“Pilia nga Maghunahuna Kanunay sa mga Butang nga Espirituhanon,” Liahona, Sept. 2022.
Pilia nga Maghunahuna Kanunay sa mga Butang nga Espirituhanon
Ang pagmintenar sa atong espirituhanong pag-uswag diha sa dalan sa ebanghelyo nahisama sa pagsikad sa biseklita—pareho nga nagkinahanglan og makugihon nga paningkamot.
Mga paghulagway ni Dilleen Marsh
Ang pagdumala sa kausaban ug pagkahibalo sa unsay angayng buhaton diha sa gubot nga panahon maoy usa ka talagsaong panalangin sa pagkahimong matinud-anon nga miyembro sa Simbahan sa Ginoo. Ang gasa sa Espiritu Santo mao ang pribilehiyo sa pagdawat og padayon nga giya ug inspirasyon kon kita magpabiling matinud-anon.
Kinabuhi, Kalinaw, Giya, ug Proteksiyon
Si Apostol Pablo miingon, “Ang paghunahuna kanunay sa mga butang nga espirituhanon mosangpot sa kinabuhi ug kalinaw.” (Mga Taga-Roma 8:6; tan-awa usab sa bersikulo 5).
Ang pagpili nga maghunahuna kanunay sa mga butang nga espirituhanon pinaagi sa papuyo og kinabuhi nga takos sa malumo nga pag-aghat sa Espiritu Santo makahatag ninyo og giya sa inyong mga desisyon ug proteksiyon gikan sa pisikal ug espirituhanon nga kakuyaw. Pinaagi sa Espiritu Santo, kamo makadawat og mga gasa sa Espiritu alang sa inyong kaayohan ug niadtong inyong gihigugma ug giserbisyohan. Ang Iyang komunikasyon nganha sa inyong espiritu nagdala og mas dakong kasigurohan kay sa komunikasyon nga inyong madawat pinaagi sa inyong natural nga mga pagbati.
Unsaon man nga kita makapuyo og kinabuhi nga maghunahuna kanunay sa mga butang nga espirituhanon ug makabaton og mas kanunay nga giya sa Espiritu Santo?
1. Magmahimong nahiangay sa atong Langitnong Amahan ug sa Manluluwas.
Kon kita nahisubay sa Langitnong Amahan, kita makabaton sa pakig-uban sa Iyang Espiritu. Kon kana nga pagkahisubay atong himoong prayoridad sa atong kinabuhi, kita nagpaduol Niya ug sa Iyang Anak, si “Jesukristo, kinsa siya mipadala” (Doktrina ug mga Pakigsaad 132:24).
2. Higugmaa ang Dios.
Ang paghigugma sa atong Langitnong Amahan ug pag-ugmad og relasyon uban Niya diha sa pag-ampo mopabilin Niya diha sa atong mga hunahuna ug mga kasingkasing.
Si Apostol Juan, uban sa iyang pagpamatuod bahin sa gugma sa Dios alang nato ug uban sa iyang personal nga pagsaksi ni Jesukristo, mialkontra sa sayop nga pagtuo nga ang kaluwasan maangkon pinaagi lamang sa hugot nga pagtuo kang Jesukristo. Si Juan midapit sa iyang magbabasa sa pagsinati sa kalipay nga mahisubay sa Langitnong Amahan ug sa Anak (tan-awa sa 1 Juan 1:3). Siya midugang:
“Ayaw ninyo higugmaa ang kalibotan o bisag unsa nga iya sa kalibotan. Kon higugmaon ninyo ang kalibotan, wala kamo mahigugma sa Amahan. …
“Ang kalibotan ug ang tanan nga anaa niini nga gikaibgan sa mga tawo mangahanaw. Apan ang magbuhat sa kabubut-on sa Dios magpabiling buhi hangtod sa kahangtoran.” (1 Juan 2:15, 17).
Niining kinabuhia atong mabati ang gugma sa Dios pinaagi sa pakig-uban sa Iyang Espiritu. Kon kita mobuhat sa kabubut-on sa atong Amahan sa Langit ug maningkamot nga magpabilin diha sa dalan nga magdala nato paingon Niya, ang Espiritu Santo mogiya nato.1
3. Hinumdomi unsay gibuhat sa Manluluwas alang nato.
Ang saad diha sa duha ka pag-ampo sa sakramento mao “nga sila [kinsa moambit] unta … makabaton sa iyang Espiritu uban kanila” (Doktrina ug mga Pakigsaad 20:77, 79). Kita moambit sa sakramento matag semana tungod kay kita gusto nga mopreserbar ug moamuma sa atong pagka-espirituhanon.
