalotú ʻenau ngaahi ouau fakatemipalé mei he Fale ʻEnitaumení ʻo ngata ʻi hono holoki ʻi he 1889.

Temipale Mesa Arizona

1945: Naʻe fakahoko ʻi he Temipale Mesa Arizona ha ngaahi ouau ʻi he lea faka-Sipeiní, ko e fuofua temipale ia ke fakahoko ai ha ngaahi ouau ʻi ha lea fakafonua makehe mei he lea faka-Pilitāniá.

1978: ʻI he fakatapui e Temipale São Paulo Brazil ʻi he 1978, naʻe ngāue ha ngaahi temipale ʻe 17.

1985: Lolotonga e hoko ʻa Palesiteni Sipenisā W. Kimipolo ko e Palesiteni ʻo e Siasí mei he 1973 ki he 1985, naʻe fanongonongo ha ngaahi temipale ʻe 31.

1997: Naʻe fanongonongo ʻe Palesiteni Kōtoni B. Hingikelī ha ngaahi fokotuʻutuʻu ki ha ngaahi temipale iiki. ʻI he 1998, naʻá ne fanongonongo ʻene taumuʻa ke aʻu e ngaahi temipale ʻoku ngāué ki he 100, ʻi he taʻu 2000.

2000: Naʻe fakatapui ʻe Palesiteni Hingikelī ha ngaahi temipale ʻe 4 ʻi he uike ʻe taha (Sune 11–18): ko e Temipale Fukuoka Japan, Temipale Adelaide Australia, Temipale Melbourne Australia, mo e Temipale Suva Fiji.

2008: Lolotonga e hoko ʻa Palesiteni Hingikelī ko e Palesiteni ʻo e Siasí mei he 1995 ki he 2008, naʻe fanongonongo ha ngaahi temipale ʻe 78.

Temipale Arequipa Peru

2018: Lolotonga e hoko ʻa Palesiteni Tōmasi S. Monisoni ko e Palesiteni ʻo e Siasí mei he 2008 ki he 2018, naʻe fanongonongo ha ngaahi temipale ʻe 45.

2021: ʻI he ngaahi fuofua taʻu ʻe fā ʻo e hoko ʻa Palesiteni Lāsolo M. Nalesoni ko ha Palesiteni ʻo e Siasí mei he 2018 ʻo aʻu ki he fakaʻosinga ʻo e 2021, naʻe fanongonongo ha ngaahi temipale ʻe 83.

2022: ʻI he aʻu mai ki he 1 ʻo Sānuali, 2022, kuo fanongonongo, lolotonga langa, pe fakatapui ha ngaahi temipale ʻe 265.