Digital Lamang
Pagpakita sa Gugma sa Manluluwas pinaagi sa Pagserbisyo
Pinaagi sa tinuoray nga mga buhat sa gugma ug pagserbisyo, kita makatabang sa uban sa pagduol ngadto kang Kristo ug sa pagbati sa gugma sa Dios.
Ang mga tagsulat nagpuyo sa Colorado, USA.
Isip mga miyembro sa pakigsaad sa Ang Simbahan ni Jesukristo sa mga Santos sa Ulahing mga Adlaw, tingali maghunahuna kita usahay kon unsaon nga makatuman sa atong pasalig sa pagpaambit sa ebanghelyo ngadto sa uban. Ang pagserbisyo naghatag og nindot nga oportunidad sa pagtabang sa uban ug sa pagpaambit usab og daghan pa mahitungod ni Jesukristo samtang kita motabang nila diha sa Iyang ngalan. Apan usahay tingali mabalaka kita nga ang atong mga paningkamot basin isipon nga gituyo aron lang makapaambit sa ebanghelyo.
Unsay atong nadiskobrehan sa miaging katuigan mao nga ang kadasig luyo sa mga buhat sa pagserbisyo ang nakapahimo og dakong kalainan kon giunsa pagdawat ang serbisyo. Sama sa katawhan ni Hari Benjamin, kita mihangop sa kahibalo nga “kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios” (Mosiah 2:17). Kon kita magtinguha sa giya sa Dios ug mainampoong moduol sa uban nga adunay tinguha sa pagserbisyo nila ug pagtabang nila nga mabati ang gugma sa Dios—dili kay maghisgot lang sa ebanghelyo—dili na kita mabalaka mahitungod sa resulta. Mao nga among nakita nga ang ehemplo ni Ammon diha sa Basahon ni Mormon makapadasig kaayo.
Pagsunod sa Ehemplo ni Ammon
Si Ammon usa ka Nephite nga nagsangyaw sa ebanghelyo sa yuta sa Ishmael, usa ka yuta sa mga Lamanite diin mahimo siyang isipon nga usa ka kaaway. Sa dihang miabot si Ammon, siya gidakop ug gidala sa atubangan ni Hari Lamoni, kinsa nangutana sa motibo ni Ammon sa pag-adto. Sa dihang gipangutana nganong miadto siya, si Ammon miingon:
“Ako nagtinguha sa pagpuyo taliwala niini nga mga katawhan sulod sa usa ka panahon; oo, ug tingali hangtud sa adlaw nga ako mamatay.
“… ako mahimo nga imong sulugoon” (tan-awa sa Alma 17:23, 25).
Si Ammon matinuoron ug matinud-anon nga miserbisyo ni Hari Lamoni, gani mibutang sa peligro sa iyang kaugalingong kinabuhi aron panalipdan ang mga karnero sa hari ug ang iyang isigka-sulugoon gikan sa mga kawatan (tan-awa sa Alma 17:26–39). Kining tinuoray nga mga buhat sa kamapahinungoron ug pagserbisyo naghatag ni Ammon og oportunidad sa pagpaambit sa ebanghelyo ngadto sa mga Lamanite sa dihang gipangutana siya mahitungod sa iyang mga gibuhat.
Ang ehemplo ni Ammon ang nakadasig sa among kaugalingong sumbanan sa pamilya bahin sa pagserbisyo. Naglangkob kini sa pagserbisyo sa mga tawo alang sa usa ka mahinungdanong katuyoan: aron tabangan sila nga magmalamposon ug magmalipayon. Sa laing mga pulong, kita moserbisyo nila tungod kay kita nahigugma ug nagpakabana nila.
Kini nga paagi natural ug mahimo ra tungod kay ang gikinahanglan lamang niini mao nga kita mahibalo kon unsay nahitabo sa mga kinabuhi sa mga tawo sa atong palibot ug motabang nila kon ang tabang gikinahanglan. Among nasayran nga samtang nagtrabaho uban sa ward mission leader ug sa ward ug sa full-time nga mga misyonaryo, kami makagamit sa matag oportunidad aron mapakita ang gugma sa Dios ngadto sa among mga higala ug mga silingan.
