“Ko ha ʻAloʻofa Ongongofua mei he ʻEikí,” Liahona, Siulai 2022.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko ha ʻAloʻofa Ongongofua mei he ʻEikí
Naʻá ku fifili ʻi ha ngaahi taʻu lahi pe naʻe taʻeʻaonga nai ʻeku ngaahi ngāue fakafaifekau ʻi he Ngaahi Matāfanga Falaniseé.
Tā ʻo M. Gary Hadfield mo hono uaifí ʻi he angalelei ʻa e tokotaha faʻú
ʻI heʻeku kei talavoú, naʻá ku ngāue fakafaifekau māhina ʻe 30 ʻi Falanisē mei he 1955 ki he 1958. Lolotonga e māhina ʻe valu fakaʻosi ʻo ʻeku ngāue fakafaifekaú, naʻe ui au ke u hoko ko e palesiteni fakakolo ʻi Keinisi. Naʻe siʻisiʻi e kiʻi Kolo Keinisi, ʻa ia ne siʻi ange e kāingalotu mālohí ʻi he toko 10.
Naʻe talamai ʻe heʻemau palesiteni fakamisioná, ʻokú ne palani ke tāpuni ha kolo ʻe taha kapau he ʻikai haʻamau ngaahi papitaiso. Ko ha mana ʻa e vave hono kole mai ʻe ha kau fafine matuʻotuʻa ʻe toko tolu ke papitaiso kinautolú. Hili ʻenau papitaisó, naʻe hiki hanau toko taha ki Tisione, ʻa ia ne ʻikai ha kolo ai ʻo e Siasí, pea naʻe faingataʻa ke kei mālohi ʻa e toko ua ne nofó, ʻi he Siasí. Ka neongo ia, ne tokoni e kāingalotu foʻou ko ʻeni ʻo e Siasí ke kei fakaava pē ʻa e koló.
Fakakaukauloto ki heʻeku ʻohovale ʻi heʻeku foki ki Keinisi ʻi he 1990 tupú mo hoku uaifi ko Kefiliní, ʻo sio ki ha falelotu foʻou e Siasí ʻi Le Kanieti, ko ha feituʻu fakaʻofoʻofa ʻi he tafaʻaki moʻungá ʻoku hanga fakahangatonu hifo ki Keinisi. ʻOku lotu ki ai ha uooti tokolahi ʻa ia ʻoku ʻamanaki ke vahe ua. ʻI he fanongo e kāingalotú ki he talanoa fakaʻofa ʻo ʻeku ngāue ʻi Keinisí, ne fakafetaulaki mai kiate kimaua ha ngaahi kui fefine ʻe toko tolu ne nau kau ki he Siasí ʻi he 1960 tupú.
Naʻa nau talamai “Kapau ne ʻikai ke kei ava e Kolo Keinisí, he ʻikai pē ke mau ʻilo kau ki hono Fakafoki Mai ʻo e Siasi ʻo Kalaisí! ʻOku ngāue he taimí ni homau makapuná ʻi he malaʻe ʻo e ngāue fakafaifekaú.”
ʻI heʻemau fiefia fakataha ʻi he ola fakafiefia ʻo hono ʻai ke kei ava e koló, ne kau mai ha tangata makehe ʻa ia naʻá ne fanongo mai ki heʻemau fepōtalanoaʻakí.
“Ko Brother Paea au, pea naʻá ku kau mo au ki he Siasí ʻi Keinisi he 1960.” “Naʻá ku hoko ko ha pīsope kimuʻa ʻi heni, palesiteni ʻo e Siteiki Nisé, pea mo ha palesiteni fakamisiona ʻi Sipeini.”
Kimui aí, ne hoko ʻa Brother Paea ko e palesiteni ʻo e Temipale Madrid Spain mo ha Fitungofulu Fakaʻēlia. Ne mau tangi kotoa ʻi he fiefia ʻi he fanongo ki heʻenau ngaahi talanoá.
Ko ha ʻaloʻofa angaʻofa ia ʻa e ʻEikí maʻaku ke u ʻiloʻi naʻe ʻikai taʻeʻaonga ʻeku ngāue fakafaifekau ʻi he Matāfanga Falaniseé, ʻo hangē ko ia ne u fakakaukau ki ai ʻi he ngaahi taʻu lahi. ʻOku ʻafioʻi lelei ʻe he ʻEikí ʻetau ngaahi ngāué pea tāpuekina ia ʻaki ʻa e fakalakalaka, neongo ʻoku ʻikai ke tau lava ʻo mamata ki he olá ʻi he kahaʻú ʻo hangē ko Iá.