“Usa ka Adlaw Matag Higayon,” Liahona, Sept. 2022.
Mga Tingog sa mga Santos sa Ulahing mga Adlaw
Usa ka Adlaw Matag Higayon
Kami mapasalamaton sa among talagsaong mga miyembro sa ward, kinsa mitabang namo sa among autistic nga anak.
Si Josh atol sa bag-ong pagbiyahe ngadto sa templo.
Litrato ni Joshua sa maayong kabubut-on sa tagsulat
Sa dihang ang among anak nga lalaki nga si Joshua, nag-edad og 18 ka bulan, kami nakamatikod og makapahibulong nga butang sa iyang kinaiya. Si Josh makasulti hapit sa tanang pulong sa matag kanta sa salida sa telebisyon nga iyang gitan-aw, apan ulahi siyang nakat-on sa pagsulti. Usa ka adlaw ang akong ugangan nga babaye miingon nga si Josh nagpakita og mga timailhan sa pagka-autism. Ang mga espesyalista misulti namo sa samang butang.
Ang akong asawa, si Elizabeth, mibasa og daghang literatura mahitungod sa autism. Gipa-enroll usab niya si Josh sa mga programa nga makatabang kaniya. Determinado ang akong asawa nga si Josh makasinati sa labing posible nga maayong pagsugod sa kinabuhi nga among mahatag kaniya.
Sa mga adlaw nga ako nabalaka sa umaabot, si Elizabeth mopakalma nako. Siya misulti nako nga kami kinahanglan nga molihok usa ka adlaw matag higayon.
“Kami kinahanglan nga magpasalamat sa matag bag-ong butang nga makat-onan ni Josh imbis magpokus sa tanan nga wala mahibaloi sa umaabot,” siya miingon.
Sa nagdako na siya, si Josh nagkabadlongon na sa simbahan. Aron siya dili makadisturbo sa Primary o makapasakit og mga bata, siya akong sabakon. Siya molugnot, mangawras, ug makigbugno nako sulod sa tulo ka oras sa simbahan. Kanunay akong mouli nga bun-og ug kapoy.
“Nganong dili na lang nato siya ibilin sa balay ug magpuli-puli sa pagbantay kaniya?” Misugyot ko.
“Kon dili nato ipadayon ang pagdala kaniya,” mitubag si Elizabeth, “siya makat-on nga kon siya magpabadlong, siya igawas sa simbahan.” Nasayod ko nga eksakto siya.
Usa ka adlaw ang inahan sa laing pamilya nga dunay autistic nga bata misulti nako, “Kon si Josh mag-edad og otso ug makaangkon sa Espiritu Santo, magsugod na siya sa pagkabuotan!”
Nagduha-duha ko sa iyang mga pulong, apan sa dihang nag-edad na siya og otso, siya nakadawat sa Espiritu Santo ug na buotan siya—og gamay.
Sa dihang si Josh midako-dako na, siya nakadawat sa pagkapari. Siya mipaambit sa sakramento, ug siya nakat-on sa kaimportante sa pagserbisyo. Ang mga sakop sa iyang korum sa pagkapari nagkat-on og sayaw sa mga 1980 nga video sa musika uban ni Josh ug mipasundayag niini sa salo-salo sa ward.
Ang among ward buotan kaayo ngadto ni Josh. Ang mga miyembro mopahiyom kon siya mopaambit sa sakramento samtang naghimo og pipila ka lihok sa sayaw sa mga 1980.
Si Josh 17 na karon. Siya usa ka hanas nga musikero kinsa mosulat og mga kanta. Siya ganahan og drama ug moapil kanunay sa teyatro sa eskwelahan ug sa komunidad.
Kami mapasalamaton nga nahimong mga ginikanan ni Josh ug kasangga sa iyang panaw. Kami wala makasiguro unsa ang umaabot, apan kami mapasaligon nga hingpit nga magpuyo matag adlaw uban kaniya.