Si Presidente Dallin H. Oaks, Unang Magtatambag sa Unang Kapangulohan, mitudlo: “Kon kita mas mopalayo gikan sa pagkakalibotanon, kita mobati nga mas duol sa atong Amahan sa Langit ug mas magiyahan sa iyang Espiritu. Atong gitawag kini nga matang sa kinabuhi og pagka-espirituhanon.” Si Presidente Oaks midugang: “Kon unsaon nato pagsabot ang atong mga kasinatian nagdepende usab kana sa lebel sa atong pagka-espirituhanon. … Kita kinsa adunay pagpamatuod sa ebanghelyo ni Jesukristo kinahanglang mosabot sa atong mga kasinatian base sa atong kahibalo sa katuyoan sa kinabuhi, sa misyon sa atong Manluluwas, ug sa mahangturong padulngan sa mga anak sa Dios.”2
4. Ilha ang espirituhanon nga mga butang.
Ako momatuod nga ang pagka-espirituhanon usa ka panalangin sa makanunayong paningkamot sa atong bahin. Kon kita magtinguha sa pagkat-on ug pagsunod sa mga pag-aghat sa Espiritu, kita mas sayon nga makaila sa mga butang sa Dios gikan sa mga butang sa kalibotan.
Si Elder Quentin L. Cook sa Korum sa Napulog Duha ka Apostol miingon, “Ingon nga ang pagbalik-balik ug makanunayong paningkamot gikinahanglan aron makaangkon og pisikal o mental nga kapasidad, mao usab kini sa espirituhanong mga butang.”3
Palamboa ang Inyong Pagka-espirituhanon
Salamat sa panglantaw sa mga lider sa Simbahan, kita adunay daghang nindot nga mga himan aron makatabang nato sa pagpalig-on sa atong pagka-espirituhanon. Hunahunaa ang mahitungod sa kalamboan sa Gospel Library nga app nga nagtugot sa gahom sa mga kasulatan ug pagtuon sa ebanghelyo nga sa pagkatinuod masulod na sa inyong mga bulsa sa tanang higayon. Hunahunaa ang mga kausaban nga may kalabotan sa pagpangalagad nga nag-awhag sa paggamit sa teknolohiya sa atong pagtabang sa uban. Ikonsiderar ang nakasentro sa panimalay, gisuportahan sa Simbahan nga pamaagi sa pagkat-on ug ang Dali, Sunod Kanako nga kurikulom, nga makapalambo sa atong pagka-espirituhanon bisan asa man kita.
Kita dili kinahanglan nga ibutang sa espirituhanong quarantine uban niining tanang anaa nga mga kapanguhaan! Kita mahimong magtinabangay, mopili sa matag opotunidad nga maghunahuna kanunay sa mga butang nga espirituhanon, modasig og kinabuhi ug kalinaw, ug mahunahunaong mohimo sa pagka-espirituhanon nga mahinungdanong bahin sa atong kinabuhi. Ang kasulatan nagtudlo, “Ang Espiritu naghatag sa gugma, kalipay, kalinaw, pailob, kaluoy, kaayo, pagkamaminatud-on, pagkamapaubsanon, [ug] pagkamapinugnganon sa kaugalingon” (Mga Taga-Galacia 5:22–23).
Mohimo ug Motuman sa Espirituhanong mga Tumong
Ang tawo nga maghunahuna kanunay sa mga butang nga espirituhanon maningkamot sa pagpalig-on sa iyang pagka-espirituhanon ug, kon maghimo og mga tumong, mangutana, “Ang akong mga tumong naghatag ba og igong atensiyon sa akong espirituhanon nga mga panginahanglan?”
Ang tawo nga maghunahuna kanunay sa mga butang nga espirituhanon magtinguha nga masayod kon unsaon pagsunod ang espirituhanong mga pag-aghat ug dayon lihokon kana nga mga pag-aghat. Busa, ang paghimo og tumong alang sa espirituhanong paglambo mahinungdanon.
