“Sulayi Lang Pag-usab,” Liahona, Sept. 2022.
Mga Tingog sa mga Santos sa Ulahing mga Adlaw
Sulayi Lang Pag-usab
Na-busy ko sa pagbuhat og maayo nga mga butang, apan ang akong relasyon sa Ginoo naapektohan tungod kay akong gibaliwala ang butang nga mas importante.
Sa dihang nahuman na ko sa akong misyon niadtong Enero 2019, sigurado ko nga sayon ra nakong mapadayon ang akong inadlaw nga pagtuon sa kasulatan. Sa sinugdanan, tinuod kana. Human sa trabaho, mopauli ko sa balay ug mobasa sa akong mga kasulatan sama sa naandan. Nalipay ko nga makahigayon gihapon ko sa akong pagbasa sa kasulatan ug pagkat-on mahitungod sa Manluluwas.
Kana nausab pagka-Hunyo 2019 sa dihang mipauli na ang akong uyab gikan sa iyang misyon. Kami nagsugod sa pakig-deyt diha-diha dayon ug na-engage paglabay sa unom ka semana.
Sa ka-busy sa pagplano sa kasal, trabaho, pag-eskwela sa kolehiyo, ug paggahin og panahon sa akong pamanhonon, ang akong pagtuon sa kasulatan mikunhod ngadto sa pipila ka higayon na lang sa usa ka semana. Tungod kay nalinga ko sa maayo nga mga butang, wala tuyoa nga akong nabaliwala ang akong relasyon sa Ginoo.
Ang akong bana ug ako naminyo pagka-Nobyembre 2019. Human sa mga holiday, misulay ko sa pagbalik kon asa na ko dapit sa mga kasulatan. Sulod sa pipila ka bulan, ang akong bana ug ako malampusong nagtuon sa mga kasulatan nga magkauban. Matag buntag sulod sa pipila ka minuto kami magbasa sa mga kasulatan ug maghisgot sa leksiyon sa Dali, Sunod Kanako sa dili pa kami mogawas aron motrabaho o moeskwela.
Dayon miabot ang COVID-19 nga pandemya. Kay wala nay grabe nga eskedyul sa eskwelahan o trabaho, nawala ang among naandan nga pagtuon sa kasulatan inigka-buntag. Kami magtuon karon ug usahay dili, ug ang among relasyon sa Ginoo naapektohan. Bisan human sa pagbakwi sa mga restriksiyon ug mibalik kami sa pagsimba, kami naglisod pa gihapon sa pagtuon.
Ang mga miyembro sa Simbahan kasagaran adunay mga panahon nga maglisod sila sa pagbasa kanunay sa ilang mga kasulatan. Ang atong kinabuhi busy, ug kita nag-atubang og mga hagit matag adlaw. Apan dili pa gayod ulahi nga magsugod pag-usab.
“Ang Ginoo wala magdahom og kahingpitan gikan kanato niining puntoha sa atong mahangtorong pag-uswag,” miingon si Presidente Russell M. Nelson. Apan, siya midugang, “Kitang tanan makabuhat og mas maayo pa ug mahimong mas maayo.”1
Ang akong bana ug ako bag-ohay lang nga mipasalig pag-usab nga mobasa sa among mga kasulatan. Kami dili pa hingpit niini, apan kami naningkamot matag adlaw sa pagpalig-on sa among mga pagpamatuod. Ako mapasalamaton alang sa daghang kahigayonan nga gihatag sa Ginoo nato aron maghinulsol, maghimo og mas maayo pa, ug mahimong mas maayo.