“Ko e ʻUnu ke Ofi Ange kia Sīsū Kalaisí,” Liahona, Siulai 2022.
Maʻá e Ngaahi Mātuʻá
Ko e ʻUnu ke Ofi Ange kia Sīsū Kalaisí
Siʻi Ngaahi Mātuʻa,
Kuo foaki mai ʻe he ʻEikí kiate kitautolu ʻa ʻEne ongoongoleleí, lakanga fakataulaʻeikí, temipalé, mo ha ngaahi maʻuʻanga tokoni kehe ke tokoni ke tau ako ʻiate Ia mo teuteu ke toe foki hake kiate Ia. ʻOku vahevahe ʻe he makasini ko ʻení ha ngaahi founga te tau lava kotoa ai ʻo ofi ange kia Kalaisi neongo e ngaahi faingataʻa ʻokú ne ʻākilotoa kitautolú.
Fealēleaʻaki ʻi he Ongoongoleleí
Ko e Temipalé: Ko e Potu Toputapu Taha ʻo e Moihuú
ʻI he peesi 4, te ke lava ʻo fakaʻaongaʻi e ngaahi akonaki meia ʻEletā Tēvita A. Petinaá ke akoʻi ki ho fāmilí e mahuʻinga ʻo e ngaahi ouau fakatemipalé. ʻOku hoko ʻa e muimui ki he fakamatala ko iá ko hano fakatahatahaʻi ia ʻo ha ngaahi fakamoʻoni mei he kāingalotu ʻi he funga ʻo e māmaní fekauʻaki mo ha ngaahi temipale foʻou ʻi honau feituʻú. Fakaʻaliʻali ki ho fāmilí ʻa e saati he peesi peesi 12 ke sio ki he tupulaki ʻa e lahi ʻo e ngaahi temipale kuo fanongonongo kimuí ni maí. ʻOku ʻomi fēfē ʻe he ngaahi ouau fakatemipalé ʻa e fakafoʻituituí mo e ngaahi fāmilí ke nau ofi ange ki he Tamai Hēvaní mo Sīsū Kalaisi?
Ko e Hā ʻa e Folofola?
Te ke lava ʻo fakaʻaongaʻi ʻa e fakamatala ki he Ngaahi Tefitoʻi Meʻa Mahuʻinga ʻo e Ongoongoleleí ʻi he peesi peesi 22 ke akoʻi pe ko e hā ʻa e ngaahi potufolofola mo e ʻuhinga ʻoku mahuʻinga ai ke ako kinautolu mo e ngaahi akonaki ʻa e kau palōfita ʻo onopōní.
ʻE Fakahinohinoʻi Kitautolu ʻe he ʻEikí
ʻI he peesi 40, ʻoku fakamatala ai ʻa ʻEletā Silo Simili ki ha ngaahi sīpinga ʻo ha kakai kuo nau hoko ko ha ngaahi meʻangāue ʻi he toʻukupu ʻo e ʻEikí. Lau ha ngaahi kupuʻi lea mei he fakamatalá pea aleaʻi mo e kau mēmipa ʻo e fāmilí ʻa e founga ʻe lava ke nau tali ai e ngaahi ueʻi ʻa e Laumālié pea hoko ko ha meʻangāue ʻi he toʻukupu ʻo e ʻEikí.
Fiefia Fakafāmili ʻi he Haʻu, ʻo Muimui ʻIate Aú
Ki ha Taimi Hangē ko ʻEní
Naʻe loto-toʻa ʻa ʻĒseta ʻi heʻene fakataufolofola ki he tuʻí mo fakahaofi hono kakaí.
-
Tangutu fuopotopoto ʻo kole ki ha mēmipa ʻo e fāmilí ke ne fakahingoa ha moʻungaʻi tangata he folofolá naʻe loto-toʻa, ʻo fakahaaʻi ha founga ʻe taha naʻe loto-toʻa ai e tokotahá (hangē ko ʻení: ʻĒseta, loto-toʻa ke lea).