Si Annie, ang among singko anyos nga apo, naghimo og tumong nga magkat-on og biseklita. Siya nagpraktis ug daling nakakat-on, busa ang iyang mga ginikanan mipakuyog niya sa pamilya nga pagbiseklita.
Samtang nagpadagan sila, mipahayag og katingala ang inahan ni Annie kon unsa ka maayong mobiseklita si Annie tungas sa bungtod ug tabok sa taytayan. Si Annie mipaambit sa sekreto sa iyang kalamposan: “Pugong lang gyod ko, Ma, ug padayon sa pagsikad.”
Kita usab kinahanglang mohimo sa ingon. Pinaagi sa pagsikad nga kita makamintenar sa atong pagbalanse. Ang yano, matag adlaw nga mga buhat sa pag-ampo, pagtuon sa mga kasulatan, ug pagsunod sa mapanagnaon nga tambag makahimo sa atong pagka-espirituhanon nga magpadayon bisan pa man sa mga bungtod, mga pandemya, ug mga hagit sa kinabuhi.
Si Presidente Russell M. Nelson miingon: “Kon ang inyong labing dakong tinguha mao ang pagpatigbabaw sa Dios labaw sa tanan, nga mahimong kabahin sa Israel, daghan kaayo nga mga desisyon ang mahimong mas sayon. Daghan kaayong mga isyu ang mahimong walay hinungdan! … Masayod kamo unsay inyong gustong makab-ot. Masayod kamo unsa nga matang sa tawo gusto gayod ninyo nga mamahimo.”4
Kon kamo mopokus sa unsay mahinungdanon, inyong makita nga ang proseso sa pagpalig-on sa inyong pagka-espirituhanon ug paghunahuna kanunay sa mga butang nga espirituhanon mahimong yano, bisan kon nagkinahanglan kini og paningkamot ug kakugi. Busa, pugong lang gyod ug padayon sa pagsikad!
Amumaha ang Inyong Espirituhanong Liahona
Daghan kaayo ang moagni kaninyo dinhi sa kalibotan nga usahay magduhaduha kamo kon asa kamo moadto. Hinumdomi nga ang inyong espirituhanon nga Liahona mas molihok kon mailhan ninyo ang kalainan sa tingog sa Espiritu gikan sa mga tingog sa kalibotan.
Ang Espiritu Santo kalma, klaro, ug makahupay. Mohatag kini og piho nga giya nga mohatag ninyo og kalinaw ug paglaom. Maayo kaayo kini nga paagi sa pagtambayayong uban sa Langitnong Amahan ug ni Jesukristo, sa pagtuman og daghang katungdanan aron sa pagtabang ninyo nga magpakabuhi nga matarong ug makadawat sa mga panalangin sa ebanghelyo.
“Ang sukaranan gayod nga tinubdan sa espirituhanong gahom mao ang Dios nga atong Amahan,” miingon si Presidente Nelson. “Ang mensahero niini nga gahom mao ang Espiritu Santo. Kini nga gahom lahi kay sa elektrikal nga kuryente. Ang usa ka elektrikal nga gamit mokunsomo og kuryente. Ang paggamit sa Iyang espirituhanong gahom modugang sa atong gahom. Samtang ang elektrikal nga kuryente magamit lamang sa nakatakda nga mga higayon sa panahon, ang espirituhanon nga gahom magamit karon ug sa kahangtoran!”5
Aron mahimong mahunahunaon kanunay sa mga butang nga espirituhanon, pugong lang gyod, padayon sa pagsikad, ug paghimo og espirituhanong mga tumong. Gamita ang daghang kapanguhaan nga anaa ninyo aron sa pagpalig-on sa inyong espiritu.
Ako mopamatuod nga ang paghunahuna kanunay sa mga butang nga espirituhanon sa pagkatinuod mosangpot sa kinabuhi ug kalinaw (tan-awa sa 2 Nephi 9:39), aron ang atong kahimtang sa kinabuhi molambo kon kita nahisubay sa Amahan ug sa Anak, ug nga ang Dios nahigugma nato ug naghunahuna nato ug sa atong mga panginahanglan.
Gikan sa usa ka pakigpulong sa debosyonal, “To Be Spiritually Minded Is Life and Peace,” nga gipamulong didto sa Brigham Young University niadtong Pebrero 9, 2021. Alang sa kompletong mensahe, adto sa speeches.byu.edu.