Ko Hono Mātā e Ngaahi Tāpuaki ʻo e Temipalé ne u Tatali ki Aí
Siulai 2022
“Ko Hono Mātā e Ngaahi Tāpuaki ʻo e Temipalé ne u Tatali ki Aí” Liahona, Siulai 2022.
Ko Hono Mātā e Ngaahi Tāpuaki ʻo e Temipalé ne u Tatali ki Aí
ʻOku vahevahe ʻe he kāingalotu ʻi he funga ʻo e māmaní ʻa e ngaahi tāpuaki kuo nau mātā ʻi he ʻi ai e ngaahi temipale ʻi honau ngaahi feituʻú.
Tā ʻo e Temipale Brigham City Utah
Ko e ngaahi temipalé ʻa e ngaahi potu toputapu taha ʻo e moihuú ʻi he māmaní. ʻOku ofi ange ai e kāingalotu ʻo e Siasí ki he ʻOtuá, ʻi heʻenau kau atu ki he ngaahi ouau mahuʻingá mo fai ha ngaahi fuakava maʻanautolu pea mo honau kāinga kuo pekiá. Ko e fale ia ʻo e ʻEikí, pea ʻe lava ke tafe atu ʻa e melinó, fiemālié, mo e fakahaá kiate kinautolu ʻoku hū ki aí.
Ka ʻi he mafola ʻa e Siasi ʻo Sīsū Kalaisi kuo fakafoki maí ki he ngaahi tuliki mamaʻo taha ʻo e māmaní, kuo hoko ʻa e aʻu ki he temipalé ko ha pole ki ha tokolahi. Pea ʻi he ngaahi taʻu kimui ní, kuo fakangatangata ʻa e hū ki he ngaahi temipalé ki ha tokolahi koeʻuhí ko e mahaki fakaʻauha COVID-19.
ʻI he konifelenisi lahi tatau ʻa ia ne hikinimaʻi ai ʻa Palesiteni Lāsolo M. Nalesoni ko e Palesiteni ʻo e Siasí, naʻá ne pehē, “ʻOku mau fakaʻamu ke ʻomi e temipalé ke ofi ange ki he kāingalotu tupu tokolahi ʻo e Siasí” (“Tuku ke Tau Vilitaki Atu,” Liahona, Mē 2018, 119).
Talu mei ai, ʻoku hanganaki atu ʻa e kāingalotu ʻo e Siasí ʻi he konifelenisi lahi kotoa pē, ki hono fanongonongo ʻo ha ngaahi temipale foʻou ʻi he funga ʻo e māmaní, ʻo nau ofo ʻi he tupulaki vave mo e ʻamanaki ʻe fanongonongo atu ke toe ofi ange ha temipale ki honau ngaahi ʻapí.
Temipale Brussels Belgium
Fanongonongo ʻi ʻEpeleli 2021
Ne fakaʻohovale ʻaupito ʻa e taimi ne mau fanongo ai ki hono fanongonongo ʻe Palesiteni Nalesoni ʻe ʻi ai ha temipale ʻi Palasolo, Pelesiume. Naʻá ku tokangaʻi mo hoku uaifí ʻa e Misiona Belgium/Netherlands, pea ʻokú ma faʻa ngāue ʻi he Temipale Hague Netherlands, ʻa ia ʻoku houa ʻe ua mei homa ʻapí ʻi Pelesiume. Ko e taimi ní te ma heka meʻalele houa pē ʻe taha pea malava pē ke nounou ange, ke ma ʻalu ai ki he temipale ʻi Palasoló.
Hili ʻemau fanongoa e fanongonongó, ne tō homau loʻimatá koeʻuhí ko ʻemau ongoʻi houngaʻia moʻoni. Kuo fakatupulaki ʻe homau fāmilí mo e kāingalotu homau siteikí ha ongoʻi fakatapui mo ʻofa ki he temipalé makatuʻunga mei he foʻi fanongonongó ʻataʻatā pē. ʻOku fakamoʻoniʻi mai ʻe he fanongonongo ko ʻeni ʻo e temipalé, ʻoku ʻafioʻi ʻe he ʻEikí hotau kiʻi fonuá pea ʻokú Ne ʻafioʻi e ngāue mo e ngaahi feilaulau ʻa e kau paionia kimuʻá mo kinautolu lolotonga ʻi he feituʻú ni.
Johan Buysse mo Linda Buysse-Vergauwen, Uooti St Niklaas, Siteiki Antwerp Belgium
Temipale Antofagasta Chile
Tanupou Nōvema 2020
ʻOku fakafiefia ke vakai ki he founga ʻoku fakavaveʻi ai ʻe he Fakamoʻuí ʻa ʻEne ngāué ʻi he loto mo e ʻatamai ʻo e Kau Māʻoniʻoni ʻi he Ngaahi ʻAho Kimui Ní. ʻOku tau loto ke tau mateuteu ʻi he tapa kotoa pē kae lava ke tau fai ʻa e meʻa ʻoku finangalo ki ai ʻa e ʻEikí ʻi he taimi ʻe fakatapui mo ngāue ai ʻa e Temipale Antofagasta Chile.