-
ʻOku lea ʻaki ʻe he tokotaha hoko ʻi he siakalé ʻa e hingoa ʻo e ʻuluaki moʻungaʻi tangatá peá ne fili leva ha tokotaha kehe ʻi he folofolá ʻoku nau pehē naʻe loto-toʻa pea fakamatalaʻi hono ʻuhingá.
-
Hokohoko atu ʻi he siakalé hono fakahingoa ʻa e tokotaha takitaha kuo fili mei he folofolá pea toe tānaki atu ha taha foʻou. Hokohoko atu e vaʻingá kae ʻoua kuo maʻu ʻe he taha kotoa ha faingamālie.
Fealēleaʻakí: Te tau lava fēfē ʻo loto-toʻa ʻi hotau kuongá ni pea ʻi hotau ngaahi tūkungá? Te tau faitāpuekina fēfē nai ʻa e moʻui ʻa e niʻihi kehé ʻi he taimi ʻoku tau ngāue loto-toʻa ai mo fakahoko ʻa e meʻa totonú?
Mālohí ʻi he Tokolahí
Lau ʻa e talanoa ʻo ʻIlaisa mo e tamaioʻeiki kei talavou ʻi he 2 Ngaahi Tuʻi 6:8–23.
-
ʻOmi ha vaʻakau manifi ʻa ia ʻe lava ʻo fesiʻi ngofua.
-
Fakatukupaaʻi ha taha ke ne fesiʻi ia.
-
Fakatahaʻi ha vaʻakau ʻe 10 pe lahi ange. Fakatukupaaʻi ʻa e tokotaha tatau pē ke ne fesiʻi ha ngaahi vaʻakau kuo fakatahaʻi ʻo ʻikai vahevaheʻi.
-
Ko e hā naʻe faingataʻa ange ai ʻa e tukupā hono uá?
-
Lau 2 Ngaahi Tuʻi 6:16-17: “ʻOua naʻá ke manavahē: he ko kinautolu ʻoku kau mai kiate kitauá ʻoku tokolahi hake ʻiate kinautolu ʻoku kau kiate kinautolú. Pea naʻe lotu ʻa ʻIlaisa, ʻo ne pehē, ʻE [ʻEiki], ʻoku ou kole kiate koe, ke ke fakaʻā ʻa hono matá, koeʻuhi ke ne mamata. Pea naʻe fakaʻā ʻa e mata ʻo e talavoú ʻe [he ʻEikí]; pea naʻá ne sio: pea vakai, naʻe fonu ʻa e moʻungá ʻi he fanga hōsí mo e ngaahi saliote afi naʻe nofo takatakai ʻia ʻIlaisá.”
-
Ko hai naʻe mamata ki ai ʻa ʻIlaisa mo e tamaioʻeiki kei talavoú, ʻokú ne maluʻi kinauá?
-
Lau ʻeni: “Hangē pē ko e tamaioʻeiki ko ia ʻa ʻIlaisá, ʻoku lahi ange ʻa e kakai ʻoku mou kau fakatahá, ʻiate kinautolu ʻoku mou mamata ʻoku fakafepaki atú. ʻOku ʻikai lava homou mata fakamatelié ʻo mamata ki he niʻihi ʻoku mou kau fakatahá” (Henry B. Eyring, “ʻA Kimoutolu ʻOku Kamata Fai e Ngāué,” Liahona, Nōvema 2008, 58).
Fealēleaʻakí: Lau ʻa e Tokāteline mo e Ngaahi Fuakava 84:88. ʻI he taimi te tau ongoʻi tuenoa aí, te tau falala fēfē ʻoku ʻikai ke tau tuenoá? ʻOku maluʻi mo tokoniʻi fēfē kitautolu ʻe he ʻEikí he ʻahó ni? (Ki ha ngaahi fakakaukau, vakai ki he Ronald A. Rasband, “ʻOua ʻe Puputuʻu,” Liahona, Nōvema 2018, 18–21.)