Digital Lamang
Pag-ilaila sa Apohan sa Akong Lolo didto sa Akong Misyon
Samtang nagserbisyo sa usa ka misyon sa makasaysayanon nga dapit, usa ka pag-aghat ang mitabang nako nga mobati og kasuod sa akong katigulangan.
Gilitratohan ni Valerie Ann Anderson
Usa ka Dominggo sa buntag, usa ka email gikan sa FamilySearch ang miabot sa akong inbox. Naghisgot kini mahitungod sa apohan sa akong lolo, si Thomas Jefferson Thurston. Akong nasayran nga gilubong siya sa St. George, Utah, USA, diin nagserbisyo ko isip usa ka misyonaryo sa makasaysayanon nga dapit. Sa pagsuhid og dugang pa sa akong family tree, akong nadiskobrehan nga si Thomas mibalhin ngadto sa St. George niadtong 1880 sa edad nga 75 aron maduol sa St. George Utah Temple. Nasayran usab nako nga si Thomas ang nagtukod sa usa sa kinaunhang pine nga mga balay sa St. George. Naghinamhinam ug naintriga ko tungod kay kini nga mga detalye bag-o ang tanan ngari nako kay pamilyar nako si Thomas sa ngalan lang.
Gusto nakong makita ang iyang lubnganan pagkasunod adlaw. Sayo nianang buntaga miingon ko, “Unya na lang ta moadto inigkahuman sa atong serbisyo sa Jacob Hamblin House” (usa sa makasaysayanon nga mga dapit diin ako nagserbisyo). Wala madugay mibati ko og pag-aghat nga moingon, “Moadto ta karon.”
Kay nakakita na sa litrato sa lubnganan ni Thomas diha sa FamilySearch.org, dali ra nga makit-an ang lubnganan. Samtang nagbarog sa kilid sa lubnganan nakamatikod ko og usa ka babaye nga paspas nga nagpadulong nako. Sa lubnganan sa among katigulangan, among nadiskobrehan nga manag-agaw kami og igtagutlo. Nagginaksanay kami, nangatawa, ug nagpalitrato. Gibati nako nga gigiyahan ko sa Espiritu Santo, ilabi na sa tukmang panahon, nga moabot sa sementeryo sa wala pa si Susan, ang akong bag-ong nakaila nga ig-agaw, mobiya sa sementeryo.
Mibiya ko sa sementeryo nga naghinamhinam nga modiretso sa pag-adto sa address nga nakasulat diha sa FamilySearch nga gipuy-an sa apohan sa akong lolo. Anaa didto ang iyang balay. 140 ka tuig na ang milabay sukad sa iyang pagsugod sa pagtukod sa balay. Nagtan-aw sa iyang balay, mibati ko og wala damha nga mga pagbati sa koneksyon ug gugma alang sa apohan sa akong lolo.
Ang usa ka karatula sa atubangan sa luna nagmatuod nga mao kini ang balay nga iyang gitukod. Samtang nagbasa ko sa karatula, ang tag-iya sa balay nagsakay paggawas sa agianan sa sakyanan. Mihunong siya ug miingon ko nga ako ang apo sa apo sa nagtukod niini nga balay. Ang lalaki mabinationg mitanyag nga pakit-on ko sa balay. Nakita ug nahikap nako ang balay sa apohan sa akong lolo nga natawo niadtong 1805.
Naglakaw-lakaw ko sa orihinal nga pine nga salog diha sa sala. Mitambo ko sa orihinal nga mga bintana. Misaka ko sa habog nga makasaysayanon nga hagdanan paingon sa ikaduhang andana. Sa hilom, naghunahuna ko sa akong mga katigulangan nga nangaon, nangatulog, ug nagkat-on sa ebanghelyo niini nga balay. Kon naulahi pa ko og pipila ka minuto, dili unta ko maimbitahan sa balay nga gipuy-an ni Thomas. Ang akong Langitnong Amahan anaa sa mga detalye sa akong pagbisita sa balay sa apohan sa akong lolo ug gibati ang kasuod ngadto niya nga dili nako masabot.
Naghunahuna ko sa mga pulong ni Elder David A. Bednar sa Korum sa Napulog Duha ka Apostoles: “Ang atong mga tinguha, pagkamatinud-anon, ug pagkamasulundon modapit ug motabang kanato nga makaila sa Iyang mga kalooy sa atong mga kinabuhi. … Matag usa kanato makaangkon og mga mata nga klarong makakita ug mga dunggan nga klarong makadungog sa malumong mga kalooy sa Ginoo samtang sila molig-on ug motabang kanato niining ulahing mga adlaw.”1
Sulod lang sa 24 ka oras, nakakonekta ko sa Apohan sa akong lolo nga si Thurston. Akong nakat-onan ang mahitungod sa iyang pagkamasulundon, mga sakripisyo, ug mga kalamposan. Ang FamilySearch mao ang akong tinubdan aron makaila niya, apan ang mga paghunghong sa Espiritu ang nagkonekta nako ngadto sa akong kabilin. Ang gugma nga gipakita sa akong Langitnong Amahan ngari nako nakapalig-on nako ug magpabilin sa akong panumdoman sa kahangtoran. Ako nasayod nga ang sunod-sunod nga mga panghitabo ug ang mga detalye sa akong adlaw mga panalangin gikan sa Ginoo.