ʻOku ueʻi kimautolu ʻe heʻemau fānaú mo e kakai kei talavoú ʻaki ʻenau loto vēkeveke mo e fiefia ke ngāue ʻi he temipalé. ʻOku nau ʻosi fakakaukauloto pē ki haʻanau hū ki ai. ʻOku nau ako ki he ʻuhinga ʻo hono tānaki ʻo ʻIsilelí, ʻa ia ko ha konga mahuʻinga kinautolu ʻo e tānaki ko ʻení, pea mo e founga ʻe mahuʻinga ai ke ʻi ai ha fale ʻo e ʻEikí ʻe ofi mai ki honau ngaahi ʻapí.
Tā Fakatātā ʻo e Temipale Antofagasta Chile
ʻOku fokotuʻutuʻu maau ʻe he Kāingalotu tokolahi ʻi he fakatokelau ʻo Sileí ʻenau moʻuí, ʻi he mahino ʻe tatali mai ʻa e Huhuʻí kiate kinautolu ʻaki ha ongo toʻukupu ʻoku mafao mai ke talitali lelei kinautolu ʻi Hono fale māʻoniʻoní. ʻOku nau loto ke hoko ko ha konga ʻo e tāpuaki mahuʻinga ko ia ʻo e ʻi ai ha temipale ʻi Antofagasta. ʻOku ou teuteu fakataha mo hoku uaifi ko Patitá, koeʻuhí ke falala mai ʻa e ʻEikí ke tokoni ʻi he ngāue ko ʻeni ʻo e tānaki fakataha ʻa ia ʻoku tau ʻofa lahi aí.
Ko Tīsema 2018 ʻa e taimi fakamuimuitaha naʻa mau lava ai ʻo ʻaʻahi fakafāmili ki he Temipale Taipei Taiwan, kimuʻa pea fakahoko ʻe he mahaki fakaʻauha COVID-19 ha fakangatangata ki he fefonongaʻakí pea iku ai ki ha tāpuni ʻo e ngaahi temipalé. ʻOku mau hanganaki fiefia atu ʻi he loto hangamālie ke mau lava ʻo foki vave ʻo moihū ʻi he fale ʻo e ʻEikí.
Naʻa mau fiefia kotoa ʻi he taimi naʻe fanongonongo ai ha temipale ʻi Singapoá. ʻOku ʻafioʻi ʻe he Tamai Hēvaní ʻa e Kāingalotu ʻi Malēsiá. Kuo taʻu lahi e feinga ʻa e Kāingalotu ʻi he Vahefonua Kuala Lumipaá ke ngāue ke hoko ko ha siteiki. Ne ʻi ai ha ngaahi taimi ne ngali fuʻu taumamaʻo ʻaupito e taumuʻa ko ʻení, ka naʻe ʻikai pē ke tuku ʻemau talanoa ki he hoko ko ha siteikí. ʻOku fakahaaʻi mai ʻe hono fanongonongo ʻo ha temipale ʻi Singapoá ʻoku ʻafioʻi ʻe he ʻEikí ʻa e ngaahi ngāue ʻa e Kāingalotu Malēsiá.
Richard Kok Leong Ho mo Chan Min Lian, Kolo Petaling Jaya, Vahefonua Kuala Lumipā, Malēsia
Temipale Durban South Africa
Fakatapui ʻi Fēpueli 2020
ʻOku ʻi ai homau temipale foʻou ʻi Teapeni, Saute ʻAfilika, ʻa ia ʻoku mau maʻu ai ha faingamālie ke “tuʻu ʻi he ngaahi potu toputapú pea ʻe ʻikai ueʻi ʻa kinautolu” (Tokāteline mo e Ngaahi Fuakava 45:32). ʻE lava ke tau toʻo ai hotau taimí mei he ngaahi faingataʻa mo e longoaʻa ʻo e māmaní, ke fakafanongo mo fanongoa ʻa e kihiʻi leʻo siʻi mo vanavanaiki ʻo e Laumālie Māʻoniʻoní.
Temipale Durban South Africa
Ko e temipalé ko ha feituʻu ia ʻe lava ke tau tānaki atu maʻu pē ha ngaahi tulutā lolo ki heʻetau ngaahi māmá ke ulo ngingila ange, ʻo tau lava ai ʻo mateuteu ange ki he ʻaho ʻo e ʻEikí.
Mandy Swinburne (faitaaʻi fakataha mo hono ʻofefiné), Uooti Hillcrest, Siteiki Hillcrest South Africa
Temipale Port Vila Vanuatu
Fanongonongo ʻi ʻOkatopa 2020
ʻI heʻeku hoko ko e palesiteni fakasiteikí, naʻá ku ongoʻi lōmekina ʻaupito ʻi he taimi ne fanongonongo ai ʻe Palesiteni Lāsolo M. Nalesoni ʻa e temipalé. Naʻá ku ongoʻi ʻa e nonga, fiefia, mo e ʻamanaki lelei maʻa hoku fāmilí, kaungāmeʻá, mo e kau mēmipa ʻo e siteikí, pea pehē ki ha niʻihi tokolahi kehe te nau lava foki ʻo maʻu ha ngaahi tāpuaki mei hono maʻu ha fale ʻo e ʻEikí ʻi homau ʻotu motú.