Pag-ila sa Panginahanglan, Pagpili nga Lihokon
Mga tuig ang milabay, usa ka babaye nga ginganlan og Jacqueline Langey-Johnson mibalhin sa among kasilinganan. Siya usa ka tigbantay sa duha ka batan-ong babaye nga adunay mga kakulangan. Isip magtiayon, naghunahuna kami basin kon naglisod si Jacqueline sa pag-atiman sa iyang kabtangan samtang nag-atiman niining mga batan-ong babaye. Nakadesisyon kami nga mopaila sa among kaugalingon ug tan-awon kon unsay among matabang.
Nindot kaayo ang among panagsultihanay dihang among gisultihan si Jacqueline nga malipay kami nga makatabang niya sa ubang buluhaton diha sa nataran. Mapasalamaton siya nga midawat sa among tanyag ug misulti namo unsa ka lisod niya ang paggawas ug mohimo sa mga buluhaton sa nataran kay dili niya mahimong biyaan ang mga batan-ong babaye nga mao ra sa sulod sa balay.
Ang Ginoo nahibalo gayod sa sitwasyon ni Jacqueline ug migamit namo aron tabangan siya nga makakaplag og kalipay sa iyang bag-ong balay ug mobati nga giabiabi sa kasilinganan. Naghinamhinam kami sa higayon nga makaserbisyo niya ug makapalambo og mahangtoron nga panaghigalaay.
Pagtan-aw sa mga Panalangin sa Pagserbsiyo
Wala madugay among nadiskobrehan nga si Jacqueline usa ka deboto nga Kristiyano nga ganahan magbasa mahitungod sa Manluluwas. Busa atol sa usa sa among panagsultihanay, gihatagan namo siya og Dali, Sunod Kanako—Alang sa mga Indibidwal ug mga Pamilya: Bag-ong Tugon nga manwal. Si Jacqueline ganahan kaayo sa materyal sa manwal ug sa nindot nga paagi sa pagpresentar niini—mihimo kini sa pagbasa sa Bag-ong Tugon nga makalingaw ug sayon sabton.
Usa ka adlaw mga duha ka tuig na ang milabay, si Jacqueline nangutana kon ang full-time nga mga misyonaryo mahimo ba nga moadto sa iyang balay ug motudlo niya og dugang pa mahitungod sa Simbahan gamit ang Dali, Sunod Kanako nga manwal. Kuyog sa full-time nga mga misyonaryo, among gisugdan ang sinemana nga mga panaghisgotan uban niya. Human sa upat ka bulan, gusto siya nga magpabunyag. Mihangyo siya nako (si Bob) sa pagpahigayon sa ordinansa ug sa akong asawa (si Judy) nga mahimong usa ka saksi.
Sukad sa iyang bunyag niadtong Septyembre 2020, si Jacqueline nagserbisyo isip tig-abiabi atol sa panagtigom alang sa sakramento, mitabang sa full-time nga mga misyonaryo sa pagtudlo sa uban, mitambag sa mga young adult sa among ward nga adunay mga kakulangan, nakigkita sa full-time nga mga misyonaryo matag semana aron makat-on pa og dugang mahitungod sa Simbahan, ug miila sa pipila sa iyang mga katigulangan nga nagkinahanglan og ordinansa sa buhat sa templo nga ipahigayon alang nila. Siya sa kasamtangan nagserbisyo usab sa Denver Colorado Temple.
Pagsaksi sa mga Milagro
Atol sa bunyag, ang mga miyembro sa Simbahan nakigsaad sa Dios sa “pagbangutan uban niadto nga nagbangutan; oo, ug sa paghupay niadto nga nagkinahanglan sa kahupayan, ug mobarug ingon nga mga saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit” (Mosiah 18:9).
Samtang kitang tanan tinuoray nga maningkamot sa pagpaambit sa gugma sa Langitnong Amahan ngadto sa atong mga kaigsoonan pinaagi sa atong pagserbisyo, sama sa gihimo ni Ammon, kita nasayod nga ang kalangitan maabli ug kita makasinati og dagkong mga milagro, lakip na sa pipila nga nagagikan sa pagpaambit sa ebanghelyo ngadto sa atong mga higala ug mga silingan.