“Kita Makatabang sa Uban nga Mobati nga Gimahal ug Gilakip,” Liahona, Sept. 2022.
Mga Baroganan sa Pagpangalagad
Kita Makatabang sa Uban nga Mobati nga Gimahal ug Gilakip
Ang Manluluwas nakasinati og pagsalikway ug mitudlo nato sa pagtabang.
Si Sasha usa ka batan-ong babaye nga dili minyo sa usa ka family ward, diin kini dili kanunay sayon. Siya mobati nga malipayon ug kontento apan kasagaran lahi kaayo—ug medyo namatikdan og gamay—sa ubang mga miyembro sa ward. Sama sa kadaghanan kanato, siya naghandom nga dawaton ug mahisakop.
Si Thomas, usa ka hamtong nga lalaki sa ward, natudlo nga iyang tigpangalagad nga igsoong lalaki ug mihapit uban sa iyang asawa usa ka adlaw aron maila-ila si Sasha. Ang pagbisita medyo may pagkadili komportable samtang ang panagsultihanay miabot sa iyang kahimtang nga dili minyo. Apan samtang sila nag-istorya, si Sasha makaingon nga si Thomas ug ang iyang asawa naningkamot lang nga makasabot sa iyang sitwasyon ug sa unsang paagi sila makatabang.
Sa usa ka punto, si Thomas miingon, “Nakamatikod ko nga ang imong nataran kinahanglan nga limpyohan. Ganahan ko nga motabang nimo niana.”
Ang propesyon ni Sasha nakapabise niya kaayo nga ang paglimpyo sa iyang nataran dili mao ang iyang unang prayoridad. Ug gawas pa, siya dili malingaw niini. Siya kahibalo unsaon sa paglimpyo sa nataran, ug kahibalo siya nga siya makahimo ra niini. Apan kana wala makapausab sa pagkadili ganahan ni Sasha niini.
Dihay higayon nga ang pangutana ni Thomas nakapasakit tingali sa iyang mga pagbati. Apan si Thomas mihisgot nga siya sa una anaa sa militar ug nakasabot unsay kasagarang angay buhaton sa usa ka babaye sa iyang kaugalingon kon ang iyang bana wala diha. Nakamatikod si Shasha nga si Thomas nangita lang og paagi nga magkahigala sila pag-ayo. Siya naningkamot nga mahisgotan ang iyang kasinatian sa kinabuhi lakip sa kang Sasha ug nangita og komon nga kasinatian.
Ang duha ka habig bahin niini nga relasyon sa pagpangalagad nakat-on sa paghigugma ug pagdawat sa usag usa kon unsa man sila, ug ang suod, tinuod nga relasyon milambo.
Ug ang nataran ni Sasha sukad wala pa gayod mas ingon niadto kanindot nga tan-awon.
Ang Hingpit nga Ehemplo sa Pagkalakip
Sa Daang Tugon, si Isaias nanagna nga si Jesukristo masayod sa eksakto gayod kon unsa ang pagbati nga mahimong lahi. Siya nakasinati nga gibaliwala ug wala tagda. “Gitamay nato siya ug gisalikway; nakasinati siyag mga kagul-anan, ug mga pag-antos” (Isaias 53:3). Pinaagi sa Iyang hingpit nga gugma, Siya nasayod unsa ang atong gibati ug nasayod unsaon sa pagtabang nato (tan-awa sa Alma 7:12). Siya ang hingpit nga ehemplo kon unsaon nato sa pagtabang pinaagi sa gugma sa paglakip sa uban, bisan unsa ang ilang mga sirkumstansiya o panagway.
Mga Baroganan nga Hunahunaon
Samtang kamo mangita og paagi sa pagtabang sa uban nga mobati nga sila nahisakop, ikonsiderar kini nga mga baroganan nga gitudlo sa Manluluwas ug gisunod:
-
Pagmatinguhaon nga makaila og mga tawo gawas niadtong inyong nailhan na (tan-awa sa Mateo 5:43–48).
-
Ayaw kahadlok sa pagpakig-uban niadtong kinsa lahi ang pamaagi sa pagpuyo o pagtuo kon kini dili makakompromiso sa mga pagtulon-an sa Manluluwas (tan-awa sa Marcos 2:14–17; Lucas 7:38–50).
-
Ang tanan kinahanglang mobati nga kita gusto nga sila anaa sa simbahan (tan-awa sa 3 Nephi 18:22–32). Ang pagkaana sa dapit diin sila magkat-on sa ebanghelyo sa Manluluwas ug mobati sa Iyang gugma makausab ni bisan kinsa.
-
Ang Manluluwas nasayod unsay atong gikinahanglan, tungod kay Siya nasayod unsay atong gibati (tan-awa sa Alma 7:11–12). Kita makapakita og gugma pinaagi sa pagtinguha sa pagsabot sa mga kasinatian sa uban ug pagbutang sa atong kaugalingon sa ilang dapit.
-
Ang Manluluwas migahin og panahon nga maana agig tubag sa mga panginahanglan niadtong naglibot Kaniya. Siya mihapit aron atimanon ang uban bisan og Siya dunay plano nga moadto sa laing dapit (tan-awa sa Marcos 5:22–43).
Unsa ang Atong Mabuhat?
Ayaw itugot nga ang mga kalainan mopugong kaninyo sa pagpakig-ilaila niadtong imong pangalagaran. Bisan unsa pa ang atong mga kalainan, adunay komon nga butang ang madiskobrehan.