ʻI heʻemau maʻu e ongoongo ʻo e temipalé ʻi homau ngaahi matāfangá, ʻoku mau aʻusia ai ha ngaahi liliu ʻo e lotó. ʻOku feinga maʻu pē ʻa e kāingalotú ke tauhi ʻa e ngaahi fekaú mo fakataha maʻu pē mo e kau taki ʻo e Siasí ke teuteuʻi kinautolu ki he ngaahi ouau mo e ngaahi tāpuaki ʻo e temipalé. ʻOku tokolahi ange e kāingalotu ʻoku nau tukupā ke fai e ngāue hisitōlia fakafāmilí.
ʻOku ʻikai ngata pē ʻi heʻene hoko ko ha tāpuaki ki he kāingalotu ʻo e Siasí ka ki he fonuá kotoa.
Yvon Basil, Uooti Port Vila 2nd, Siteiki Port Vila Vanuatu
Temipale Mesa Arizona
Toe Fakatapui ʻi Tīsema 2021
Ko ʻeku toe hū atu ko ia ki he Temipale Mesa ʻAlesoná hili hono fakaleleiʻí, ko ha momeniti ia he ʻikai toe ngalo ʻiate au. Naʻe fakamanatu mai ʻe he ʻoupeni hausí ko ha meʻa fakafiefia ʻa e ʻi he temipalé. ʻOku toe kiʻi mahino ange ʻa e moʻuí; ʻoku kiʻi maʻamaʻa ange e mafasia mo e loto hohaʻa ʻiate aú. ʻOkú ne fakaʻatā au ke u fakakaukauloto kae lava ke u ongoʻi e nonga mo e fakakaukau ʻoku ʻomi ʻe he Tamai Hēvaní.
ʻI heʻeku maʻu ha fānau fefine ʻe toko nimá, ʻoku ou ongoʻi ʻa e fie maʻu vivili ke akoʻi kinautolu fekauʻaki mo e toenga ʻe lava ke maʻu ʻi he ngāue faivelenga ʻi he temipalé. Naʻe ʻoange ʻe hono ʻave kinautolu ki he feituʻu toputapú ni lolotonga e ʻoupeni hausí, ha faingamālie ke nau maʻu ai ha kihiʻi ʻata ʻo e meʻa ʻoku maʻu ʻe he temipalé maʻanautolú. Naʻe lahi ha ngaahi fepōtalanoaʻaki mahuʻingamālie fekauʻaki mo e teuteu ke hū ki he temipalé, lekomeni temipalé, ngaahi tuʻunga moʻuí, tuí, ngāue hisitōlia fakafāmilí, ngaahi fuakavá, ngaahi ouaú, angaʻofá, fakahaá, mo e ngaahi meʻa peheé.
Kuo tāpuekina ʻemau moʻuí pea fakamālohia ʻemau fakamoʻoní mei he faingamālie ke hū ki he fale ʻo e ʻEikí. ʻI he taimi pē naʻe maʻu aí, naʻá ku hū loto vēkeveke ki he polokalamá ke fakataimi-tēpileʻi ʻeku fuofua ʻapoinimení hili ʻa e fakatapuí. ʻOku ou mateuteu, fakataha mo e hingoa ʻeku ngaahi kuí!
Anaclea Whiting, Uooti Lindsay, Siteiki Mesa Arizona Hermosa Vista
Temipale Campinas Brazil
Fakatapui ʻi Mē 2002
ʻOku mau fiefia lahi ʻi hono toe fakaava ʻo e temipale Kemipinasí, ʻa ia naʻe tāpuni koeʻuhí ko e mahaki fakaʻauha COVID-19. Naʻe toe fakaava ʻa e temipalé ʻi ha taimi feʻunga ke ma fakamanatua ai homa taʻu 20. ʻOkú ma fiefia ʻi he meʻaʻofa makehe ko ʻeni mei he ʻEikí.
Temipale Campinas Brazil
ʻOku ou fakamoʻoni ko e temipalé ko e fale ia ʻo e ʻEikí—ko ha feituʻu ʻoku fonu ʻi he ʻofá, ngaahi maná, melinó, mo e fakamoʻuí. Ko e moʻoni ko ʻetau Tamai Hēvaní ʻa e ʻOtuá pea ʻoku fakatatali mai kiate kitautolu ʻa e fiefia ʻi Hono fale māʻoniʻoní koeʻuhí ke tau lava ʻo ongoʻi ʻEne ʻi aí mo maʻu ha mālohi ke ikunaʻi ʻa e māmaní.
Isabel Bueno de Almeida, Uooti Sumaré, Siteiki Sumaré Brazil